ಇನ್ನಾ : ವಿರೋಧದ ನಡುಟ್ಲಾ ಬೆನ್ನಿದ ಜಾಗೆಡ್ ಟವರ್ ನಿರ್ಮಾಣದ ಬೇಲೆ ಸುರು

Last updated on June 6th, 2024 at 11:48 am

ಒಡಿಪುದ ನಂದಿಕೂರುರ್ದು ಕೇರಳದ ಕಾಸ್ರೋಡುಗು ವಿದ್ಯುತ್ ಸರಬರಾಜ್ ಮಲ್ಪರೆ ಇನ್ನಾದ ಬೆನ್ನಿದ ಜಾಗೊಲೆಡ್ ಟವರ್ ನಿರುಮರೆ ಗ್ರಾಮಸ್ಥೆರ್ ವಿರೋಧ ಮಲ್ತಿನೆತ್ತ ನಡುಟುಲಾ ಬುದಾರ ಪೋಲೀಸೆರೆನ ಬಂದೋಬಸ್ತಿಡ್ ಟವರ್ದ ಬೇಲೆ ಸುರು ಆತ್ಂಡ್.

ಕರಿನ ವಾರ ಉಕ್ಕುಡದ ಖಾಸಗಿ ಜಾಗೆಡ್ ಬೆನ್ನಿದ ಜಾಗದಕಲೆಗ್ ನೋಟೀಸ್ ಕೊರಂದೆ ಟವರ್ ಮಲ್ಪರೆ ಬೈದಿತ್ತಿನ ಅಧಿಕಾರಿಲೆನ ವಿರುದ್ದ ಗ್ರಾಮದಕುಲು ಪ್ರತಿಭಟನೆ ಮಲ್ತ್ ಕಾಮಗಾರಿ ಉಂತಾದಿತ್ತೆರ್.

ಬೆನ್ನಿದ ಜಾಗ ಬುಡ್ದ್ ಟವರ್ ಮಲ್ಪುಲೆ ಪನ್ದ್ ಏತೇ ಸಲ ಮನವಿ ಮಲ್ತ್ಂಡಲಾ ಅವೆಕ್ ಸ್ಪಂದಿಸವಂದಿನ ಅಮಾನವೀಯ. ಉಂದೆತ ವಿರುದ್ದ ಜನಕುಲು ಕೋರ್ಟುದ ಮುಟ್ಟು ಏರುನ ಯೋಚನೆ ಮಲ್ತೊಂದುಲ್ಲೆರ್ ಪನ್ದ್ ಜಿಲ್ಲಾ ಪಂಚಾಯತಿದ ಮಾಜಿ ಸದಸ್ಯೆ ರೇಷ್ಮಾ ಉದಯ ಶೆಟ್ಟಿ ಪನ್ಡೆರ್.

ಇನ್ನಾ ಗ್ರಾಮಡ್ ಏರೆನ ಖಾಸಗಿ ಜಾಗೊಡು ಟವರ್ ಮಲ್ಪುಂಡಾ ಅಕಲೆಗ್ ಪರಿಹಾರ ತಿಕ್ಕುಂಡು. ಜಿಲ್ಲಾಧಿಕಾರಿಲೆನ ಆದೇಶದ ಲೆಕ್ಕ ಕಾನೂನಾತ್ಮಕವಾದ್ ಸಂಬಂದ ಇತ್ತಿನಕಲೆಗ್ ನೋಟೀಸ್ ಕೊರ್ದು ಬುದಾರ ಟವರ್ ಬೇಲೆ ಸುರು ಮಲ್ದ ಪನ್ದ್ ತಹಶೀಲ್ದಾರೆರಾಯಿನ ನರಸಪ್ಪ ಪನ್ಡೆರ್.