Last updated on February 15th, 2024 at 10:17 am
ಕುಡ್ಲ: ಕುಡ್ಲಡ್ ಫ್ಲ್ಯಾಟ್ ದೆಪ್ಪಾದ್ ಕೊರ್ಪೆ ಪಂಡ್‌ದ್ 60 ಲಕ್ಷ ರೂಪಾಯಿ ದಗೆ ಮಲ್ತಿನ ಬಿಲ್ಡರ್ ಸೇರ್ಜ್ ಮೂವೆರೆಗ್ 2 ವರ್ಷ ಕರ್ಪಿಲ್ಲ ಶಿಕ್ಷೆ ಅಂಚೆನೇ 5 ಸಾರ ರೂಪಾಯಿ ದಂಡ ಪಾಡ್ದ್ ದ.ಕ.ಜಿಲ್ಲಾ ಗ್ರಾಹಕ ವ್ಯಾಜ್ಯೊಲೆನ ಪರಿಹಾರ ಆಯೋಗ ಆದೇಶ ಕೊರ್ತುಂಡು.
ಕುಡ್ಲದ ಎಂ.ಕೆ. ಬಿಲ್ಡರ್ ಪಾರ್ಟ್ನರ್ ಕೃಷ್ಣರಾಜ ಮಯ್ಯ(49), ಕದ್ರಿ ಕಂಬುಲ ಕ್ರಾಸ್‌ ರೋಡ್ ನಿವಾಸಿಲಾಯಿನ ರಾಮಚಂದ್ರ ಕೆ.ಎಸ್.(71), ಮಯೂ‌ರ್ ಆ‌ರ್.ಎಸ್.(34) ಆರೋಪಿಲು ಪಂದ್ ತೆರಿದ್‌ಬೈದ್ಂಡ್.
ಆರೋಪಿಲು ಫ್ಲ್ಯಾಟ್ ದೆಪ್ಪಾದ್ ಕೊರ್ಪ ಪಂದ್ ನಂಬಾದ್ 79ವರ್ಷೊದ ಪದ್ಮನಾಭ ರಾವ್ ಪನ್ಪಿನಾರೆಡ 60ಲಕ್ಷ ರೂ. ಗೆತೊಂದು ಫ್ಲ್ಯಾಟ್ ಕೊರಂದೆ ದಗೆ ಮಲ್ದೆರ್. ಈ ಬಗೆಟ್ ಸಂತ್ರಸ್ತೆ ಪದ್ಮನಾಭ ರಾವ್ ಮೇರ್ ದ.ಕ.ಜಿಲ್ಲಾ ಗ್ರಾಹಕ ವ್ಯಾಜ್ಯೊಲೆನ ಪರಿಹಾರ ಆಯೋಗೊಗು ಒಯಿಲ್ ಕೊರ್ತೆರ್.
ಒಯಿಲ್‌ದ ಪರಿಶೀಲನೆ ಮಲ್ತಿನ ಗ್ರಾಹಕ ವ್ಯಾಜ್ಯೊಲೆನ ಪರಿಹಾರ ಆಯೋಗ 2023ತ ಮಾರ್ಚ್ 31 ತ ಉಲಯಿ 60 ಲಕ್ಷ ರೂ. ಕಾಸ್‌ನ್ ದೂರುದಾರೆರೆಗ್ ಪಿರ ಕೊರೊಡು ಪಂದ್ ಆದೇಶ ಕೊರ್ದಿತ್ತ್ಂಡ್. ಆಂಡಲಾ ಆರೋಪಿಲು ಪರಿಹಾರೊದ ಕಾಸ್ ಕೊರಂದೆ ಇಪ್ಪುನಗ ಅರ್ಜಿದಾರೆರ್ ಕುಡ ಗ್ರಾಹಕ ವ್ಯಾಜ್ಯೊಲೆನ ಪರಿಹಾರ ಆಯೋಗೊಗು ಪೋತೆರ್. ಒಯಿಲ್‌ನ್ ಪರಿಶೀಲಿತಿನ ಗ್ರಾಹಕ ವ್ಯಾಜ್ಯೊಲೆನ ಪರಿಹಾರ ಆಯೋಗ ಮೂವೆರ್ ಆರೋಪಿಲೆಗ್ 2 ವರ್ಷ ಕರ್ಪಿಲ್ಲ ಶಿಕ್ಷೆ ಅಂಚೆನೇ 5000 ರೂ. ದಂಡ ಪಾಡ್ದ್ಂಡ್. ದಂಡ ಕಟ್ಟಿಜೆರ್ನ್ಡ ಕುಡ ಆಜಿ ತಿಂಗೊಲು ಕರ್ಪಿಲ್ಲ ಶಿಕ್ಷೆ ಎಚ್ಚ ಮನ್ಪುನೆತ ತೀರ್ಪು ಕೊರ್ತುಂಡು.