ಗೋ ಬ್ಯಾಕ್ ಅಭಿಯಾನೊರ್ದು ಎಂಕ್ ಅನುಕೂಲ ಆತ್ಂಡ್ : ಶೋಭಾ ಕರಂದ್ಲಾಜೆ

Last updated on March 10th, 2024 at 06:53 am

ಒಡಿಪು-ಚಿಕ್ಕಮಗಳೂರು ಕ್ಷೇತ್ರೊಡು ಎಂಕ್ ಟಿಕೆಟ್ ಕೊರಿಯರೆ ಬಲ್ಲಿ ಪನ್ದ್ ಕೆಲವೆರ್ ಅಭಿಯಾನ ಮಲ್ತಿನೆರ್ದ್ ಎಂಕ್ ಅನುಕೂಲ ಆತ್ಂಡ್. ಯಾಪ ವಿರೋಧ ಬರ್ಪುಂಡಾ ಅಪಗ ನಾಯಕೆರ್ ನಮ್ಮ ಬಗೆಟ್ ಮಾಯಿತಿ ದೆಪ್ಪುವೆರ್. ಅಪಗ ಅಕಲೆಗ್ಲಾ ಸತ್ಯ ತೆರಿಯುಂಡು ಪನ್ದ್ ಶೋಭಾ ಕರಂದ್ಲಾಜೆ ಪನ್ಡೆರ್.

ನಮ್ಮ ವ್ಯಕ್ತಿತ್ವ ದಾದ? ನಮ ಮಲ್ದಿನ ಅಭಿವೃದ್ದಿ ಬೇಲೆಲು ದಾದ ಪನ್ದ್ ಅಕಲೆಗ್ ಗೊತ್ತಾಪುಂಡು. ಹೈಕಮಾಂಡ್ ಬಗೆಟ್ ಎಂಕ್ ನಂಬೊಲಿಗೆ ಉಂಡು. ಯಾನ್ ಮಲ್ದಿನ ಬೇಲೆದ ಲೆಕ್ಕೊಡು ಎಂಕ್ ನನೊರ ಟಿಕೆಟ್ ತಿಕ್ಕುಂಡು ಪನ್ದ್ ಪನ್ಡೆರ್. ಏರೆಗ್ ಟಿಕೆಟ್ ತಿಕ್ಕುಂಡು ತಿಕ್ಕುಜಿ ಪನ್ದ್ ಏರೆಗ್ಲಾ ತೆರಿದಿಜ್ಜಿ. ಹಾಲಿ ಸಂಸದೆರೆಗ್ ಟಿಕೆಟ್ ತಿಕ್ಕುಜಿ ಪನ್ದ್ ಮಾದ್ಯಮೊಲೆಡ್ ಪನೊಂದುಲ್ಲೆರ್ ಆಂಡ ಈ ಬಗೆಟ್ ಹೈಕಮಾಂಡ್ ಆವಡ್, ಪ್ರಧಾನಿಲು ಆವಡ್ ಪನ್ತಿಜೆರ್. ಪ್ರಧಾನಿ ಮೋದಿ ಅಂಚೆನೆ ಎಂಕ್ಲೆನ ಕೇಂರೇದ ಚುನಾವಣಾ ಮಂಡಳಿ ಎರೆಗ್ ಒಲ್ಪ ಟಿಕೆಟ್ ತಿಕ್ಕೊಡು ಪನ್ದ್ ನಿರ್ದಾರ ಮಲ್ಪುಂಡು ಪನ್ದ್ ಪನ್ಡೆರ್.