ರಿಕಾರ್ಡ್ ಚೆಕ್ ಮಲ್ಪುನ ನೆವನ ಪನ್ದ್ ಮಲ್ಪೆದ ಕಡಲಾಯರೆನ ಸಾರ ಸಾರದ ಮೀನ್ ಕೊನೊಯಿನ ಗೋವಾ ಪೋಲೀಸೆರ್?

Last updated on January 4th, 2024 at 09:40 am

ಮೀನ್‌ದ ಬೋಂಟೆ ಮಲ್ತ್ ಬರೊಂದಿತ್ತಿನ ಮಲ್ಪೆದ ಗಂತ್ ಕಡಲ್‌ದ ಬೋಟುನು ಉಂತಾದ್ ಗೋವಾದ ಕರಾವಳಿ ಕಾಪುನ ಪಡೆ ಪನ್ದ್ 5 ಜನಕುಲೆನ ಕೂಪೆ ಬೋಟುಡಿತ್ತಿನ ಎಡ್ಡೆ ಬಿಲೆತ ಮೀನುಲೆನ್ ಕೊನೊತೆರ್ ಪನ್ದ್ ಕಡಲಾಯೆರ್ ಆರೋಪ ಮಲ್ದೆರ್.

ಮಲ್ಪೆದ ಬೋಟು 12 ನಾಟಿಕಲ್ ಮೈಲ್ ದೂರೊಡು ಮಹರಾಷ್ಟ್ರದಲ್ಪದ ಕಡಲ್‌ಡ್ ಮೀನ್ ಪತ್ತ್‌ದ್ ಡಿಸೆಂಬರ್ 31ಕ್ಕ್ ಮಲ್ಪೆದಂಚಿ ಬರೊಂದಿಪ್ಪುನಗ ರೋಂದುಡು ಇತ್ತಿನ ಗೋವಾದ ಕರಾವಳಿ ಕಾಪುನ ಪೋಲೀಸೆರ್ ಬತ್ತ್ ಬೋಟುನು ತಡೆತ್ ಉಂತಾದೆರ್.

ರೆಕಾರ್ಡ್ ತೂಪಿನ ನೆವನೊಡು ಬೋಟುದ ಉಲಯಿ ಬತ್ತ್ ಒಂಜಿ ಬಟ್ಟಿ ಬೊಂಡಸ್, 4 ಕೆಜಿದ ನಾಲ್ ಅಂಜಲ್, 20 ಕೆಜಿ ಬೊಲಿಯ ಪಾಂಪ್ಲೇಟ್ ದೊಟ್ಟುಗು 25 ಸಾರದ ಮೀನ್ ಕೊನೊತೆರ್ ಪನ್ದ್ ಬೋಟುದ ತಂಡೇಲೆರ್ ಪನ್ತೆರ್.