Last updated on December 12th, 2023 at 10:53 am
ಇಡೀ ಸರ್ಕಾರೊನೇ ಬೆಳಗಾವಿ ಅಧಿವೇಶನೊಡು ಇಪ್ಪುನಗ ಬೆಳಗಾವಿಡೇ ಒಂಜಿ ಕರ್ಲ್ ಕಿನ್ಕುನ ನಡಕೆ ನಡತ್‌ದ್ಂಡ್. ಪೊಂಜೊವು ಒರ್ತಿನ್ ಉರ್ಬುಲಿ ಮಲ್ತ್‌ದ್ ಕಂಬೊಗು ಕಟ್ಟ್‌ದ್ ಪಾಡ್ದ್ ಮಾರಣಾಂತಿಕವಾದ್ ಹಲ್ಲೆ ಮಲ್ದಿನ ನಡಕೆ ಬೆಳಗಾವಿ ತಾಲೂಕ್‌ದ ವಂಟಮೂರಿ ಗ್ರಾಮೊಡು ನಡತ್‌ದ್ಂಡ್.
ಜವನೆ ಒರಿ ತಾನ್ ಮೋಕೆ ಮಲ್ತಿನ ಪೊಣ್ಣನ ಒಟ್ಟುಗು ಬಲ್ತ್ ಪೋದಿತ್ತೆ. ಉ್ಂದೆರ್ದ್ ಪಿಸಿರಾತಿನ ಪೊಣ್ಣನ ಇಲ್ಲದಕುಲು ಜವನನ ಅಪ್ಪೆನ ಮೆಯಿಟಿತ್ತಿ ಕುಂಟು ಒಯ್ತ್‌ದ್, ಕಂಬೊಗು ಕಟ್ಟ್‌ದ್ ಪಾಡ್ದ್ ಆರೆನ್ ಅಮಾನವೀಯವಾದ್ ನಡಪಾವೊಂದೆರ್.
ವಂಟಮೂರಿ ಗ್ರಾಮೊದ ನಿವಾಸಿ ದುಂಡಪ್ಪ ಅಶೋಕ ನಾಯಕ್ ಟ್ರಕ್ ಡೈವರ್‌ ಆದಿತ್ತೆ. ಈ ಜನತ ಅಪ್ಪೆ ಕಮಲವ್ವ ಪನ್ಪಿನಾರೆನ ಮಿತ್ತ್ ಹಲ್ಲೆ ಆತ್ಂಡ್. ಕಮಲವ್ವರೆನ ಮಗೆ ದುಂಡಪ್ಪೆ, ಪ್ರಿಯಾಂಕಾ ಬಸಪ್ಪ ನಾಯಕ್ ಪನ್ಪಿ ಪೊಣ್ಣನ್ ಮೋಕೆ ಮಲ್ತೊಂದಿತ್ತೆ. ಮೊಕುಲು ಕರಿನ ದಡ್ಡ್ ವರ್ಸೊರ್ದಿಂಚಿ ಒರಿಯೊನೊರಿ ಮೋಕೆ ಮಲ್ತೊಂದಿತ್ತೆರ್. ಕೋಡೆಗ ಪ್ರಿಯಾಂಕಾನ ಇಲ್ಲದಕುಲು ಬೇತೆ ಆಣನೊಟ್ಟುಗು ಯಾದಿ ಮೇ ಶಾದಿ (ನಿಶ್ಚಯ) ಮನ್ಪೆರ ಇತ್ತೆರ್.
ಈ ವಿಚಾರ ತೆರಿನ ಇನೆಪಕ್ಕಿಲು ಬಲ್ಪೆರ ನಿರ್ಧರಿತ್‌ದೆರ್. ನಡೀರ್ ಪ್ರಿಯಾಂಕಾನ್ ಲೆತೊಂದು ದುಂಡಪ್ಪೆ ಬಲ್ತ್ ಪೋತೆ. ಉ್ಂದೆರ್ದ್ ಪಿಸಿರಾತಿನ ಪೊಣ್ಣನ ಇಲ್ಲದಕುಲು ದುಂಡಪ್ಪನ ಇಲ್ಲಗ್ ಪೋದು, ಇಲ್ಲದ ಬಾಕಿಲ್ ಪುಡತ್‌ದ್ ಉಲಯಿ ಪೋದು ಅಪ್ಪೆನ ಮಿತ್ತ್ ಮುರ್ಗೊಲೆ ಲೆಕ್ಕ ಮಿತ್ತ್ ಬೂರ್ದ್ ಇಲ್ಲಡಿತ್ತಿನ ಸೊತ್ತುಲೆನ್ ಪೊಡಿ ಮಲ್ತ್‌ದೆರ್.
ನಡೀರ್‌ಡ್ ಬಾಕಿಲ್ ಪುಡತ್‌ದ್ ಪೊಗ್ಗಿನಕುಲು ದುಂಡಪ್ಪನ ಅಪ್ಪೆ ಕಮಲವ್ವನ ಕುಂಟು ಬಿಚ್ಚದ್ ಹಲ್ಲೆ ಮಲ್ತ್‌ದ್, ಬೊಕ್ಕ ಮೆರವಣಿಗೆ ಮಲ್ತ್ ಕಂಬೊಗು ಕಟ್ಟ್‌ದ್ ಪಾಡ್ದ್ ಪಿರ ಹಲ್ಲೆ ಮಲ್ದೆರ್. ಪೊಂಜೊವುಲು ಸೇರ್ದ್ ಒಟ್ಟು ಒರ್ಮ್ಬ ಜನ ಹಲ್ಲೆ ಮಲ್ತಿತ್ತ್‌ದ್, ಕಾಕತಿ ಪೊಲೀಸ್ ಸ್ಟೇಶನ್ ಸೀಮೆಡ್ ನಡಕೆ ನಡತ್‌ದ್ಂಡ್.
ಇತ್ತೆ ಪ್ರಕರಣೊಗು ಸಂಬಂಧಿತ್‌ದ್ ಒಟ್ಟು 7 ಆರೋಪಿಲೆನ್ ಕೈದ್ ಮಲ್ದೆರ್. ಜಾಗೆಗ್ ಬೆಳಗಾವಿ ನಗರ ಪೊಲೀಸ್ ಕಮಿಷನರ್ ಸಿದ್ದರಾಮಪ್ಪೆರ್ ಬತ್ತ್‌ದ್ ಪರಿಶೀಲನೆ ಮಲ್ದೆರ್. ಬಲ್ತ್ ಪೋತಿನ ಇನೆಪಕ್ಕಿಲೆನ ಪತ್ತೆರ ಪೊಲೀಸೆರ್ ಬಲೆ ಪಾಡ್ದೆರ್. ಹಲ್ಲೆ ಆತಿನ ಪೊಂಜೊವುನು ಕಾತ್‌ದ್ ಆಸ್ಪತ್ರೆಗ್ ಸೇರಾದ್, ಮರ್ದ್ಮನ್ಪಾದೆರ್. ಇಡಿ ಗ್ರಾಮೊಡು ಪೋಲಿಸ್ ಬಂದೋಬಸ್ತ್‌ ಮಲ್ದ್ಂಡ್.