Last updated on January 4th, 2024 at 11:50 am
ಉದಿಪನೊಗು ಅಟ್ಟನೆ ಆದಿಪ್ಪುನ ಅಯೋಧ್ಯೆದ ರಾಮ ಮಂದಿರೊನು ಬಾಂಬ್ ಪಾಡ್‌ದ್ ಪುಡಪುನ ಅಂಚೆನೆ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥೆರೆನ್ ಹತ್ಯೆ ಮಲ್ಪುನ ಬಗೆಟ್ ಇ-ಮೇಲ್‌ಡ್ ಬೊಲ್ಚಾವರೆ ತೂಯಿನ ವಿಷಯೊಡು ಉತ್ತರಪ್ರದೇಶದ ವಿಶೇಷ ಕಜ್ಜಕೂಪೆ ಜನವರಿ 3ಕ್ಕ್ ರಾತ್ರೆಗ್ ರಡ್ಡ್ ಆರೋಪಿಲೆನ್ ಪತ್ತ್‌ದೆರ್.
ಗೊಂಡಾ ಮೂಲದ ತಾಹರ್ ಸಿಂಗ್ ಅಂಚೆನೆ ಓಂ ಪ್ರಕಾಶ್ ಮಿಶ್ರಾ ಅರೆಸ್ಟ್ ಆತಿನಕುಲು. ಮೊಕುಲು ಗಲಸಿನ ರಡ್ಡ್ ಮೊಬೈಲ್, ಮೇಲ್ ಐಡಿ, ರಡ್ಡ್ ವೈಫೈ ರೌಟರ್, ಸಿಸಿಟಿವಿ ಡಿವಿಆರ್ ವಶೊಕು ದೆತೊನ್ದೆರ್.
ಭಾರತೀಯ ಕಿಸಾನ್ ಮಂಚ್‌ದ ಅಧ್ಯಕ್ಷೆ ದೇವೇಂದ್ರ ತಿವಾರಿ ಮೆರೆನ ಟ್ವಿಟರ್ ಖಾತೆದ ಪೋಸ್ಟ್ ಗ್ ಈ ಬೊಲ್ಚಾವುನ ಸಂದೇಶ ಬೈದಿತ್ತ್ಂಡ್. ಉಂದೆನ್ ಕಡಪುಡರೆ ಮೊಕುಲು ಅಲಂ ಅನ್ಸಾರಿ ಖಾನ್ ಅಂಚೆನೆ ಝುಬೈರ್ ಖಾನ್ ಐಎಸ್ಐ ಪನ್ಪಿ ಪುದರ್‌ಡ್ ಇ-ಮೇಲ್ ಮಲ್ದಿತ್ತೆರ್ ಪನ್ದ್ ಜಡ್ತೆಡ್ ತೆರಿದ್ ಬೈದ್ಂಡ್. ತಿಕ್ಕ್‌ದ್ ಬೂರಿನ ರಡ್ಡ್ ಜನಲಾ ತಿವಾರಿನ ಕಂಪೆನಿಡೇ ಬೆನ್ಪಿನಕುಲು.
ದೇವೇಂದ್ರ ತಿವಾರಿನ ಸೂಚನೆದ ಮಿತ್ತೇ ಎಂಕುಲು ನಕಲಿ ಖಾತೆ ಮಲ್ತ್ ಇಂಚಿನ ಬೊಲ್ಚಾವುನ ಇ-ಮೇಲ್ ಕಡಪುಡೊಂದಿತ್ತ ಪನ್ದ್ ಆರೋಪಿಲು ಪನ್ತೆರ್. ಇ-ಮೇಲ್ ಕಡಪುಡಿಬೊಕ್ಕ ತಿವಾರಿನ ಆದೇಶದ ಮಿತ್ತ್ ಎಂಕುಲು ಮೊಬೈಲ್ ನಾಶ ಮಲ್ಪರೆ ತೂಯ ಪನ್ದ್‌ಲಾ ಬಾಯಿ ಬುಡ್ತೆರ್.