Last updated on March 14th, 2024 at 08:37 am
ಬೊಲ್ತೇರ್: ಸೆಕೆಂಡ್ ಪಿಯುಸಿ ಇಂಗ್ಲಿಷ್ ಪರೀಕ್ಷೆ ಬುಧವಾರ ನಡತಿತ್ತ್‌ದ್, ಉಂದು ಮಾತಾ ಜೋಕುಲೆಗ್ ಕಾಮನ್ ಸಬ್ಜೆಕ್ಟ್ ಆಯಿನೆರ್ದಾವರ ಪರೀಕ್ಷಾ ಕೇಂದ್ರೊಲೆಗ್ ಪೋಪಿನ ಜೋಕುಲು ಎಚ್ಚಿಗೆ ಬಸ್‌ ವ್ಯವಸ್ಥೆದಾಂತಿನೆರ್ದಾವರ ಪರಡೊಡಾದ್ ಬತ್ತ್ಂಡ್.
ವಿದ್ಯಾರ್ಥಿಲು ಕಲ್ಪುನ ಕಾಲೇಜಿಲೆಡ್ ಪರೀಕ್ಷಾ ಕೇಂದ್ರೊಲು ಇತ್ತ್ಂಗಲಾ ಶಿಕ್ಷಣ ಇಲಾಖೆ ಬೊಕ್ಕ ಸರ್ಕಾರ ನೆಯ್ದಿನ ನಿಯಮೊದ ಪ್ರಕಾರ ಅಕುಲೆಗ್ ಅಲ್ಪ ಪರೀಕ್ಷೆಗ್ ಅವಕಾಶ ಕೊರಂದೆ ಬೇತೆ ಕಾಲೇಜಿಲೆಡ್ ಪರೀಕ್ಷೆ ಬರೆಪುನ ಅನಿವಾರ್ಯ ಉಂಡು.
ಉಜಿರೆ, ಮುಂಡಾಜೆ, ಕಕ್ಕಿಂಜೆ, ಚಾರ್ಮಾಡಿ, ದಿಡುಪೆ ಇಂಚಿದ ವಿದ್ಯಾರ್ಥಿಲು ಬೊಲ್ತೇರ್, ಪುಂಜಾಲಕಟ್ಟೆದ ಕಾಲೇಜ್‌ಲೆಡ್ ಪರೀಕ್ಷೆ ಬರೆಯೆರ್ನ್ಡ, ಆ ಭಾಗೊದ ವಿದ್ಯಾರ್ಥಿಲು ಈ ಭಾಗೊದ ಕಾಲೇಜ್‌ಲೆಡ್ ಪರೀಕ್ಷೆ ಬರೆಯೊಡು. ಅಂಚಾದ್ ಭಾರೀ ಸಂಖ್ಯೆದ ವಿದ್ಯಾರ್ಥಿಲು ಇತ್ತೆರ್.
ಪರೀಕ್ಷಾ ಕೇಂದ್ರೊಲೆನ್ ಪಗತ್ಂಡಲಾ ಅಡೆಗ್ ಪೋಪಿನ ವಿದ್ಯಾರ್ಥಿಲೆಗ್ ಎಚ್ಚಿಗೆ ಬಸ್‌ ವ್ಯವಸ್ಥೆ ಮಲ್ದಿಜೆರ್. ಕುಡೊಂಜಿ ಕಡೆಟ್ ಶಿರಾಡಿ ಘಾಟಿಡ್ ಗ್ಯಾಸ್‌ ಟ್ಯಾಂಕರ್‌ ಬೂರ್ದಿನೆರ್ದಾವರ ಆ ಮೆಯಿತ ಬಸ್ಲು ಬರೊಂದಿತ್ತಿಜ. ಈ ಮಾತಾ ನೆವನೊಲೆರ್ದಾವರ ವಿದ್ಯಾರ್ಥಿಲು ಬಾರಿ ಬಂಙ ಬರೊಡಾದ್ ಬತ್ತ್ಂಡ್.
ತಾಲೂಕ್‌ದ ಎಚ್ಚಿನ ಕಾಲೇಜಿಲು ಪೇಂಟೆ ಪ್ರದೇಶೊದ ಪಿದಯಿ ಇಪ್ಪುನೆರ್ದಾವರ ಎಚ್ಚಿನ ಕಡೆಟ್ ಎಕ್ಸ್‌ಪ್ರೆಸ್ ಬಸ್ಲು ಉಂತುಜ. ಅಂಚಾದ್ ವಿದ್ಯಾರ್ಥಿಲೆಗ್ ಲೋಕಲ್‌ ಬಸ್‌ಲೇ ಆಧಾರ. ಈ ಬಸ್ಲು ಪಿದಡುನಲ್ಪರ್ದೇ ದಿಂಜಿದ್ ತಮೆಲುನಾತ್ ಜನ ಇತ್ತ್‌ದ್ ಬರ್ತೆರೆ ಆವಂದಿನಾತ್ ಜನ ಇಪ್ಪೆದ್ಂಡ್.
ಉಜಿರೆ ಪೇಂಟೆಡ್ ಅಂಚೆನೇ ಬೊಲ್ತೇರ್ ಬಸ್‌ ಉಂತಡೆಡ್ ಬುಧವಾರ ಕಾಂಡೆ 9ದ ಅಂದಾಜಿಗ್ ಪಾಕ ವಿದ್ಯಾರ್ಥಿಲು ಬಸ್‌ಗ್ ಕಾಪುನ ತೋಜಿದ್ ಬತ್ತ್ಂಡ್. ಉಂದು ನಿಚ್ಚೊಲ ಪೋಪಿನ ಪ್ರಯಾಣಿಕೆರೆಗ್ಲಾ ಉಪದ್ರ ಆಂಡ್.
ಕಾತ್ ಕಾತ್‌ದ್ ಬಚ್ಚಿನ ಎಚ್ಚಿನ ಜೋಕುಲು ಪರೀಕ್ಷಾ ಕೇಂದ್ರೊಗು ಪೊರ್ತುಗು ಎತ್ತೆರ ಬಾಡಾಯಿದ ಗಾಡಿಲೆಗ್ ಎಚ್ಚ್ ಕಾಸ್ ಕೊರ್ದು ಪೋತೆರ್. ಪೊಸ ಪೊಸ ನಿಯಮೊಲೆನ್ ಕನತ್‌ದ್ ವಿದ್ಯಾರ್ಥಿಲೆಗ್ ಉಪದ್ರ ಕೊರೊಂದುಪ್ಪುನ ಇಲಾಖೆ ನಿಯಮೊಲೆನ್ ಮನ್ಪುನಗ ಅವೆಕ್ ಬೋಡಾಪಿನ ಅಗತ್ಯ ವ್ಯವಸ್ಥೆಲೆನಂಚಿ ತೂಪಿನ ಅಗತ್ಯ ಉಂಡು ಪಂದ್ ಜೋಕುಲು ಅಂಚೆನೇ ಪೋಷಕೆರ್ ಆಗ್ರಹ ಮಲ್ದೆರ್.