Last updated on June 25th, 2024 at 04:57 pm
ಬೆಂಗ್ಳೂರ್ ಜೂನ್ 25: ಕರ್ನಾಟಕ ಮಿಲ್ಕ್ ಫೆಡರೇಷನ್ ನಂದಿನಿ ಪೇರ್‌ದ ರೇಟ್ ಎರ್ತೆದ ಘೋಷಣೆ ಮಲ್ತಿತ್ತ್‌ದ್, ಎಲ್ಲೆರ್ದ್ ಜಾರಿಗ್ ಬರ್ಪುಂಡು.
ಬಿಲೆ ಎರ್ತೆರ್ದಾವರ ಪ್ರತಿ ಲೀಟರ್ ಪೇರ್‌ಗ್ 2.10 ರೂಪಾಯಿ ಎಚ್ಚ ಆಪುಂಡು. ಬಿಲೆ ಸಮ ಮಲ್ಪುನೆತ ಒಟ್ಟುಗು, ಗ್ರಾಹಕೆರೆಗ್ ಎಡ್ಡೆ ಗುಣಮಟ್ಟೊದ ಪೇರ್ ಕೊರ್ಯೆರ ನಂದಿನಿ ಪೇರ್‌ದ ಪ್ರತಿ ಪ್ಯಾಕೆಟ್‌ಡ್ ನನ 50ml ಎಚ್ಚ ಪೇರ್ ಇಪ್ಪುಂಡು. ಉದಾರ್ಮೆಗ್, ಅರ್ಧ-ಲೀಟರ್ ಪ್ಯಾಕೆಟ್‌ಡ್ ಈತ್‌ನೇಟ 500 ml ಪೇರ್ ಇಪ್ಪೆದ್ಂಡ್. ಎಲ್ಲೆರ್ದ್ 550 ml ಹಾಲಪೇರ್ ಇಪ್ಪುಂಡು. ಬಿಲೆ ಎರ್ತೆದ ಒಟ್ಟುಗು ಗ್ರಾಹಕೆರೆಗ್ ಪ್ರಮಾಣೊಡು ಒಂತೆ ಎಚ್ಚ ಕೊರೊಂದುಲ್ಲೆರ್. ಪೇರ್‌ದ ಬಿಲೆ ಮಾತ್ರ ಎಚ್ಚ ಮಲ್ತಿತ್ತ್‌ದ್, ಕೊಜಪುದ ಬಿಲೆಟ್ ಒವ್ವೇ ಎಚ್ಚಿಕಮ್ಮಿ ಇಜ್ಜಿ.
ಪೇರ್ ಎಚ್ಚ ಮಲ್ತ್‌ದ್, ಬಿಲೆ ಎಚ್ಚ ಮಲ್ದಿನ ಕೆಎಂಎಫ್
ಬಿಲೆ ಎರ್ತೆದ ಬಗೆತ ಸುದ್ದಿಗೋಷ್ಠಿಡ್ ಪಾತೆರ್ನ ಕೆಎಂಎಫ್ ಅಧ್ಯಕ್ಷೆ ಭೀಮನಾಯ್ಕ್ “ಈತ್ ದಿನ ಅರ್ಧ ಲೀಟರ್ ಪ್ಯಾಕೇಟ್‌ಡ್ 500 ml ಪೇರ್ ಇಪ್ಪೆದ್ಂಡ್, ನನ ದುಂಬಗ್ 50 ml ಪೇರ್ ಎಚ್ಚ ಪ್ಯಾಕೇಟ್‌ಡ್ ತಿಕ್ಕುಂಡು. ಅಂಚಾದೊ ಎಚ್ಚಿನ ಪೇರ್‌ಗೊ ರಡ್ಡ್ ರೂಪಾಯಿ ಎಚ್ಚ ಮಲ್ತೊಂದುಲ್ಲ. ಪೇರ್ ಎಚ್ತ ಮಲ್ತಿನೆಕ್ 2 ರೂಪಾಯಿ ಎಚ್ಚ ಮಲ್ತೊಂದುಲ್ಲ. 1000 ml ಬರೊಂದಿತ್ತಿನ ಪೇರ್ ನನ 1050 ml ಬರ್ಪುಂಡು” ಪಂದ್ ಒಲವು ಕೊರ್ಯೆರ್.
ಪಿರ ಪಾತೆರ್ದ್, ಕರ್ನಾಟಕ ಮಿಲ್ಕ್ ಫೆಡರೇಷನ್ ಪೇರ್ ಸಂಗ್ರಹೊಡು ರಡ್ಡನೇ ತಾನೊಡುಂಡು. ತೆನ್ಕಾಯಿ ಭಾರತೊಡು ಕಡೀರ ತಾನ. ನಿಚ್ಚೊಲಾ 98,17,000 ಲೀಟರ್ ಪೇರ್ ಒಟ್ಟಾಪುಂಡು. ಬೇಗೊಡೇ ಒಂಜಿ ಕೋಟಿ ಲೀಟರ್ ಒಟ್ಟು ಮನ್ಪುನ ಈಡ್ ಎತ್ತೆರೆ ಉಂಡು. ರಾಜ್ಯೊದ 27 ಲಕ್ಷ ಪೇರೊ ಉತ್ಪಾದಕೆರ್ ಉಂದೆತ ಪಿರವುಲ್ಲೆರ್. ಇತ್ತೆ ಒಟ್ಟಾಪಿನೆಟ್ 30 ಲಕ್ಷ ಲೀಟರ್ ಪೇರ್‌ದ ಪೊಡಿಕ್ ಕಡಪುಡೊಂದುಲ್ಲ ಪಂದ್ ಪಂಡೆರ್.
ಪೇರ್‌ದ ಪೊಸ ಬಿಲೆ ಎಂಚ ಉಂಡು?
- ನೀಲಿ ಪ್ಯಾಕೆಟ್ ಪೇರ್ – 42 ರ್ದ್ 44 ರೂಪಾಯಿಗ್ ಎರ್ತೆ
- ನೀಲಿ ಪ್ಯಾಕೆಟ್ (ಟೋನ್ಡ್ ಪೇರ್) – 43 ರ್ದ್ 45 ರೂಪಾಯಿಗೆ ಎರ್ತೆ
- ಆರೆಂಜ್ ಪ್ಯಾಕೆಟ್ ಪೇರ್ – 46 ರ್ದ್ 48 ರೂಪಾಯಿಗ್ ಎರ್ತೆ
- ಆರೆಂಜ್ ಸ್ಪೆಷಲ್ ಪೇರ್- 48 ರ್ದ್ 50 ರೂಪಾಯಿಗ್ ಎರ್ತೆ
- ಶುಭಂ ಪೇರ್ – 48 ರ್ದ್ 50 ರೂಪಾಯಿಗ್ ಎರ್ತೆ
- ಸಮೃದ್ದಿ ಪೇರ್ – 51 ರ್ದ್ 53 ರೂಪಾಯಿಗ್ ಎರ್ತೆ
- ಶುಭಂ (ಟೋನ್ಡ್ ಪೇರ್) – 49 ರ್ದ್ 51 ರೂಪಾಯಿಗ್ ಎರ್ತೆ
- ಸಂತೃಪ್ತಿ ಪೇರ್ – 55 ರ್ದ್ 57 ರೂಪಾಯಿಗ್ ಎರ್ತೆ
- ಶುಭಂ ಗೋಲ್ಡ್ ಪೇರ್- 49 ರ್ದ್ 51 ರೂಪಾಯಿಗ್ ಎರ್ತೆ
- ಶುಭಂ ಡಬಲ್ ಟೋನ್ಡ್ ಪೇರ್ – 41 ರ್ದ್ 43 ರೂಪಾಯಿಗ್ ಎರ್ತೆ