Last updated on June 29th, 2024 at 07:50 am
ಕುಡ್ಲ: ಪೇಂಟೆದುಲಯಿ ಅನಧಿಕೃತವಾದಿಪ್ಪುನ ಗೂಡಂಗಡಿಲೆನ ಅಡಿಲಕ್ಕಾಯೆರ ಕ್ರಮ ಗೆತೊನುವ ಪಂದ್ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಪಂಡೆರ್.
ಫೋನ್ ಇನ್ ಕಾರ್ಯಕ್ರಮೊರ್ದು ಬೊಕ್ಕ ಸುದ್ದಿಗೋಷ್ಠಿಡ್ ಪಾತೆರ್ನ ಆರೊ, ಪಾದಚಾರಿಲೆಗ್ ಸಕಾಯ ಆವಡ್ ಪಂಡ್‌ದ್ ಫೂಟ್‌ಪಾತ್‌ಲೆನ್ ಮಲ್ದ್ಂಡ್.
ಆ ಜಾಗೆಲೆಡೊ ಗೂಡಂಗಡಿಲೆನ್ ಕಟ್ಟೊಂದಿನೆರ್ದಾವರ ಸಾರ್ವಜನಿಕೆರೆಗ್ ನಡಪೆರ ಬಂಙ ಆವೊಂದುಂಡು. ಅವೆನ್ ಬೇಗೊಡೇ ದೆಪ್ಪಾಯೆರ ಅಧಿಕಾರಿಲೆಗ್ ಆದೇಶ ಕೊರ್ಪ ಪಂದ್ ಪಂಡೆರ್.
ಫೋನ್ ಇನ್ ಪೊರ್ತುಡು ಸಾದಿ ಬರಿತ ಅನಧಿಕೃತ ಗೂಡಂಗಡಿಲೆನ ಬಗೆಟ್ ಪಾಕ ಒಯಿಲ್‌ಲು ಸಾರ್ವಜನಿಕೆರೆರ್ದ್ ಬೈದ್ಂಡ್. ಪೇಂಟೆದ ಪಾಕ ಕಡೆಟ್ ಫಾಸ್ಟ್ ಫುಡ್‌ಲೆಡ್ ಗಲಸುನ ಎಣ್ಣೆ, ನೀರ್ ಸಮ ಇಜ್ಜಿ ಪನ್ಪಿನ ಒಯಿಲ್‌ದ ಪಿನ್ನೆಲೆಡ್ ಜನೊಕ್ಲೆನ ಆರೋಗ್ಯದ ದೃಷ್ಟಿರ್ದ್ ಆರೋಗ್ಯ ಅಧಿಕಾರಿಲೆಡ ದಾಳಿ ಮನ್ಪಾದ್ ಅಡಿಲಕ್ಕಾಯೆರ ಕ್ರಮ ಗೆತೊನುವ. ಪ್ರತಿ ವಾರ್ಡ್‌ಡುಪ್ಪುನ ಸಾದಿಬರಿತ ವ್ಯಾಪಾರಿಲೆನ ಸಮೀಕ್ಷೆ ಮಲ್ತ್‌ದ್ ವಾರ್ಡ್‌ಲೆಡ್ ಇಪ್ಪುನ ಸರಕಾರಿ ಜಾಗೆಲೆಡ್ ವೆಂಡಿಂಗ್ ಝೋನ್ (ವ್ಯಾಪಾರ ವಲಯ)ಲೆನ್ ಗುರ್ತ ಮಲ್ತ್‌ದ್ ಆಡೆಗ್ ವ್ಯಾಪಾರ ಸ್ಥಳಾಂತರ ಮನ್ಪೆರ ಕ್ರಮ ಗೆತೊನುವ. ಸ್ಥಳಾಂತರ ಆವಂದಿನಕಲೆನ ಮಿತ್ತ್ ಕಾನೂನು ಕ್ರಮ ಗೆತೊನುವ ಪಂದ್ ಮೇಯರ್ ಪಂಡೆರ್.
ಪೇಂಟೆಡ್ ಪ್ಲಾಸ್ಟಿಕ್ ಫ್ಲೆಕ್ಸ್‌ಲು ಎಚ್ಚಾದ್ ತೋಜಿದ್ ಬರೊಂದಿತ್ತ್‌ದ್, ಧಾರ್ಮಿಕ ವಿಚಾರೊಗು ಅಂಚೆನೇ ರಾಜಕೀಯ ನಾಯಕೆರೆ ವಿಚಾರೊಡು ಪ್ಲಾಸ್ಟಿಕ್ ಫ್ಲೆಕ್ಸ್‌ಲೆನ್ ಗಲಸೊಂದುಲ್ಲೆರ್. ಅವೆತ ಪಗತೆಗ್ ಹೋಲ್ಡಿಂಗ್ಸ್‌ಲೆನ್ ಗಲಸೆರೆ ಬಿನ್ನೈತೊಂಡೆರ್.
ಪೇಂಟೆಡ್ ಪಾರ್ಕಿಂಗ್ ಸಮಸ್ಯೆ ಪರಿಹಾರೊಗು ಪಿಪಿಪಿ ಮಾದರಿಡ್ ಪೇ ಪಾರ್ಕಿಂಗ್ ಕಟ್ಟಾವೊಂದುಲ್ಲ. ಗುತ್ತಿಗೆದಾರೆರ್ ಉಸಾರ್ ತತ್ತ್‌ದ್ ಆಸ್ಪತ್ರೆಡ್ ಮರ್ದ್ ಮಲ್ತೊಂದುಲ್ಲೆರ್, ಮಾನವೀಯತೆ ದೃಷ್ಟಿಡ್ ಕಾಮಗಾರಿನ್ ಇತ್ತೆಗ್ ಉಂತಾದ್ಂಡ್. ಉಸಾರಾಯಿ ಬೊಕ್ಕ ದುಂಬರಿಪೆರ್. ಆರೆರ್ದ್ ಆಯಿಜಿಂಡ ಅವೆನ್ ಟರ್ಮಿನೇಟ್ ಮಲ್ತ್‌ದ್ ಪೊಸ ಟೆಂಡರ್ ಲೆಪ್ಪುವ ಪಂದ್ ಪಂಡೆರ್.
ಈ ವರ್ಸೊರ್ದು ನಾರಾಯಣ ಗುರು ಜಯಂತಿ ಕರಿಪೆರ ಮನಪಾ ಸೀಮೆಡ್ ಬರ್ಪಿನ ರಿಜಿಸ್ಟರ್ ಆತಿನ ನಾರಾಯಣಗುರು ಮಂದಿರೊಲು ನಾರಾಯಣಗುರು ಜಯಂತಿ ಕರಿತ್‌ದ್, ಅವೆತ ಕರ್ಚಿದ ದಾಖಲೆಲೆನ್ ಮನಪಾಗ್ ಸಂದಾಯೆರ್ನ್ಡ ಅಂಚಿನಕಲೆಗ್ 15 ಸಾರ ರೂ. ಕೊರ್ಪುಂಡು ಪಂದ್ ತೆರಿಪಾಯೆರ್.
ಮನಪಾ ಸೀಮೆದ ಸರಕಾರಿ ಕನ್ನಡ ಮಾಧ್ಯಮ ಬೊಕ್ಕ ಅನುದಾನಿಕ ಕನ್ನಡ ಮಾಧ್ಯಮ ಶಾಲೆಲೆಡ್ ಎಸ್‌ಎಸ್‌ಎಲ್‌ಸಿ ವಿದ್ಯಾರ್ಥಿಲು ಶೇ. 90 ಅತ್ತ್ಂಡ ಅವೆರ್ದ್ ಎಚ್ಚ ಮಾರ್ಕ್ ಗೆತೊಂದಿತ್ತೆರ್ನ್ಡ ಸೂಕ್ತ ದಾಖಲೆಲೆನ ಒಟ್ಟುಗು ತೆರಿಗೆ ಅಫಿಲು ಸ್ಥಾಯಿ ಸಮಿತಿಗ್ ಅತ್ತ್ಂಡ ಮೇಯರ್‌ಗ್ ಜುಲೈ 31 ಅರ್ಜಿ ಕೊರೊಲಿ ಪಂದ್ ಆರ್ ಪಂಡೆರ್.
ಸ್ಥಾಯಿ ಸಮಿತಿ ಅಧ್ಯಕ್ಷೆ ವರುಣ್ ಚೌಟೆರ್, ಲೋಹಿತ್ ಅಮೀನ್ ಬೊಕ್ಕ ಅಧಿಕಾರಿಲು ಒತ್ತುಪಾಲಿತ್ತೆರ್.