Last updated on January 25th, 2024 at 09:35 am
ಕಡಬ: ಪಾಸ್‌ದ ಜೆರಾಕ್ಸ್ ಕಾಪಿನ್ ತೋಜಾಯಿನೆಕ್ ಪರೀಕ್ಷೆಗ್ ಪೋವೊಂದಿತ್ತಿನ ಕಾಲೇಜ್ ವಿದ್ಯಾರ್ಥಿನ್ ಬಸ್ ಕಂಡಕ್ಟರ್ ಸಾರ್ವಜನಿಕವಾದ್ ಕೈಟ್ ಪತೊಂದು ಪೊಲೀಸ್ ಸ್ಟೇಶನ್‌ಗ್ ಲೆತೊಂದು ಪೋತಿನ ನಡಕೆ ಜ.24 ತಾನಿ ಕಾಂಡೆ ಕಡಬಡ್ ನಡತ್‌ದ್ಂಡ್.
ಕುಡುಮ-ಕಲ್ಲ್‌ಗುಡ್ಡೆ-ಕಡಬ-ಶಾಂತಿಮೊಗೇರ್-ಪುತ್ತೂರ್ ಬಸ್‌ಡ್ ಈ ನಡಕೆ ನಡತ್‌ದ್ಂಡ್. ಪೇರಡ್ಕ ಮುಟ್ಟದ ಕಡಬ ಸರ್ಕಾರಿ ಪದವಿಪೂರ್ವ ಕಾಲೇಜಿಡ್ ಪ್ರಥಮ ಪಿಯುಸಿ ಓದೊಂದುಪ್ಪುನ ರವಿಗಣೇಶ್ ಪೇರಡ್ಕದಲ್ಪ ಬಸ್ ಬರ್ತ್‌ದಿತ್ತೆರ್. ಅಮಸರೊಡು ಒರಿಜಿನಲ್ ಬಸ್ ಪಾಸ್ ಇಲ್ಲಡೇ ಒರಿದಿತ್ತ್‌ದ್ ಕಂಡಕ್ಟರ್ ಟಿಕೇಟ್ ಮನ್ಪುನಗ ತೆರಿದ್ಂಡ್. ಈ ಪೊರ್ತುಡು ಕಂಡಕ್ಟರ್ಗ್ ವಿದ್ಯಾರ್ಥಿ ಬಸ್ ಪಾಸ್‌ದ ಜೆರಾಕ್ಸ್ ತೋಜಾದೆ .ಈ ಪೊರ್ತುಡು ಕಾಲೇಜ್ ಐಡಿನ್ಲಾ ಕೇಂದ್ ಗೆತೊಂದು ಬೊಕ್ಕ ಬಸ್ ಪಾಸ್‌ದ ಜೆರಾಕ್ಸ್ ಆಪುಜಿ ಪಂಡ್‌ದ್ ಟಿಕೇಟ್‌ಲಾ ಕೊರಂದೆ ಐಡಿಕಾರ್ಡ್‌ನ್ ವಶೊಕು ಗೆತೊಂದು ಕಂಡಕ್ಟರ್ ಸ್ಟೇಶನ್‌ಗ್ ಪೋಪಿಲೆಕ ವಿದ್ಯಾರ್ಥಿಗ್ ಬಲವಂತ ಮಲ್ದೆರ್ ಪಂದ್ ಆರೋಪಿತ್‌ದೆರ್.
ಎಂಕ್ ಪ್ರಾಕ್ಟಿಕಲ್ ಪರೀಕ್ಷೆಗ್ ಕಡೆ‌ಸ್ಸೊಂದುಪ್ಪುನೆತ ಬಗೆಟ್ ಕಂಡಕ್ಟರ್ಗ್ ಏತ್ ಪಂಡ್ಂಡಲಾ ಆತೆಕೇ ಮನಿಪಂದೆ ಆವಂದೇ ಕಡಬ ನಡುಪೇಂಟೆರ್ದ್ ವಿದ್ಯಾರ್ಥಿನ್ ಕೈ ಒಯ್ತೊಂದು ಅವಮಾನ ಆಪಿಲೆಕ ಸ್ಟೇಶನ್‌ಗ್ ಲೆತೊಂದು ಪೋತೆರ್ ಪಂದ್ ತೆರಿದ್‌ಬೈದ್ಂಡ್. ಬೊಕ್ಕ ಪೊಲೀಸೆರೆಗ್ ಪರೀಕ್ಷೆ ಇಪ್ಪುನ ಬಗೆಟ್ ವಿದ್ಯಾರ್ಥಿನ ಅಮ್ಮೆರ್ ಮನವರಿಕೆ ಮಲ್ತಿಬೊಕ್ಕ ಕಾಲೇಜಿದ ಐಡಿ ಕಾರ್ಡ್ ಗೆತೊಂದು ವಿದ್ಯಾರ್ಥಿ ಪರೀಕ್ಷೆಗ್ ಹಾಜಿರಾತೆ.
ಉ್ಂದೆನ್ ಮಾತಾ ತೂಯಿನ ಸಾರ್ವಜನಿಕೆರ್ ಅಂಚೆನೆ ಬೇತೆ ವಿದ್ಯಾರ್ಥಿಲು ಕಡಬದ ಬಸ್ ಸಂಚಾರಿ ನಿಯಂತ್ರಕೆರೆನ್ ತರಾಟೆಗ್ ಗೆತೊಂದೆರ್ ಪಂದ್ ತೆರಿದ್‌ ಬೈದ್ಂಡ್.
ಬಸ್ ಪಾಸ್‌ದ ಜೆರಾಕ್ಸ್ ದೀವೊಂದಿನ ದಾಯೆ?:
ಒರಿಜಿನಲ್ ಬಸ್ ಪಾಸ್ ಒರ ದಕ್ಕ್‌ದ್ ಪೋದಿತ್ತ್ಂಡ್. ರಡ್ಡ್ ದಿನ ಕರಿದ್ ಸಾರ್ವಜನಿಕೆರೆ ಸಹಕಾರೊಡು ಪಿರ ತಿಕ್ಕ್‌ದಿತ್ತ್ಂಡ್. ಇತ್ತೆ ಪೊಸ ಬಸ್ ಪಾಸ್ ಓಲ್ಲಾ ದಕ್ಕ್‌ದ್ ಪೋಂಡ ಅರ್ಜೆಂಟ್ ಬೋಡಾವು ಪಂಡ್‌ದ್ ಕಲರ್ ಜೆರಾಕ್ಸ್ ಕಾಪಿ ಬ್ಯಾಗ್‌ಡ್ ದೀವೊಂದಿತ್ತೆ ಪಂದ್ ವಿದ್ಯಾರ್ಥಿ ತೆರಿಪಾದೆ.