Last updated on December 4th, 2023 at 07:27 pm
ಮುಲ್ಕಿ ತುಳುನಾಡ್‌ದ ನಡುಟು ಉಪ್ಪುನ ಒರುಂಬ ಮಾಗಣೆದ ವ್ಯಾಪ್ತಿ ಇತ್ತಿನ ಒಂಜಿ ಪ್ರದೇಶ. ಇತ್ತೆ ಮುಲ್ಕಿ ತಾಲೂಕಾದುಂಡು. ಐತಿಹಾಸಿಕವಾದ್ ಮುಲ್ಕಿದ ಬಡಕಾಯಿಡ್ ಶಾಂಭವಿ ತುದೆ, ತೆನ್ಕಾಯಿಡ್ ಪಾವಂಜೆ(ನಂದಿನಿ) ತುದೆ, ಪಡ್ಡಾಯಿಡ್ ಕಡಲ್, ಮೂಡಾಯಿಡ್ ಮುಂಡೇರ ಸೀಮೆ ಇತ್ತ್ಂಡ್. ಇಂಚಿನ ಮುಲ್ಕಿದ ಪುದರ್ ಎಂಚ ಪುಟ್ಟಿನಿ ಪನ್ಪಿನ ಬಗೆಟ್ ಸುಮಾರ್ ಪಾತೆರೊಲು ಉಂಡು. ಒಂಜಿ ಪಾತೆರೊದ ಪ್ರಕಾರ ಮುಲ್ಕಿಡ್ ಮರ್ದ್(ಮೂಲಿಕೆ)ದ ದೈಕುಲು ಮಸ್ತ್ ತಿಕ್ಕೊಂದಿತ್ತಿನೆರ್ದಾವರ ಉಂದೆನ್ ಮೂಲಿಕಾಪುರ ಪನೊಂದಿತ್ತೆರ್ ಬೊಕ್ಕ ಅವ್ವೇ ಮುಲ್ಕಿ ಆಂಡ್ ಪನ್ಪಿನ ಉಂಡು. ಕುಡೊಂಜಿ ಅಭಿಪ್ರಾಯದ ಪ್ರಕಾರ ನೀರ್‌ಡ್ ಮುರ್ಕುದಿತ್ತಿನ ಜಾಗ, ಬೊಕ್ಕ ನೀರ್ ಪಿರ ಪೋದು ಬದ್ಕರೆ ಯೋಗ್ಯ ಆಯಿವೆರ್ದಾವರ ಉಂದೆನ್ “ಮುರ್ಕಿ” ಜಾಗೆ ಪನ್ದ್ ಲೆತ್ತ್ ಅವ್ವೇ ಬೊಕ್ಕ ಮುಲ್ಕಿ ಆತ್ಂಡ್ ಪನ್ದ್ ಉಂಡು.
ಶಾಂಭವಿ ತುದೆಟ್ ಪೋವೊಂದಿತ್ತಿನ ಮಲ್ಲ ಸರಕ್‌ಲೆನ ಪಡವುಲೆಗ್ “ಮೂಲಿ” ಪನ್ಪಿನ ಪುದರ್‌ದ ಸುಂಕ ಮುಲ್ಪ ವಸೂಲಿ ಮಲ್ತೊಂದಿತ್ತಿನೆರ್ದಾವರ ಬೊಕ್ಕ ಉಂದೇ ಪುದರ್ ಮುಲ್ಕಿ ಆಂಡ್ ಪನ್ಪಿನ ಅಭಿಪ್ರಾಯಲಾ ಉಂಡು.
17ನೇ ಶತಮಾನೊರ್ದು ದುಂಬು ನಮಕ್ ಮೂಲಿಕೆ ಪನ್ಪಿನ ಪುದರ್‌ದ ಒವ್ವೇ ದಾಖಲೆ ಇಜ್ಜಿ. ಆಂಡ ಅವೆರ್ದ್ ದುಂಬುದ ದಾಖಲೆಲೆಡ್ ಬಪ್ಪನಾಡ್, ಕಾರುನಾಡ್, ಪಾಳೆಉಂಜ(ಪಾವಂಜೆ), ಪೊಸ್ರಾಲ, ಸೀಮಂತೂರು, ಒಳಲಂಕೆ ಪನ್ದ್ ಪೂರಾ ಉಂಡು. ಅಂಚಾಂಡ ಒರೊರ್ದೊರಾನೇ ಮುಲ್ಕಿ ಪನ್ಪಿನ ಪುದರ್ ಎಂಚ ಬತ್ತ್ಂಡ್ ಪನ್ದ್ ಎನ್ನೊಡಾಪುಂಡು.
ಪೋರ್ಚುಗೀಸೆರ್ ಕೃ.ಶ 1705 ಮುಟ್ಟ ಮಲ್ದಿನ ದಾಖಲೆಲೆಡ್ “ಕಾರನಾಟೆ” ಪನ್ಡ ಇತ್ತೆದ ಕಾರ್ನಾಡ್‌ದ ಉಲ್ಲೇಖ ಅಂಚೆನೆ ಮೂಲಿಸುಂಕ ವಸೂಲಿ ಮಲ್ಪುನ ಜಾಗೆನ್ “ಮೂಲಿಕೆ” ಪನ್ದ್ ಪನ್ತೆರ್. ಈ ವರ್ಸೊರ್ದು ಬೊಕ್ಕ ಮಾತಾ ದಾಖಲೆಲೆಡ್ ಮೂಲಿಕೆದ ಉಲ್ಲೇಖ ಬರ್ಪುಂಡು, ಅಂಚಾದ್ ಮೂಲಿ ಸುಂಕ ವಸೂಲಿ ಮಲ್ಪುನ ಜಾಗ ಉಪ್ಪುನವೇ ಮುಲ್ಕಿ ಪನ್ಪಿನೆಕ್ಕ್ ಎಚ್ಚಿನ ಸಮರ್ಥನೆ ತಿಕ್ಕುಂಡು. ಮುಲ್ಕಿ ಇತ್ತೆ ತಾಲೂಕು ಆದಿಪ್ಪು, ಆಂಡ ಕರ್ನಾಟಕ ಸರಕಾರ ಮಲ್ಪುನೆರ್ದ್ ದುಂಬೇ ಬ್ರಿಟೀಷೆರ್ ಮುಲ್ಕಿನ್ ತಾಲೂಕು ಮಲ್ದಿತ್ತೆರ್. 1862ನೇ ಇಸವಿ ಮುಟ್ಟ ಮುಲ್ಕಿ ಒಂಜಿ ತಾಲೂಕು ಆದಿತ್ತ್ಂಡ್, ಆ ಪೊರ್ತುಡು ಮಲ್ಲ ಬಂದರ್ ಇತ್ತ್ ಮುಲ್ಪ ಆಮದು ರಫ್ತು ಎಡ್ಡೆ ಆವೊಂದಿತ್ತ್ಂಡ್, ಅವೆರ್ದ್ ಬೊಕ್ಕ ಕ್ರಮೇಣ ಮುಲ್ಕಿ ತನ್ನ ಪ್ರಾಮುಖ್ಯತೆನ್ ಕಲೆಯೊಂಡು.
- ಡಾ॥ ಕೆ.ಜಿ ವಸಂತ ಮಾಧವೆರೆನ ಮೂಲಿಕೆಯ ಇತಿಹಾಸ ಮಸ್ತಿರೆದ ಆಕರೊಡು