Last updated on December 24th, 2023 at 10:25 am
ಒಡಿಪು: ಲೈಸೆನ್ಸ್ ದಾಂತಿನ ಲ್ಯಾಬ್, ಕ್ಲಿನಿಕ್‌ಲೆನ ಮಿತ್ತ್ ಆರೋಗ್ಯಾಧಿಕಾರಿಲು ದಾಳಿ ಮಲ್ದಿನ ನಡಕೆ ಕರಿನ ವಾರ ಒಡಿಪುಡು ನಡತ್‌ದ್ಂಡ್. ಈ ಪೊರ್ತುಡು ತಾನ್ ಡಾಕ್ಟರ್ ಪಂದ್ ಪನೊಂದು ಬ್ರಹ್ಮಾವರ ತಾಲೂಕ್‌ದ ಕಂಬಳಗದ್ದೆ ಕ್ರಾಸ್‌ದ ಕುಂಜಾಲ್‌ಡ್ ಕ್ಲಿನಿಕ್ ದೀವೊಂದು ಆಯುರ್ವೇದಿಕ್, ಅಲೋಪತಿ ಮರ್ದ್ ಕೊರೊಂದಿತ್ತಿನ ಬಿಕಾಂ ಪದವೀಧರೆ ಒರಿ ತಿಕ್ಕ್‌ದ್ ಬೂರ್ದೆ.
ಬಿಕಾಂ ಪದವಿ ಮಲ್ದಿನ ಸಂದೇಶ್ ರಾವ್ ಕುಂಜಾಲ್‌ಡ್ ಶ್ರೀಸೂರ್ಯನಾರಾಯಣ ಸ್ವಾಮಿ ಪುದರ್ದ ಆಯುರ್ವೇದಿಕ್ ಕ್ಲಿನಿಕ್ ಓಪನ್ ಮಲ್ತ್‌ದ್ ಮರ್ದ್ ಕೊರೊಂದಿತ್ತೆ. ಈ ಕ್ಲಿನಿಕ್‌ದ ಮಿತ್ತ್ ಆರೋಗ್ಯಾಧಿಕಾರಿಲು ದಾಳಿ ಮನ್ತಿನೇ ಸಂದೇಶ್ ರಾವ್ ಡಾಕ್ಟರ್ ಅತ್ತ್, ಆಯೆ ಕಲ್ವ ಡಾಕ್ಟರ್ ಪಂದ್ ತೆರಿದ್‌ಬೈದ್ಂಡ್. ಕ್ಲಿನಿಕ್ ಜಪ್ತಿ ಮಲ್ದಿನ ಆರೋಗ್ಯಾಧಿಕಾರಿಲು, ಆರೋಪಿನ ಮಿತ್ತ್ ಬ್ರಹ್ಮಾವರ ಸ್ಟೇಶನ್‌ಗ್ ಒಯಿಲ್ ಕೊದ್ದಿತ್ತ್‌ದ್, ಎಫ್ಐಆರ್ ದಾಕಲಾತ್ಂಡ್.
ಉಪ್ಪುಂದೊದ ಸುಷ್ಮಾ ಕ್ಲಿನಿಕಲ್ ಲ್ಯಾಬ್ ಸೀಜ್ ಮಲ್ತ್‌ದ್ ಕೇಸ್ ದಾಕಲ್ ಮಲ್ತಿತ್ತ್‌ದ್, ಕುಂದಾಪುರೊದ ಬಯೋಲಿನ್ ಕ್ಲಿನಿಕಲ್ ಲ್ಯಾಬ್‌ದ ಮಿತ್ತ್‌ಲಾ ಪ್ರಕರಣ ದಾಕಲಾತ್ಂಡ್. ಆರೂರುಡು ಆರೋಗ್ಯಾಧಿಕಾರಿಲು ಒಂಜಿ ಕ್ಲಿನಿಕ್ ಜಪ್ತಿ ಮಲ್ದೆರ್.
ಆಯುರ್ವೇದಿಕ್ ನೋಂದಣಿಡ್ ಅಲೋಪತಿ ಕ್ಲಿನಿಕ್ ನಡಪಾವೊಂದಿತ್ತಿನ ವಿಚಾರೊಲಾ ಪತ್ತೆ ಆತ್ಂಡ್. ಆದಿ ಒಡಿಪುದ ಧನ್ವಂತರಿ ಕ್ಲಿನಿಕ್, ನಾವುಂದದ ನಂಬಿಯಾರ್ ಕ್ಲಿನಿಕ್‌ಡ್ ಅಲೋಪತಿ ಮರ್ದ್ ಕೊರೊಂದಿತ್ತಿನ ವಿಚಾರ ತೆರಿದ್ ಬೈದ್ಂಡ್.