Last updated on May 25th, 2024 at 01:04 pm
ಒಡಿಪು ಜಿಲ್ಲೆದ ಕಾಪುಡ್ ಸಿನಿಮಾದ ಲೆಕ ರಡ್ಡ್ ಕೂಟೊಲೆನ ನಡುಟು ನಡತಿನ ಗ್ಯಾಂಗ್ ವಾರ್‌ದ ಪೋಡಿಗೆಕಟ್ಟಾವುನಂಚಿನ ದೃಶ್ಯೊಲು ಸಾಮಾಜಿಕ ಬಲೆತ್ತಾನೊಡು ವೈರಲ್ ಆವೊಂದಿತ್ತ್‌ದ್, ತೂಯಿನಕುಲು ಅಲ್ಕ್‌ದ್ ಬೂರೊಂದುಲ್ಲೆರ್. ರಾತ್ರೆ ರಡ್ಡ್ ಕೂಟೊಲೆನ ರೌಡಿಲು ಮಾರಾಕಾಸ್ತ್ರೊಲೆನ್ ಕೈಟ್ ಪತೊಂದು ತಾದಿಡ್ ಕೊಲಲ ಮಲ್ತೊನುನ ದೃಶ್ಯೊ ತಿಗಲೆ ನರ್ಗಾವೊಂದುಂಡು. ಮುಸ್ಲಿಂ ಸಮುದಾಯೊಗು ಸೇರ್ದಿನ ರಡ್ಡ್ ಗ್ಯಾಂಗ್‌ಲೆನ ನಡುಟು ಈ ಕೊಲಲ ನಡತ್‌ದ್ಂಡ್.
ಒಡಿಪು ಪೇಂಟೆದ ಕುಂಜಿಬೊಟ್ಟು ತಾದಿಡ್ ಮೇ 18ದ ರಾತ್ರೆ ಈ ಪೆಟ್ಟ್ ನಡತ್‌ದ್ಂಡ್. ತಾದಿದ ಆಮೆಯಿತ ಕಟ್ವಾನೊದ ಮಾಲಿಗೆರ್ದ್ ಒರಿ ಈ ನಡಕೆದ ವಿಡಿಯೋ ಮಲ್ದೆರ್. ರಡ್ಡ್ ಗ್ಯಾಂಗ್‌ಲು ರಡ್ಡ್ ಬೇತೆ ಬೇತೆ ಕಾರ್‌ಲೆಡ್ ಬತ್ತಿತ್ತ್‌ದ್, ವಿಡಿಯೋದ ಸುರುಟೇ ಕಾರ್‌ಲು ಬೋಡುಬೋಡೂಂದೆ ಎಡ್ತೊಂದ. ಈ ಪೊರ್ತುಡು ರಡ್ಡ್ ಕಾರ್‌ರ್ದ್‌ಲಾ ಮಾರಾಕಾಸ್ತ್ರ ಪತೊಂದು ಜತ್ತಿನ ರೌಡಿ ಪಡೆ ಕೆಲ ನಿಮಿಷ ಮುಟ್ಟ ಆಕೊಂದು ಕಡ್ತೊಂದು ಕೊಲಲ ಮಲ್ದೆರ್, ಕಾರ್‌ಲೆನ ಮಿತ್ತ್ ದಾಳಿ ಮಲ್ದೆರ್.
ಈ ಪೊರ್ತುಡು ತಾದಿಡ್ ಪೆಟ್ಟ್ ಮಲ್ತೊಂದಿತ್ತಿನ ಒರಿ ರೌಡಿಗ್ ಕುಡೊಂಜಿ ಗ್ಯಾಂಗ್‌ದ ಕಾರ್ ಎಡ್ತ್‌ದ್ಂಡ್. ಎಡ್ತಿನ ಪೆಟ್ಟ್‌ಗ್ ಆಯೆ ಅಲ್ಪನೇ ಬೂರುದ್ ಮತಿ ಕಡಿದ್ಂಡ್. ಆಯನ್ ಕಾತೊನೆರೆ ಅಂಚೆನೇ ತನ್ಕುಲೆ ಕಾರ್‌ಗ್ ಬರ್ತಾವೊನೆರ ರಡ್ಡ್ ಕೂಟೊಲೆನ ನಡುಟು ಒಂತೆ ಪೊರ್ತು ಪಿರ ಪೆಟ್ಟ್ ನಡತ್‌ದ್ಂಡ್. ತಾದಿಡ್ ಒಂತೆ ಪೊರ್ತು ರಡ್ಡ್ ಕಾರ್‌ಲುಲಾ ತಾರಾಮರ ಅಂಚಿಂಚಿ ಪೋವೊಂದಿತ್ತ.
ನಡಕೆದ ವಿಡಿಯೋ ವೈರಲ್ ಆವೊಂದಿತ್ತಿಲೆಕನೇ, ಒಡಿಪು ಪೇಂಟೆ ಸ್ಟೇಶನ್‌ಡ್ ರಡ್ಡ್ ಕೂಟೊಲೆನ ಮಿತ್ತ್‌ಲಾ ಪ್ರಕರಣ ದಾಕಲ್ತೊಂದೆರ್. ರಡ್ಡ್ ಕೂಟೊಲೆನ ಪದುಕೆರೆನ್ಲಾ ಕೈದ್ ಮಲ್ದಿನ ಪೊಲೀಸೆರ್ ಆರೋಪಿಲೆನ್ ನ್ಯಾಯಂತಡೆಗ್ ಹಾಜಿರಿ ಮಲ್ದೆರ್. ಕಾರ್ ಮಾರುನ ಇಸಯೊಗು ಸಂಬಂಧಿತ್‌ದ್ ಮುಸ್ಲಿಂ ಸಮುದಾಯೊದ ಗ್ಯಾಂಗ್‌ಲೆನ ನಡುಟು ಈ ಗ್ಯಾಂಗ್ ವಾರ್ ನಡತ್‌ದ್ಂಡ್ ಪಂದ್ ಜನ ಪಾತೆರೊಂದುಲ್ಲೆರ್.