Last updated on April 22nd, 2024 at 07:46 am
ಬಂಟ್ವಾಳ: ಇಲ್ಲದುಲಯಿ ಅಕ್ರಮವಾದ್ ಪೊಗ್ಗಿನ ಮೂವೆರೆ ಕೂಟ ಇಲ್ಲಡಿತ್ತಿನಕಲೆನ ಮಿತ್ತ್ ಹಲ್ಲೆ ಮಲ್ತ್‌ದ್, ನೆರ್ದ್, ಜೀವಬೆದರಿಕೆ ಪಾಡ್ದಿನ ನಡಕೆ ಬಿ.ಸಿ.ರೋಡ್ ಮುಟ್ಟದ ಕೈಕಂಬ- ಮದ್ದ ಪನ್ಪಿನಲ್ಪ ಶನಿವಾರ ನಡತಿನ ಬಗೆಟ್ ಬಂಟ್ವಾಳ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಕೈಕಂಬ ಪರ್ಲಿಯಾ ನರ್ಸಿಂಗ್ ಹೋಂ ಮುಟ್ಟದ ಆಶಾಷ್ ಮ್ಯಾನ್ಶನ್ ನಿವಾಸಿ ಮಹಮ್ಮದ್ ಶಂಶೀರ್ (29) ಪನ್ಪಿನಾರ್ ಈ ಬಗೆಟ್ ಪೊಲೀಸೆರೆಗ್ ಒಯಿಲ್ ಕೊರ್ದಿತ್ತ್‌ದ್, ಆರೋಪಿಲಾಯಿನ ಬಿ.ಸಿ.ರೋಡ್ ಮುಟ್ಟದ ತಲಪಾಡಿ ನಿವಾಸಿಲಾಯಿನ ಝಕಾರಿಯಾ, ಅಬೂಬಕ್ಕರ್ ಸಂಹಾನ್ ಎ. ಎಚ್. ಬೊಕ್ಕ ಹೈದರ್ ಆಲಿ ಎ. ಎಚ್. ಪನ್ಪಿನಕುಲು ಶನಿವಾರ ಕಾಂಡೆ ಇಲ್ಲಗ್ ಬತ್ತ್‌ದ್, ಬಾಕಿಲ್‌ನ್ ಜೋರ್ ಬೊಟ್ಟುದು, ಪೆದಂಬು ನೆರ್ದ್, ಜೂವ ದೆಪ್ಪುನ ಬಗೆಟ್ ಪೋಡಿಪಾದೆರ್.
ಪಿರ ಆನಿ ರಾತ್ರೆ ಆರೋಪಿ ಝಕಾರಿಯಾ ಕುಡ ಶಂಶೀರ್ ಮೆರೆನ ಇಲ್ಲಗ್ ಅಕ್ರಮವಾದ್ ಪೊಗ್ಗುದ್ ಅಮ್ಮೆರೆಗ್ ಅಂಚೆನೇ ಶಂಶೀರ್ ಮೆರೆಗ್ ಹಲ್ಲೆ ಮಲ್ದೆರ್. ನಡುಕು ಬತ್ತಿನ ಶಂಶೀರ್‌ನ ಅಪ್ಪೆನ್ ನೂಕುದ್ ಪಾಡ್ದೆರ್. ಈ ಪೊರ್ತುಡು ಶಂಶೀರ್ ಜೂವ ಒರಿತೊನೆರೆ ಅಡ್ಪಿಲ್ಲ್‌ರ್ದ್ ಮಸಾಲೆ ಪೊಡಿ ಕನತ್‌ದ್ ಝಕಾರಿಯಾನ ಮೋನೆಗ್ ದಕ್ಕ್‌ದೆರ್.
ಹಲ್ಲೆರ್ದಾವರ ಪೆಟ್ಟಾತಿನ ಶಂಶೀರ್ ಮೇರ್ ಬಂಟ್ವಾಳ ಸರಕಾರಿ ಆಸ್ಪತ್ರೆಗ್ ದಾಕಲಿತೆರ್. ಈ ಬಗೆಟ್ ಬಂಟ್ವಾಳ ನಗರ ಠಾಣೆಡ್ ಅಪರಾಧ ಕ್ರಮಾಂಕ 76/2024 ಕಲಂ 323, 324, 504, 506, 448 ಅಂಚೆನೇ 34 ಐಪಿಸಿದ ಪ್ರಕರಣ ದಾಕಲಾದಿತ್ತ್‌ದ್, ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.