ಕುಡ್ಲ ಲೋಕಸಭೆಗ್ ಅರುಣ್ ಪುತ್ತಿಲ ಸ್ಪರ್ಧೆ ಫಿಕ್ಸ್; ಬಿಜೆಪಿಗ್ ಉರ್ಲಾಪುಂಡಾ ಪುತ್ತಿಲ ಪರಿವಾರ?

Last updated on February 29th, 2024 at 04:05 pm

ಬಿಜೆಪಿ ಭದ್ರಕೋಟೆ ಪಂದೇ ಪುದರಾತಿನ ಕುಡ್ಲ ಲೋಕಸಭಾ ಕ್ಷೇತ್ರೊರ್ದು ಈ ಸರ್ತಿ ಬಿಜೆಪಿಗ್ ಬಂಡಾಯವಾದ್ ಹಿಂದೂ ಕಾರ್ಯಕರ್ತೆ ಅರುಣ್ ಕುಮಾರ್ ಪುತ್ತಿಲ ಕಲೊಕು ಜಪ್ಪೆರೆಗುಲ್ಲೆರ್ ಪಂದ್ ಪುತ್ತಿಲ ಪರಿವಾರೊದ ಅಧ್ಯಕ್ಷೆ ಪ್ರಸನ್ನ ಮಾರ್ತ ಅಧಿಕೃತವಾದ್ ಘೋಷಣೆ ಮಲ್ದೆರ್.

ಕುಡ್ಲ ಜಿಲ್ಲೆಡ್ ನಡಪುನ ಮಾತಾ ಚುನಾವಣೆಲೆಡ್ ಪುತ್ತಿಲ ಪರಿವಾರ ಸ್ಪರ್ಧೆ ಮನ್ಪುಂಡು. ನನ ಬರ್ಪಿನ ದಿನೊಕ್ಲೆಡ್ ನಡಪುನ ಲೋಕಸಭಾ ಚುನಾವಣೆಡ್ಲಾ ಬಿಜೆಪಿಗ್ ಬಂಡಾಯವಾದ್ ಅರುಣ್ ಪುತ್ತಿಲ ಸ್ಪರ್ಧೆ ಮನ್ಪೆರ್ ಪಂದ್ ಪುತ್ತಿಲ ಪರಿವಾರೊದ ಅಧ್ಯಕ್ಷೆ ಪ್ರಸನ್ನ ಮಾರ್ತ ಅಧಿಕೃತ ಘೋಷಣೆ ಮಲ್ದೆರ. ಅರುಣ್ ಪುತ್ತಿಲ ಮೆರೆನ್ ಬಿಜೆಪಿಗ್ ಸೇರ್ಪಾವೊನುನ ವಿಚಾರ ಪಲಿಪಂದಿನೆರ್ದಾವರ ಈ ನಿರ್ಧಾರೊನು ಗೆತೊಂದೆರ್. ಅರುಣ್ ಪುತ್ತಿಲ ಸ್ವತಂತ್ರವಾದ್ ಸ್ಪರ್ಧೆ ಮನ್ಪೆರ್.

ಪುತ್ತೂರ್‌ಡ್ ಸುದ್ದಿಗೋಷ್ಟಿ ಮಲ್ತ್‌ದ್ ಪಾತೆರ್ನ ಪುತ್ತಿಲ ಪರಿವಾರೊದ ಅಧ್ಯಕ್ಷೆ ಪ್ರಸನ್ನ ಮಾರ್ತ ಮೇರ್, ಅರುಣ್ ಪುತ್ತಿಲ ಬಿಜೆಪಿ ಗೋಡ್ಯುನ ಪುನೆಪು ಪಲಿಪಂದಿನೆರ್ದಾವರ ಈ ನಿರ್ಧಾರ ಗೆತೊಂದ. ಪಾಕ ಪಾತೆರಕತೆ ನಡತ್ಂಡಲಾ ಅರುಣ್ ಪುತ್ತಿಲ ಪಕ್ಷ ಸೇರುನ ವಿಫಲ ಆತ್ಂಡ್. ಇಂಚಿಪ್ಪೊಗಾತೆ ಅರುಣ್ ಪುತ್ತಿಲ ಮೇರ್ ಬಿಜೆಪಿ ರಾಜ್ಯಾಧ್ಯಕ್ಷೆ ವಿಜಯೇಂದ್ರೆರೆನ್ ಭೇಟಿಯಾದಿತ್ತೆರ್. ಆಂಡ, ಒವ್ವೇ ಕಂಡೀಷನ್‌ದಾಂತೆ ಪಕ್ಷ ಸೇರೆರೆ ಸೂಚನೆ ಕೊರ್ದಿತ್ತೆರ್. ಆಂಡ, ಪುತ್ತೂರು ಬಿಜೆಪಿ ಮಂಡಲ ಅಧ್ಯಕ್ಷೆರೆ ಸ್ಥಾನ ಕೊರೊಡೂಂದು ಪುತ್ತಿಲ ಕೇಂದಿತ್ತೆರ್. ಅವೆಕೊ ಒಪ್ಯಂದೇ ಪಕ್ಷ ಸೇರಿನೆರ್ದ್ ಬೊಕ್ಕ ಬಬದರಿ ಕೊರ್ಪುನ ಪಂದ್ ವಿಜಯೇಂದ್ರೆರ್ ಪಂದಿತ್ತೆರ್. ಆಂಡ, ಪಟ್ಟ್ ಬುಡಂದಿನ ಅರುಣ್ ಪುತ್ತಿಲ ಲೋಕಸಭಾ ಚುನಾವಣೆಡ್ ಬಂಡಾಯವಾದ್ ಸ್ಪರ್ಧೆ ಮನ್ಪುನ ಅಲೆಚನೆಡುಲ್ಲೆರ್ ಪಂದ್ ತೆರಿಪಾಯೆರ್.

ಇತ್ತೆನೇ ಬಿಜೆಪಿ ಪಕ್ಷೊದ ನಾಯಕೆರಾಯಿನ ಮಾಜಿ ಸಿಎಂ ಬಿ.ಎಸ್. ಯಡಿಯೂರಪ್ಪೆರ್, ಸಂತೋಷೆರ್ ಬೊಕ್ಕ ಬಿಜೆಪಿ ರಾಜ್ಯಾಧ್ಯಕ್ಷೆ ಬಿ.ವೈ. ವಿಜಯೇಂದ್ರೆರ್ ಅಂಚೆನೇ ಸ್ಥಳೀಯ ಜಿಲ್ಲಾಧ್ಯಕ್ಷೆ ಸತೀಶ್ ಕುಂಪಲ, ರಾಜ್ಯ ಸಂಘಟನಾ ಕಾರ್ಯದರ್ಶಿ ರಾಜೇಶ್ ಮೊಕಲೆಡ ಪಾತೆರಕತೆ ನಡತಿತ್ತ್ಂಡ್. ಮಾತೆರೆಡಲಾ ಅರುಣ್ ಪುತ್ತಿಲ ಬಿಜೆಪಿ ಸೇರುನೆಕ್ ಸಕಾರಾತ್ಮಕ ಸ್ಪಂದನೆ ತಿಕ್ಕ್‌ದಿತ್ತ್ಂಡ್. ಆಂಡ, ಇದಮುಟ್ಟ ಒವ್ವೇ ಗಟ್ಟಿ ನಿರ್ಧಾರೊನು ಅಕುಲು ಗೆತೊಂದಿಜ್ಜಂಡ್. ಅಂಚಾದ್, ಪುತ್ತಿಲ ಮೇರ್ ಲೋಕಸಭಾ ಚುನಾವಣೆಡ್ ಸ್ಪರ್ಧೆ ಮನ್ಪೆರೆಗುಲ್ಲೆರ್. ಬಿಜೆಪಿಗ್ ಸೇರ್ಂಡ್ ಬಹಿರಂಗವಾದ್ ಪುತ್ತೂರು ಮಂಡಲ ಅಧ್ಯಕ್ಷ ಸ್ಥಾನೊನು ಅರುಣ್ ಪುತ್ತಿಲೆರೆಗ್ ಕೊರೊಡೂಂದು ಬೇಡಿಕೆ ದೀದಿತ್ತ. ಒವ್ಲಾ ಪಲಿಪಂದಿನೆರ್ದಾವರ ಕಾರ್ಯಕರ್ತೆರೆ ಒತ್ತಾಸೆದ ಲೆಕ ಅರುಣ್ ಕುಮಾ‌ರ್ ಪುತ್ತಿಲ ಕಲೊಕು ಜಪ್ಪೆರೆಗುಲ್ಲೆರ್ ಪಂದ್ ಪಂಡೆರ್.