Last updated on December 7th, 2023 at 06:51 pm
ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್ ಪಾಲ್‌ಗೆತೊಂದಿನ ಕಾರ್ಯಕ್ರಮೊಡು ಐಸಿಸ್ ಉಗ್ರ ಸಂಘಟನೆದ ಒಟ್ಟುಗು ಸಂಪರ್ಕ ಇಪ್ಪುನ ಮುಸ್ಲಿಂ ಮೌಲ್ವಿ ಕುಲ್ಲದಿಪ್ಪುನ ಪ್ರಕರಣೊದ ಜಡ್ತೆನ್ ರಾಜ್ಯ ಸರ್ಕಾರ ಎನ್ಐಎಗ್ ಒಪ್ಯಾವೊಡು ಪಂದ್ ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ ಆಗ್ರಹ ಮಲ್ದೆರ್.
ಈ ಬಗೆಟ್ ಮಾಧ್ಯಮೊಲೆಡ ಪಾತೆರ್ನ ಆರ್, ಮುಖ್ಯಮಂತ್ರಿನ ಒಟ್ಟುಗು ಮಿತ್ತರ್ಮೆ ಪಟ್ಟೊಂಡಿನ ಮೌಲ್ವಿನ ಮಿತ್ತ್ ವಿಜಯಪುರೊಟು ಪ್ರಚೋದನಾತ್ಮಕ ಭಾಷಣ ಮಲ್ತಿನ ಬಗೆಟ್ ಪ್ರಕರಣೊಲು ದಾಕಲಾತ. ಅಕ್ಲೆಗ್ ಐಎಸ್‌ಐ ಸಂಪರ್ಕ ಇಪ್ಪುನ ಬಗೆಟ್ ಎಂಕ್ಲೆನ ಶಾಸಕೆ ಬಸನಗೌಡ ಪಾಟೀಲ್ ಯತ್ನಾಳ್ ತೆರಿಪಾದೆರ್. ಮುಖ್ಯಮಂತಿರ್ಲು ಸಾದಿ ತಪ್ಪಾವುನ ಬೇಲೆ ಮಲ್ದೆರ್. ರಾಜ್ಯ ಸರ್ಕಾರ ಈ ಪ್ರಕರಣೊನು ಎನ್ಐಎಗ್ ಒಪ್ಯಾವೊಡು ಪಂದ್ ಎಂದು ಆಗ್ರಹ ಮಲ್ದೆರ್.
ಕುಡ್ಲದ ಕುಕ್ಕರ್ ಬಾಂಬ್ ಪ್ರಕರಣೊಡ್ಲಾ ಕಾಂಗ್ರೆಸ್‌ದಕುಲು ನಾಮಾಸ್ ಮಲ್ತಿತ್ತೆರ್. ಆಂಡ, ಅಕ್ಲೆನೆಟ್ ಐನಾಜಿ ಜನ ದೇಶದ್ರೋಹದ ಬೇಲೆಡ್ ಉಲ್ಲೆರ್ ಪನ್ಪಿನ ಬೊಲ್ಪುಗ್ ಬೈದ್ಂಡ್. ಮುಖ್ಯಮಂತಿರ್ಲು ಮುಸ್ಲಿಂ ಸಮುದಾಯೊಗು 10 ಸಾರ ಕೋಟಿ ರೂ. ಕೊರ್ಪೆ ಪನ್ದ್ ಪನ್ತಿನವು ಓಲೈಕೆ ರಾಜಕಾರಣೊದ ದುಂಬರಿನ ಭಾಗ ಅತ್ತಂದೇ ಪ್ರಚೋದನಾಕಾರಿಲಾ ಆದುಂಡು. ಸಿಎಂ ಆತಿನಕ್ಲು ಮಾತೆರೆನ್ಲಾ ಒಪ್ಪಗೋಡ್ಯಾವೊಂದು ದುಂಬು ಪೋವೊಡು. ದೇಶೊದ ಪೊಲಿನ್ ಬುಲೆಪಾವರೆ ಮಾತೆರ್ಲಾ ಬೆನೊಡು. ಅವೆನ್ ಬುಡ್ದ್ ಒಂಜಿ ಸಮುದಾಯೊಗು ಸಂಪೊತ್ತು ಪಟ್ಟುನ ಪಾತೆರ ಪಾತೆರುವೆರ್, ಉಂದು ಸಮಾಜ ಪುಡಪುನ ಬೇಲೆ ಪಂದ್ ಪಂಡೆರ್.