Last updated on June 8th, 2024 at 12:40 pm
ಸುಳ್ಯ: ಸಂಪಾಜೆ ಗ್ರಾಮೊದ ಗಡಿಕಲ್ಲ್‌ದಲ್ಪ ಸಾದಿಬರಿಟ್ ಜೆತ್ತಿತ್ತಿನ ಕೈಕಂಜಿಲೆಗ್ ಏರೋ ಕಿಡಿಗೇಡಿಲು ಅಮಲ್ ಬರ್ಪುನ ಇಂಜೆಕ್ಷನ್ ಕೊರ್ದು ಸ್ಕಾರ್ಪಿಯೋ ಗಾಡಿಡ್ ಅಕ್ರಮವಾದ್ ಸಾಗಾಟ ಮಲ್ತಿತ್ತ್‌ದ್, ಈ ದೃಶ್ಯ ಮುಟ್ಟದ ಒಂಜಿ ಸಿಸಿ ಕ್ಯಾಮೆರಾಡ್ ರೆಕಾರ್ಡ್ ಆತ್ಂಡ್.
ಗಡಿಕಲ್ಲ್ ಪಲ್ಲಿದಲ್ಪ ನಿಚ್ಚೊಲಾ ಪತ್ತೆರ್ದ್‌ಲಾ ಎಚ್ಚ ಪೆತ್ತೊಲು ರಾತ್ರೆದ ಪೊರ್ತುಡು ಸಾದಿದ ಬರಿಟ್ ಜೆತ್ತುಪ್ಪುವ, ಜೂ.7ತಾನಿ ಮಧ್ಯರಾತ್ರೆ 1 ಗಂಟೆದ ಪೊರ್ತುಡು ಸುಳ್ಯದಂಚಿರ್ದ್ ಕಪ್ಪು ಬಣ್ಣೊದ ಸ್ಕಾರ್ಪಿಯೋ ಕಾರ್‌ಡ್ ಬತ್ತಿನ ಕಿಡಿಗೇಡಿಲು ಈ ಪೆತ್ತೊಲೆಡ್ ರಡ್ಡ್ ಪೆತ್ತೊಲೆಗ್ ಅಮಲ್ ಬರ್ಪಿನ ಇಂಜೆಕ್ಷನ್ ಕೊರ್ದು ಸ್ಕಾರ್ಪಿಯೋ ಗಾಡಿಡ್ ದಿಂಜಾವೊಂದು ಸುಳ್ಯದಂಚಿ ಪೋತಿನ ತೋಜಿದ್ ಬೈದ್ಂಡ್.
ಗಡಿಕಲ್ಲ್ ಪಲ್ಲಿದ ಸಾದಿ ಬರಿಟ್ ರಡ್ಡ್ ಲಾರಿಲು ಉಂತುದಿತ್ತ್‌ದ್, ಸ್ಕಾರ್ಪಿಯೋ ಗಾಡಿಡ್ ಬತ್ತಿನಕುಲು ಸ್ಕಾರ್ಪಿಯೋನ್ ರಡ್ಡ್ ಲಾರಿಲೆನ ನಡುಟು ಉಂತಾದ್, ಪೆತ್ತೊಲೆನ್ ದಿಂಜಾವೊಂದು ಪದ್ರಾಡಾತೆರ್.
ಪಲ್ಲಿದ ಬರಿಟ್ ಅನ್ವರ್ ಪನ್ಪಿನಾರೆನ ಇಲ್ಲ್ ಇತ್ತ್‌ದ್, ಆರೆನ ಇಲ್ಲದ ಸಿ.ಸಿ. ಕ್ಯಾಮರಾಡ್ ಈ ದೃಶ್ಯ ರೆಕಾರ್ಡ್ ಆತ್ಂಡ್.
ಒಟ್ಟು ಮೂಜಿ ಜನ ಬತ್ತ್‌ದ್ ಪೆತ್ತೊಲೆನ್ ಬಲವಂತವಾದ್ ಗಾಡಿಗ್ ದಿಂಜಾವೊಂದುಪ್ಪುನ ಪೊರ್ತುಡು ನಾಯಿ ಕೊರೆಪುನ ಕೇಂದ್, ಅನ್ವರ್ ಇಲ್ಲಲ್ದ್ ಪಿದಯಿ ಬತ್ತ್‌ದ್ ತೂನಗ ಸ್ಕಾರ್ಪಿಯೋಗ್ ಪೆತ್ತೊಲೆನ್ ದಿಂಜಾವೊಂದುಪ್ಪುನ ತೋಜಿದ್ಂಡ್. ಈ ಪೊರ್ತುಡು ಆರ್ ಜೋರು ಬೊಬ್ಬೆ ಪಾಡ್ದಿತ್ತ್‌ದ್, ಸ್ಕಾರ್ಪಿಯೋ ಸುಳ್ಯದಂಚಿ ಪೋತುಂಡು ಪಂದ್ ತೆರಿಪಾದೆರ್.