Last updated on January 12th, 2024 at 09:40 am
ಜನವರಿ 22 ತಾನಿ ಅಯೋಧ್ಯೆದ ರಾಮಮಂದಿರೊಡು ನಡಪರೆಗುಪ್ಪುನ ರಾಮಲಲ್ಲಾ ಪ್ರಾಣ ಪ್ರತಿಷ್ಠಾ ಕಜ್ಜೊಗು ಪೋವರೆ ಪುರಿತ ಗೋವರ್ಧನ ಮಠೊದ ಮಠಾಧೀಶೆರ್ ನಿರಾಕರಿತಿನ ಒಂತೆ ದಿನೊರ್ದು ಬೊಕ್ಕ, ಉತ್ತರಾಖಂಡೊದ ಜ್ಯೋತಿರ್ಮಠೊದ ಅವಿಮುಕ್ತೇಶ್ವರಾನಂದ ಸರಸ್ವತಿ ಸ್ವಾಮಿಲು ಶಂಕರಾಚಾರ್ಯೆರೆ ಪೀಠೊಲು ಈ ಕಜ್ಜೊಡು ಪಾಲ್‌ಪಡೆಪುಜ ಪಂದ್ ಪನ್ತೆರ್. ವಿಶೇಷವಾದ್ ದೇವಲ್ಯೊದ ಬೇಲೆ ಪತ್ತ ಆವಂದಿನೆರ್ದಾವರ ಈ ಕಜ್ಜೊನು “ಶಾಸ್ತ್ರೊಲೆನ ವಿರುದ್ಧ” ಅತ್ತ್ಂಡ ಪವಿತ್ರ ಹಿಂದೂ ಧರ್ಮಗ್ರಂಥೊಲೆನ ವಿರುದ್ಧವಾಡ್ ನಡಪಾವೊಂದುಂಡು ಪಂದ್ ಆರ್ ಅಂಗಾರೆ ತನ್ಕುಲೆ ✖️ದ ಅಧಿಕೃತ ಹ್ಯಾಂಡಲ್‌‌ಡ್ ಪೋಸ್ಟ್ ಮಲ್ದಿನ ವಿಡಿಯೋಡು ಪಂತೆರ್.
ಈ ಶಂಕರಾಚಾರ್ಯೆರ್ 8ನೇ ಶತಮಾನೊದ ಹಿಂದೂ ಸಂತೆ ಆದಿ ಶಂಕರೆರ್ ಉಂಡುಮಲ್ದಿನ ಹಿಂದೂ ಧರ್ಮೊದ ಅದ್ವೈತ ವೇದಾಂತ ಸಂಪ್ರದಾಯೊಗು ಸೇರ್ದಿನ ನಾಲ್ ಮಠೊಕ್ಲೆನ ಮಠಾಧೀಶೆರ್. ಜ್ಯೋತಿರ್ಮಠ (ಜೋಶಿಮಠ), ಗೋವರ್ಧನ ಮಠ, ಶೃಂಗೇರಿ ಶಾರದ ಪೀಠ, ಬೊಕ್ಕ ದ್ವಾರಕಾ ಶಾರದ ಪೀಠ ಉ್ಂದುವೇ ನಾಲ್ ಮಠೊಕುಲು. ಜ್ಯೋತಿರ್ಮಠೊತ 46 ನೇ ಶಂಕರಾಚಾರ್ಯೆರಾಯಿನ ಅವಿಮುಕ್ತೇಶ್ವರಾನಂದ ಸರಸ್ವತಿ ಸ್ವಾಮಿಲು ತನ್ಕುಲೆ ವೀಡಿಯೋಡು, ನಾಲ್ ಶಂಕರಾಚಾರ್ಯರ ಪೀಠೊದ ನಿರ್ಧಾರೊನು “ಮೋದಿ ವಿರೋಧಿ” ಪಂದ್ ಅರ್ಥ ಮಲ್ತೊನರೆ ಬಲ್ಲಿ. ಎಂಕುಲು “ಶಾಸ್ತ್ರ ವಿರೋಧಿ” ಆವರೆ ಬಯಕುಜ ಪಂದ್ ಪಂತೆರ್.
ಪೋವಂದೆ ಇಪ್ಪೆರ ನೆವನ ದಾದ?
ಅಡೆಗ್ ಪೋವಂದೆ ಇಪ್ಪುನು ಒವ್ವೇ ಪಗೆ ಅತ್ತ್ಂಡ ಪಿಸ್‌ರ್‌ಡ್ ಅತ್ತ್. ಆಂಡ ಶಾಸ್ತ್ರ-ವಿಧಿಕ್ಲೆನ್ (ಶಾಸ್ತ್ರೊಲೆನ ಕರಿಪುಲು) ಅವೆಕ್ ತಕ್ಕ ಮನ್ಪುನು ಅಂಚೆನೇ ಅವೆಕ್ ತಕ್ಕ ಮನ್ಪಾವುನು ಶಂಕರಾಚಾರ್ಯೆರೆನ ಕರ್ತವ್ಯ ಆದುಂಡು. ಅಲ್ಪ ಶಾಸ್ತ್ರ-ವಿಧಿಕ್ಲೆನ್ ಗೆನ್ತೊಂದಿಜ್ಜೆರ್. ದೇವಲ್ಯೊದ ಬೇಲೆ ನನಲ ಆವಂದೆ ಇಪ್ಪುನಗ ಪ್ರಾಣ ಪ್ರತಿಷ್ಠಾ ಕಜ್ಜ ಮನ್ಪುನವು ಮಲ್ಲ ಸಮಸ್ಯೆ. ಎಂಕ್ಲು ಉ್ಂದೆನ್ ಪಂಡಂಡ, ಎಂಕ್ಲೆನ್ ‘ಮೋದಿ ವಿರೋಧಿ’ ಪಂದ್ ಲೆಪ್ಪುವೆರ್. ಮುಲ್ಪ ಮೋದಿ ವಿರೋಧಿ ಪನ್ಪಿನವು ದಾದ ಉಂಡು ಪಂದ್ ಆರ್ ಕೇಂದೆರ್.
ಪುರಿತ ಗೋವರ್ಧನ ಮಠೊದ ಮುಖ್ಯಸ್ಥೆ ನಿಶ್ಚಲಾನಂದ ಸರಸ್ವತಿ ಸ್ವಾಮಿಲು “ಎನ್ನ ಸ್ಥಾನೊದ ಘನತೆದ ಬಗೆಟ್ ಎಂಕ್ ತೆರಿದಿನೆರ್ದಾವರ” ಈ ಕಜ್ಜೊರ್ದು ದೂರ ಇಪ್ಪುವೆ ಪಂದ್ ಘೋಷಣೆ ಮಲ್ತಿನ ಒಂತೆ ದಿನೊಟೇ ಈ ಪಾತೆರೊಲು ಬೈದ. ಯಾನ್ ಅಡೆ ಪೋದು ಮನ್ಪುನವು ದಾದ ಉಂಡು? ಮೋದಿಯೆರ್ ಉದಿಪನ ಮಲ್ತಿನ ಒರುಕು ಕೈ ಮುಗಿನಗ ಯಾನ್ ಅಲ್ಪ ಉಂತೊಂದು ತಾಟಿ ಬೊಟ್ಟೊಡಾ? ಎಂಕ್ ಆ ಸ್ಥಾನ ಬೊರ್ಚಿ. ಎಂಕ್ ಇತ್ತೆನೇ ಮಲ್ಲ ಸ್ಥಾನ ಉಂಡು. ಎಂಕ್ ಕ್ರೆಡಿಟ್ ಬೊರ್ಚಿ. ಆಂಡ ಶಂಕರಾಚಾರ್ಯೆರ್ ಪ್ರಾಣ ಪತ್ರಿಷ್ಠೆಗ್ ಬತ್ತ್‌ದ್ ದಾದ ಮನ್ಪೊಡು ಪಂದ್ ಆರ್ ಕೇಂದೆರ್. ಈ ವಿಡಿಯೋನು ನಾಗಾಲ್ಯಾಂಡ್ ಕಾಂಗ್ರೆಸ್ ಟ್ವೀಟ್ ಮಲ್ದ್ಂಡ್.
ಮೋದಿಯೆರ್ ಧಾರ್ಮಿಕ ವೈವಾಟ್‌ಲೆಗ್ ಅಡ್ಡಕೈ ಪಾಡೊಂದುಲ್ಲೆರ್ ಪಂದ್ ಆರೋಪಿತ್ಂಡಲಾ, ಎಂಕ್ಲೆಗ್ ಅಯೋಧ್ಯೆದ ಬಗೆಟ್ ಒವ್ವೇ ಪಗೆ ಇಜ್ಜಿ ಪಂದ್ ಆರ್ ಸ್ಪಷ್ಟ ಮಲ್ತೆರ್.
ಉ್ಂದು ಎನ್ನ ಅಹಂಕಾರ ಅತ್ತ್. ಆಂಡ ಎನ್ನ ಸ್ಥಾನೊದ ಘನತೆದ ಬಗೆಟ್ ಎಂಕ್ ತೆರಿದುಂಡು, ಅಂಚಾದ್ ಯಾನ್ ಪೋವೊಂದಿಜ್ಜಿ ಪಂದ್ ಪಂತೆರ್.
ಶೃಂಗೇರಿ
ಶೃಂಗೇರಿ ಪೀಠ ಈ ಬಗೆಟ್ ಅಧಿಕೃತ ಸ್ಟೇಟ್‌ಮೆಂಟ್ ಕೊರ್ದಿತ್ತ್‌ದ್, ಎಂಕ್ಲೆಗ್ ಮಂದಿರೊದ ಬಗೆಟ್ ಒವ್ವೇ ವಿರೋಧ ಇಜ್ಜಿ ಪಂದ್ ಸ್ಪಷ್ಟ ಮಲ್ದೆರ್. ಶೃಂಗೇರಿಡ್ ಜನವರಿ 16ರ್ದ್ ಜನವರಿ 22ಮುಟ್ಟ ವಿದ್ಯಾರಣ್ಯಪುರೊದ ರಾಮ ಮಂದಿರೊಡು ಧಾರ್ಮಿಕ ಕಜ್ಜೊಲೆನ ಅಟ್ಟನೆ ಆತ್ಂಡ್. ಶೃಂಗೇರಿ ಶಾರದಾ ಮಠೊದ ಜಗದ್ಗುರುಕ್ಲೆನ ಉಪಸ್ಥಿತಿಡ್ ರಾಮ ಜಪ, ರಾಮಾಯಣ ಪಾರಾಯಣ, ಅಖಂಡ ರಾಮ ಜಪ ಅಂಚನೇ ರಾಮತಾರಕ ಹೋಮ ಸೇರ್ದ್ ಬೇತೆ ಬೇತೆ ಧಾರ್ಮಿಕ ಕಜ್ಜೊಲು ನಡಪರೆಗುಲ್ಲ. ಜನವರಿ 22ತಾನಿಯೇ ವಿದ್ಯಾರಣ್ಯಪುರ ಶ್ರೀರಾಮ ದೇವಲ್ಯ ಉದಿಪನ ಆವರೆಗುಂಡು.
