Last updated on January 21st, 2024 at 07:06 pm
ಕುಡ್ಲ: ಅಯೋಧ್ಯೆಡ್ ರಾಮ ಮಂದಿರ ಉದ್ಘಾಟನೆ ಆವೊಂದುಪ್ಪುನೃರ್ದಾವರ ಜನವರಿ 22 ಕ್ ರಜೆ ಘೋಷಣೆ ಮನ್ಪೊಡು ಪಂಡ್‌ದ್ ಬಿಜೆಪಿ ನಾಯಕೆರ್ ರಾಜ್ಯ ಸರ್ಕಾರೊಗು ಒತ್ತಾಯ ಮಲ್ತೊಂದಿತ್ತ್‌ದ್, ಇತ್ತೆ ಶಾಸಕೆ ಡಾ.ಭರತ್ ಶೆಟ್ಟಿ ವೈ ಮೇರ್ಲಾ ಶಾಲೆ- ಕಾಲೇಜಿಲೆಗ್ ರಜೆ ಕೊರೊಡು ಪಂದ್ ಒತ್ತಾಯ ಮಲ್ದೆರ್.
ಯಾನ್ಲಾ ರಾಮ ಭಕ್ತೆ ಪಂದ್ ಪಂಡೊನ್ನ ಸಿಎಂ ಸಿದ್ಧರಾಮಯ್ಯೆರ್ ಮಂದಿರ ಉದ್ಘಾಟನೆದ ದಿನ ಶಾಲೆ ಕಾಲೇಜಿಲೆಗ್ ರಜೆ ಕೊರೊಡು. ಆ ಜೋಕುಲು ಅಕುಲಕುಲೆನ ಇಲ್ಲಡ್ ಇಲ್ಲದಕಲೆನೊಟ್ಟುಗು ಕುಸಿಟ್, ಪೂಜೆ ಮನ್ಪೆರ ಅನುವು ಮಲ್ತ್ ಕೊರೊಡು. ರಾಮನ ಆದರ್ಶ ಬೋಧನೆ ಮನ್ಪುನಂಜಿನ ಶಿಕ್ಷಣ ಇಲಾಖೆ ಜ. 22 ತಾನಿ ಜೋಕುಲು ಇಲ್ಲದಕುಲೆನೊಟ್ಟುಗು ಸೇರ್ದ್ ಪೂಜೆ ಕರಿಪೆರ ರಾಜ್ಯ ಶಿಕ್ಷಣ ಇಲಾಖೆ ರಜೆ ಕೊರ್ತುಜಿ. ಅಂಚಾದ್ ರಾಜ್ಯ ಶಿಕ್ಷಣ ಇಲಾಖೆ ರಾಮನ ಆದರ್ಶ ಕಲ್ಪಾವುನ ನೈತಿಕತೆ ಕಲೆವೊಂದುಂಡು ಪಂದ್ ಆರ್ ಪಂಡೆರ್.
ಇತ್ತೆ ಇಡೀ ದೇಶಡ್ ಪರ್ಬೊದ ಕುಸಿ ಇತ್ತ್‌ದ್, ಇಲ್ಲ ಇಲ್ಲಡ್ಲಾ ಪರ್ಬೊಗು ಅಟ್ಟನೆ ಆವೊಂದುಂಡು. ಶಿಕ್ಷಣ ಇಲಾಖೆ ಮಾತ್ರ ಈ ಕುಸಿಟ್ ಜೋಕುಲು ಪಾಲ್‌ಪಡೆವಂದಿಲೆಕ ರಜೆ ಕೊರೊಂದಿಜ್ಜಿ. ಕೆಲ ಖಾಸಗಿ ಬೊಕ್ಕ ಸರ್ಕಾರಿ ಶಾಲೆಲೆಡ್ ಈ ದಿನ ಬೋಡುಬೋಡೂಂದೆ ಜೋಕುಲೆಗ್ ಪರೀಕ್ಷೆ ಮನ್ಪೆರ ಪಿದಡ್ದಿನ ಎಂಕ್ಲೆನ ಗುಮನೊಗು ಬೈದ್ಂಡ್. ರಾಜ್ಯ ಸರ್ಕಾರ ಇತ್ತೆನೇ ಜ. 22 ಕ್ ರಜೆ ಕೊರ್ಯೆರ ಶಿಕ್ಷಣ ಇಲಾಖೆಗ್ ಆದೇಶ ಕೊರೊಡು ಪಂದ್ ಆರ್ ಒತ್ತಾಯ ಮಲ್ದೆರ್.