Last updated on April 24th, 2024 at 03:32 pm
ಕುಡ್ಲ: ತುಳುನಾಡ್ ದೈವ-ದೇವೆರೆ ಬೂಡು, ಸತ್ಯ, ಧರ್ಮ, ನಿಷ್ಠೆಲೇ ಈ ಮಣ್ಣ್‌ದ ಅಸ್ಮಿತೆ. ಸಾನ-ದೇವಲ್ಯೊಲು ಇಪ್ಪುನ ಈ ನಾಡ್‌ಡ್ ಒರಿಯೊಗರಿಯನ ಪಗೆ, ಅಧರ್ಮೊನು ಉಂತಾದ್, ಸತ್ಯ ಧರ್ಮ, ಸೌಹಾರ್ದೊಗು ಗೆಲ್ಮೆ ತಿಕ್ಕೊಡು. ಪಾಪದಕುಲು, ಪಿರ ಒರಿದಿನಕುಲೆನ ಧ್ವನಿಯಾದಿತ್ತಿನ ಎಂಕ್ ಆತಿನ ಬೇನೆ, ಅನ್ಯಾಯ ಬೇತೆ ಏರೆಗ್ಲಾ ಆಪಿನ ಬೊರ್ಚಿ. ಐಕ್ ಬೋಡಾದ್ ಎನ್ನ ಜೀವಿತಾವಧಿಡೇ ಎನ್ನನೇ ಚಿಂತನೆದ ಶಿಷ್ಯೆ ಪದ್ಮರಾಜ್‌‌ನ ಗೆಲ್ಮೆನ್ ಕಣ್ಣಾರೆ ತೂಪಿನಾಸೆ ಎನ್ನ ಪಂದ್ ಕೇಂದ್ರೊದ ಮಾಜಿ ಸಚಿವೆರ್ ಬಿ. ಜನಾರ್ದನ ಪೂಜಾರ್ಲು ಪಂಡೆರ್.
ಧಾರ್ಮಿಕ, ಬೀಚ್‌, ಪ್ರವಾಸೋದ್ಯಮೊದ ನೈಸರ್ಗಿಕ ಸೌಂದರ್ಯದ ಈ ನಾಡ್ ಬುಲೆಚ್ಚಿಲ್‌ಡ್ ರಾಜ್ಯೊಡೇ ಮಾತೆರೆರ್ದ್ ದುಂಬು ಇಪ್ಪೊಡಾಂಡ್. ಆಂಡ ಮುಲ್ಪ ಧರ್ಮ ಮಾತೆನ್ಲಾ ಪುಡತ್ ಪಾಡ್ದ್ಂಡ್. ನನಲಾ ಪೊರ್ತಾತಿಜಿ. ಈ ಜಿಲ್ಲೆಗ್ ಪತ್ತ್‌ದಿನ ಕೋಮು ಸೂಕ್ಷ್ಮ ಪ್ರದೇಶ ಪನ್ಪಿ ಪುದರ್ ಪೌವೊಡು. ಅಧರ್ಮೊದ ಅಪಪ್ರಚಾರೊನು ದೊಂಕುದು ಉಂತುದು, ಜನೊಕುಲು ಸತ್ಯ-ಧರ್ಮೊನು ಗೆಂದಾವೊಡು. ಪದ್ಮರಾಜ್‌‌ನ ಗೆಲ್ಮೆದ ಮುಕೇನ ಯು. ಶ್ರೀನಿವಾಸ ಮಲ್ಯೆರ್ ಅಂಚೆನೇ ಈ ನಾಡ್‌ದ ಜನೊಕ್ಲೆನ ಬುಲೆಚ್ಚಿಲ್‌ದ ಕನೊಕು ಚೈತನ್ಯ ತಿಕ್ಕಡ್ ಪಂದ್ ಆರ್ ಪಂಡೆರ್.
ಜವನೆರ್ ಎಚ್ಚ ಇಪ್ಪೂನ ವಿಶ್ವೊಡೇ ಪೊಲಿದಿಂಜಿ ದೇಶ ನಮ್ಮವು. ಆಂಡ ಕೋಮು ಸಂಘರ್ಷೊದ ಪುದರ್‌ಡ್ ಜವನೆರೆ ಬಲಿಯಾವೊಂದುಂಡು. ನೆಕ್ಕ್ ಮಾತಾ ತಿಲಾಂಜಲಿ ದೀಪಿನ ಬೇಲೆ ಈ ಸರ್ತಿದ ಓಟುಡು ಆವೊಡು ಪಂದ್ ಪಂಡೆರ್.
ಪದ್ಮರಾಜ್‌ ಧಾರ್ಮಿಕ ಕ್ಷೇತ್ರದ ಅನುಭವಿ ನಾಯಕ.
ಹಿಂದೂ ಪಂಡ ಮಾನವ, ಮಾನವೀಯತೆದ ಧರ್ಮ. ಮಾನವೀಯತೆರ್ದ್ ಮಲ್ಲ ಧರ್ಮ ಇಜ್ಜಿ. ಕುಡ್ಲ ಕಾಂಗ್ರೆಸ್‌ ಅಭ್ಯರ್ಥಿ ಆದಿಪ್ಪುನ ಪದ್ಮರಾಜ್‌ ಅವೆನ್ ಎಡ್ಡೆಡ್ ಪಾಲನೆ ಮಲ್ತೊಂದುಲ್ಲೆರ್. ದೈವಸ್ಥಾನ-ದೇವಸ್ಥಾನ, ಧಾರ್ಮಿಕ ಕ್ಷೇತ್ರೊಡು ಬೆನ್ತಿನ ಅನುಭವ ಆರೆಗ್ ಉಂಡು ಪಂದ್ ಪಂಡೆರ್.