Last updated on June 16th, 2024 at 07:18 pm
ಅಮ್ಮೆ ಪನ್ಡ ಆಕಾಸ, ಅವ್ ನಮಕ್ ಮಸ್ತ್ ಅಕರ ಆಂಡಲಾ ಅವ್ ಇಜ್ಜಿಡ ನಮ್ಮ ಜೀವನೊಗು ಬೊಲ್ಪು ಇಜ್ಜಿ. ಅಮ್ಮೆ ಪನ್ಡ ಬೆನ್ನಿದ ಕಂಡೊ, ಅಲ್ಪ ದತ್ತಿನಾತ್ ಬುಲೆ, ತನನ್ ನಂಬಿನಕಲೆಗ್ ಕೆಸರಾದ್, ಪಸಿರಾದ್, ತನ್ನ ಜೀವನೊನು ಸೊಂದುನ ನೆಲ. ಅಮ್ಮೆ ಪನ್ಡ ಪರಪು ತೋಡುಗು ನಿಡ್ಪ ದೀಯಿನ ಪಾಂಪುಲೆಕ್ಕ, ಅಪ್ಪೆ ಪಾಂಪುದ ಕೈಸಾಂಗಾದ್ ಕೈ ಪತ್ ದ್ ತೋಡು ಕಡಪಾಂಡ, ಅಮ್ಮೆ ತನ್ನ ಬೆರಿ ಕೊರ್ದು ನಿಕಲು ನೀರ್ ಗ್ ಬೂರಂದಿಲೆಕ್ಕ ತೂಪೆ. ಅಮ್ಮೆರೆನ ದುಡುಕು ದುನಿಪು, ಸಿಡ್ಕ್ ಮೋನೆ, ಆಂಡ ಆ ದುನಿಪು, ಆ ಮೋನೆಡ್ ಜೋಕುಲೆನ್ ತೂನಗ ಉರ್ಕಾರುನು ಮಾತ್ರ ಎಡ್ಡೆಪ್ಪು.
ಬಾಲೆ ಅಪ್ಪೆನ ಕಿಲೆಟ್ ಮಾಸದ ಮುದ್ದೆಯಾದ್ ಉಪ್ಪುನಗನೇ ಅಮ್ಮೆ ಬಾಲೆದ ನೂದು ವರ್ಸದ ಬದ್ಕ್ ದ ಬಗೆಟ್ ಕನ ಕಟ್ಟುವೆ. ಅಪ್ಪೆನ ಬಂಜಿಡ್ ಬಾಲೆ ಇತ್ತ್ಂಡ ಅಮ್ಮೆರ್ನ ಮನಸ್ ಡ್ ಬಾಲೆ ಬುಲೆಯುಂಡು. ತಾನ್ ಪುಟ್ಟುದು ಬುಲೆನಗ ಇತ್ತಿನ ಬಂಞ ತನ್ನ ಜೋಕುಲೆಗ್ ಬರ್ರೆ ಬಲ್ಲಿ ಪನ್ದ್ ಸೊಂದುನ ಜೀವ ಇತ್ತ್ಂಡ ಅವ್ ಅಮ್ಮೆರೆನ. ತನ್ಕ್ ಪಾಡರೆ ಸಮ ಮುಟ್ಟು ಇಜ್ಜಿಡಲಾ ತನ್ನ ಜೋಕುಲೆಗ್ ಶೂ ಕೊರ್ಪಾವೆ.
ಅಮ್ಮೆರೆನ್ ಅರ್ಥ ಮಲ್ಪರೆ ಏರೆಗ್ಲಾ ಆವಂದ್. ನಮ ತೂಯಿನ ಅಮ್ಮೆರ್ ಮಲ್ಲ ಗೋಲಿದ ಮರದಲೆಕ್ಕ, ಆ ಮರತ ಗೆಲ್ಲ್ ಡ್ ಪಕ್ಕಿಲು ಗೂಡು ಕಟ್ಟುವ, ಜೋಕುಲು ನೇಲುವ, ಮುರ್ಗೊಲು ನಿರೆಲ್ ದೆತೊನುವ, ಗೋಲಿದ ಮರ ತನ್ನ ಜೀವ ಉಪ್ಪುನೇ ಉಂದೆಕ್ ಪನಿಲೆಕ್ಕ, ಪೊಸ ಪೊಸ ಇರೆ ಬುಡ್ಪುಂಡು, ನನಲಾಯ್ ಬೂರು ನೆಲಕ್ ಬುಡ್ಪುಂಡು. ಪಕ್ಕಿ ಮಲ್ಲಾದ್ ಪಾರುಂಡು ಆಂಡ, ಗೋಲಿದ ಮರ ಅಲ್ಪನೇ ಉಪ್ಪುಂಡು.
ಅಪ್ಪೆನ ಬಗೆಟ್ ಸಾರ ಬಗೆಟ್ ಪದ ಕಟ್ಟ್ ದ್ ಬರೆತಿನಕುಲು ದಿಂಜ. ಆಂಡ ಅಮ್ಮೆರೆನ ತ್ಯಾಗೊನು ಕಾಲಿ ಕರ್ತವ್ಯ ಪನ್ದ್ ತೂತಿನಕುಲೇ ಎಚ್ಚ. ಅಮ್ಮೆರೆನ ತ್ಯಾಗದ ಪುರಾಪು ಪ್ರತೀ ಬಾಲೆಗ್ ತೆರಿಯೊಡು. ನಮ ಅಪ್ಪೆ ಪನ್ದ್ ಮಸ್ತ್ ಜನನ್ ಪನೊಲಿ, ಆಂಡ ಅಮ್ಮೆರ್ ಪನ್ದ್ ಒರಿಯನೇ ಲೆಪ್ಪೊಡು! ಅಮ್ಮೆರೆಗೊಂಜಿ ದಿನ ಪನ್ದ್ ಇಜ್ಜಿ. ಅಮ್ಮೆರೆಗ್ ಪ್ರತೀ ದಿನಲಾ ಅಮ್ಮೆರೆನ ದಿನೊ. ಅಮ್ಮೆರೆನ ಕಣ್ಣ್ ಡ್ ಪೆರ್ಮೆದ ಬೊಲ್ಪು ತೋಜುಲೆಕ್ಕ ಬದ್ಕ್ ಲೆ, ಅಮ್ಮೆರೆಗ್ ಬುಲೆಪಾಯಿನೆಕ್ಕ್ ಪಶ್ಚಾತಾಪ ಬರ್ಪಿಲೆಕ್ಕ ಮಲ್ಪಡೆ.