ಎಂಕ್ಲೆಗ್ ಬಸ್‌ ಬೋಡೇ ಬೋಡು: ಎಂಕ್ಲೆನ ಊರ್‌ಗ್ ಬಸ್‌ ದಾಯೆ ಬರ್ಪುಜಿ? – ಈದು, ನೂರಾಲ್‌ಬೊಟ್ಟು ಜೋಕ್ಲೆನ ಬುಲಿಪು

Last updated on June 16th, 2024 at 08:01 am

ಕೃಪೆ: ಉದಯವಾಣಿ

ಕಾರ್ಲ: ಜಪಾನ್‌ ದೇಶೊಡು ಒಂಜಿ ವಿದ್ಯಾರ್ಥಿಗ್ ಬೋಡಾದ್ ನಿಚ್ಚೊಲಾ ಒಂಜಿ ರೈಲ್‌ನೇ ಬಲಿಪಾವೆರ್ ಪಂದ್ ಪನ್ಪೆರ್. ಎಂಕ್ಲೆನ ಊರ್‌ಡ್ 500ರ್ದ್‌ಲಾ ಎಚ್ಚ ಜೋಕುಲು ಉಲ್ಲೆರ್. ಆಂಡ ಒಂಜೇ ಒಂಜಿ ಬಸ್‌ ದಾಯೆ ಬರ್ಪುಜಿ?-ಇಂಚ ಕೇಂದಿನ ಕಾರ್ಲ ತಾಲೂಕ್‌ದ ಈದು, ನೂರಾಲ್‌ಬೊಟ್ಟು ಭಾಗೊದ ಒರ್ತಿ ವಿದ್ಯಾರ್ಥಿನಿ. ಇಡೆಗ್ ಸರಕಾರಿ ಬುಡ್ಲೆ, ಖಾಸಗಿ ಬಸ್‌‌ಲ್ಲಾ ತರೆ ಪಾಡೊಂದಿಜ್ಜ.

ಅಂಚಾದ್ ವಿದ್ಯಾರ್ಥಿಲು ಕಮ್ಮಿಡ್ ಐನೆರ್ದ್, ಏಳೆಣ್ಮ ಕಿ.ಮೀ. ನಡತೊಂದೇ ಪ್ರಧಾನ ಸಾದಿಗ್ ಪಂಡ ಕುಡುಮ-ಕಾರ್ಲ ಪೆರ್ಸಾದಿದ ಪೊಸ್ಮಾರ್‌‌ದಲ್ತ ನೂರಾಲ್‌ಬೊಟ್ಟು ಕ್ರಾಸ್‌ಗ್ ಬತ್ತ್‌ದ್ ಬಸ್‌ ಪತೊನೊಡು.

ಈದು ಬೊಕ್ಕ ನೂರಾಲ್‌ಬೊಟ್ಟು ಹೊಸ್ಮಾರ್‌ಗ್ ಮುಟ್ಟದ, ತಾಲೂಕು ಕೇಂದ್ರೊರ್ದ್ ದೂರ ಇಪ್ಟುನ ಊರುಲು. ಇಡೆಗ್ ಪತ್ತ್ ವರ್ಸೊಗು ದುಂಬು ರಡ್ಡ್ ಖಾಸಗಿ ಬಸ್‌‌ಲು ಇತ್ತ. ಕಾಂಡೆ 7.30ಕ್ಕ್ ಕೂಷ್ಮಾಂಡಿನಿ ಬಸ್‌, 8 ಗಂಟೆಗ್ ಬಳ್ಳಾಲ್‌ ಬಸ್‌ ಇತ್ತ್ಂಡ್. ಉಂದೆರ್ದಾವರ ಈ ಭಾಗೊದ ಜೋಕುಲು ಬಸ್‌ಡ್ ಶಾಲೆ ಕಾಲೇಜು ಪೋವೊಂದಿತ್ತೆರ್. ಬೊಕ್ಕ ಈ ರಡ್ಡ್ ಬಸ್‌‌ಲುಲಾ ಸಾದಿ ಸಮ ಇಜ್ಜಿ ಪಂದ್ ಬಲಿಪುನ ಉಂತಾದಿತ್ತ. ಇತ್ತೆ ಸಾದಿ ಸಮ ಇತ್ತ್ಂಡಲಾ ವಾ ಬಸ್‌ಲಾ ಈ ಭಾಗೊಗು ಬರೊಂದಿಜ್ಜಿ. ಬಸ್‌ ಇಜ್ಜಂದಿನೆರ್ದಾವರ ನಡತೊಂದು, ರಿಕ್ಷಾಡ್, ಜೀಪ್, ಸ್ಕೂಟರ್‌ ಬೈಕ್‌‌ಲೇ ಗತಿ ಮೊಕ್ಲೆಗ್. ಕೆಲ ಜೋಕುಲು ಸೈಕಲ್‌‌ಡ್ ಶಾಲೆಗ್ ಪೋಪ.

ಒಂಜಿ ನಿಮಿಷ ಕಡೆಸ್ಂಡಲಾ ಬಸ್‌, ಕ್ಲಾಸ್ ಮಿಸ್‌

ಬಸ್‌ದಾಂತಿನ ಊರ್ ಪನ್ಪಿ ಪುದರಿತ್ತಿನ ಈ ಗ್ರಾಮೀಣ ಭಾಗೊದ ಜೋಕುಲೆಗ್ ರಿಕ್ಷಾ, ಜೀಪ್ ಅತ್ತ್ಂಡ ಬೇತೆ ಖಾಸಗಿ ಗಾಡಿಲೇ ತಾಂಗ್. ಸರ್ವಿಸ್‌ ಗಾಡಿಲೆರ್ದಾವರ ಮುಲ್ಪ ಬದ್‌ಕ್ ಸಾಗೊಂದುಂಡು. ಕಾಂಡೆ 9 ಗಂಟೆ ಮುಟ್ಟ ಸರ್ವಿಸ್‌ ಗಾಡಿಲು ಇಪ್ಪುವ. ಬಯ್ಯಡ್‌ಲಾ ಇಪ್ಪುಂಡು. ಕೆಲ ಜೋಕುಲು ಸರ್ವಿಸ್ ಗಾಡಿಲೆಡ್ ಪೆರ್ಸಾದಿದ ಬರಿಕ್ ಬರ್ಪೆರ್. ಆಂಡ, ಕೆಲವೆರ್ ಕಾಸ್‌ದ ಬಂಙೊರ್ದಾವರ ನಡತೊಂದೆ ಬರ್ಪೆರ್. ಕಾಂಡೆಕಾಂಡೆ 6.30 ರ್ದ್ 7 ತ ಲಯಿ ಇಲ್ಲ್ ಪಿದಡ್ದ್ ಬೀಸ ಬೀಸ ಪೋವೊಡು. ಒಂತೆ ಕಡೆಸ್ಸ್ಂಡಲಾ, ಮೆಲಾನೆ ನಡತ್ಂಡಲಾ ಬಸ್‌ ತತ್ಂಡ ಕ್ಲಾಸ್‌ಲಾ ಮಿಸ್‌. ಓಲ್ಲ ಬೇಗ ಶಾಲೆ ಬುಡ್ಂಡ ಸರ್ವಿಸ್‌ ಗಾಡಿಲಾ ತಿಕ್ಕುಜಿ. ಮಾತೆರ್ಲಾ ನಡತೊಂದೇ ಇಲ್ಲಡೆ ಪೋಪ ಪಂದ್ ಪನ್ಪೆರ್ ವಿದ್ಯಾರ್ಥಿನಿ ನೂರಾಲ್‌ಬೊಟ್ಟುದ ವೀಣಾ.

ಹೈ ಸ್ಕೂಲ್, ಕಾಲೇಜ್ ಏತ್ ದೂರ?

ಈದು ಬೊಕ್ಕ ನೂರಾಲ್‌ಬೊಟ್ಟು ಗ್ರಾಮೊರ್ದು ನೂರಾಲ್‌ಬೊಟ್ಟು ಕ್ರಾಸ್‌ಗ್ ಬರೊಡಾಂಡ ಕಮ್ಮಿಡ್ ಐನೆರ್ದ್ 10 ಕಿ.ಮೀ. ದೂರ ಉಂಡು. ಹೈ ಸ್ಕೂಲ್‌ಗ್ ಪೋವೊಡಾಂಡ ಹೊಸ್ಮಾರ್‌ಗ್ ಬರೊಡು (ನೂರಾಲ್‌ಬೊಟ್ಟು ಕ್ರಾಸ್‌‌ರ್ದ್ ಮೂಜಿ ನಾಲ್ ಕಿ.ಮೀ.), ಪಿಯು ಕಾಲೇಜ್‌ಗ್ ಬಜಗೋಳಿಗ್, ಪದವಿ, ಉನ್ನತ ಶಿಕ್ಷಣೊಗು ಕಾರ್ಲಗ್ ಬರೊಡು.

ಕೆಲವೆರೆಗ್ ಇಲ್ಲರ್ದ್ ಬಸ್‌ ಉಂತಡೆ 10 ಕಿ.ಮೀ. ದೂರ!

ಈದು ಗ್ರಾಮೊದ ಮಾಪಾಲ್, ಕನ್ಯಾಲ್‌, ಕುಂಟೊನಿ, ಕೂಡ್ಲೆ, ಗುಮ್ಮೆತ್ತು, ಮುಲಿಕೆರವು, ಲಾಮುದೆಲ್, ಪೂಂಜಾಜೆ, ಕುಡ್ಕುಂಡಿ, ಚೇರೆ, ಪಿಜಿನಡ್ಕ, ಬಾರೆ, ಪಿಜಿನಡ್ಕ ಮಂಗಳ ಫಾರ್ಮ್ ಭಾಗೊದ ಜನೊಕ್ಲೆಗ್ ನೂರಾಲ್‌ಬೊಟ್ಟುಗು ಬರ್ಯೆರ 5 ರ್ದ್ 6 ಕಿ.ಮೀ. ಉಂಡು. ನನ ಕನ್ಯಾಲ್, ಗುಮ್ಮೆತ್ತು, ಲಾಮುದೇಲು ಮುಲ್ಪದ ಜೋಕುಲು ಬಸ್‌ ಬೋಡಾಂಡ ಇಲ್ಲರ್ದ್ 10 ಕಿ.ಮೀ. ಬರೊಡು. ಸುಮಾರ್ 300ದಾತ್ ಜೋಕುಲು ಬಸ್‌ದಾಂತೆ ಬಂಙ ಬರೊಂದುಲ್ಲೆರ್.

ನೂರಾಲ್‌ಬೊಟ್ಟು, ಮುಳಿಕ್ಕಾರ್, ಮುರತ್ತಮೇಲ್, ಬೆಂಗಾಡಿ, ಕಲ್ಲಾಜೆ, ಹುಕ್ರಟ್ಟೆ ಗುಂಡೋಣಿ ಮುಲ್ಪಲಾ ಪಾಕ ಇಲ್ಲ್‌ಲ್ ಉಲ್ಲ. ಮುಲ್ಪ ಅಂದಾಜಿ 200 ಜೋಕುಲು ಆಂಡಲ ಉಲ್ಲೆರ್. ಮುಲ್ಪರ್ದ್ ನೂರಾಲ್‌ಬೊಟ್ಟು ಕ್ರಾಸ್‌ಗ್ ಬರ್ಯೆರ ಕಮ್ಮಿಡ್ 10 ಕಿ.ಮೀ. ಉಂಡು.