ಇನ್ನಾ ಗ್ರಾಮಸ್ಥೆರೆನ ಪೊರುಂಬಾಟೊಗು ಜಯ : ವಿದ್ಯುತ್ ಟವರ್ ನಿರ್ಮಾಣೊಗು ನ್ಯಾಯಂತಡೆ ತಾತ್ಕಾಲಿಕ ತಡೆ

Last updated on June 7th, 2024 at 10:29 am

ಇನ್ನಾ ಗ್ರಾಮಸ್ಥೆರೆನ ದಡೀತ ವಿರೋಧದ ನಡುಟ್ಲಾ ಜಿಲ್ಲಾಡಳಿತ ನೋಟೀಸ್ ಕೊರ್ದು ಅಕಲೆನ ಬೆನ್ನಿದ ಜಾಗೊಲೆಡ್ ನಂದಿಕೂರುರ್ದು ಕೇರಳೊಗು ವಿದ್ಯುತ್ ಕೊನೊವರೆ ಟವರ್ ನಿರುಮರೆ ಸುರು ಮಲ್ದಿತ್ತ್ಂಡ್. ಇತ್ತೆ ಉಂದೆಕ್ ತಾತ್ಕಾಲಿಕ ತಡೆನ್ ಕಾರ್ಲದ ನ್ಯಾಯಂತಡೆ ಕೊರ್ತುಂಡು.

ಟವರ್ ಮಲ್ತ್ಂಡ ಗ್ರಾಮದ ಕೃಷಿ ಭೂಮಿ ನಷ್ಟ ಆಪುಂಡು ಪನ್ದ್ ಪಾಕ ಸಲ ಗ್ರಾಮದಕುಲು ಪೊರುಂಬಾಟ ಪ್ರತಿಭಟನೆ ಮಲ್ತೆರ್. ಆಂಡ ಬೇಲೆದ ಗುತ್ತಿಗೆ ದೆತೊನ್ದಿನ ಸಂಸ್ಥೆ ಬುದಾರ ಪೋಲೀಸೆರೆನ ಭದ್ರತೆಡ್ ಜೆಸಿಬಿ ಕನಕ್ ಟವರ್ ಪಾಡರೆ ಮಲ್ಲ ಮಲ್ಲ ಗುಂಡಿ ಗರ್ತೆರ್. ಗುರುವಾರಲಾ ಈ ಬೇಲೆ ನಡತ್ಂಡ್, ಮದ್ಯಾಹ್ನದ ಪೊರ್ತುಗು ನ್ಯಾಯಂತಡೆ ತಡೆ ಕೊರಿನೆರ್ದಾವರ ಬೇಲೆ ಉಂತುಂಡು ಪನ್ದ್ ತೆರಿದ್ ಬೈದ್ಂಡ್.

ಒವ್ವೇ ಅಧಿಕಾರಿಲು ಬೆನ್ನಿದ ಭೂಮಿನ್ ಒರಿಪಾವರೆ ಮನಸ್ ಮಲ್ತಿಜೆರ್. ಎಂಕ್ಲೆನ ಮನವಿಲೆನ್ ಕೇನುನ ಪುನೆಪುಲಾ ಮಲ್ತಿಜೆರ್. ಅಂಚಾದ್ ಅಧಿಕಾರಿಲೆನ ವಿರುದ್ದ ಅಂಚೆನೊ ಈ ಯೋಜನೆದ ವಿರುದ್ದ ಎಂಕ್ಲೆನ ಪೊರುಂಬಾಟ ದುಂಬರಿಯುಂಡು ಪನ್ದ್ ಗ್ರಾಮದಕುಲು ತೆರಿಪಾದೆರ್.