Last updated on June 10th, 2024 at 12:07 pm
ಬೊಲ್ತೇರ್: ಡಿವೋರ್ಸ್‌ದ ಪ್ರಕ್ರಿಯೆ ನ್ಯಾಯಂತಡೆಟ್ ಉಪ್ಪುನಗನೇ ಬೊಡೆದಿ 2ನೇ ಮದಿಮೆ ಆತಿನ ಪ್ರಕರಣೊಗು ಸಂಬಂಧಿತ್‌ದ್ ವಾದ ಪ್ರತಿವಾದೊಲೆಗ್ ಕೆಬಿ ಕೊರ್ನ ಬೊಲ್ತೇರ್ ನ್ಯಾಯಂತಡೆ ಬೊಡೆದಿನ ಮಿತ್ತ್ ಕ್ರಿಮಿನಲ್‌ ಕೇಸ್ ಪಾಡೆರೆ ಆದೇಶ ಕೊರ್ತುಂಡು.
ಪಣಕಜೆ ಮುಂಡಾಡಿ ನಿವಾಸಿ ಉದಯ ನಾಯಕ್‌ ಪನ್ಪಿನಾರೊ ಮುಂಬಯಿದ ಅನಿತಾ ನಾಯಕ್‌ ಪನ್ಪಿನಾರೆನ್ 2018ಡ್ ಮದಿಮೆ ಆದಿತ್ತೆರ್. ಒಂಜಿ ವರ್ಸ ಕರಿಯೊಂದಿತ್ತಿಲೆಕನೆ ದಾಂಪತ್ಯೊಡು ತಲೆಪುಲು ಉಂಡಾಯಿನೆರ್ದಾವರ ಕುಡ್ಲದ ಕೌಟುಂಬಿಕ ನ್ಯಾಯಂತಡೆಟ್ ವಿಚ್ಛೇದನೊಗು ಅರ್ಜಿ ಪಾಡ್ದಿತ್ತೆರ್. ಪ್ರತೀ ತಿಂಗೊಲು 30 ಸಾವಿರ ರೂ. ಕೊರೊಡು ಪಂಡ್‌ದ್ ಬೊಡೆದಿ ಕೇಂದಿತ್ತೆರ್. ಈ ನಡುಟು ಬೊಡೆದಿ ಕಂಡನ್ಯಗ್ ತೆರಿಯಂದಿಲೆಕ 2023ಟ್ ಮುಂಬಯಿದ ಬೇತೆ ಒಂಜಿ ಆಂಜೊವುನು ಮದಿಮೆ ಆದಿತ್ತೆರ್. ಈ ಇಸಯ ತೆರಿನ ಉದಯ್ ಸಾಕ್ಷಿದೊಟ್ಟುಗು ಬೊಲ್ತೇರ್ ಸಿಜೆ ಬೊಕ್ಕ ಜೆಎಂಎಫ್‌ಸಿ ನ್ಯಾಯಂತಡೆಕ್ ಪಿರ್ಯಾದ್ ಸಂದಾದಿತ್ತೆರ್.
ಎಸಿಜೆ ಬೊಕ್ಕ ಎಫ್‌ಸಿಜೆಎಂ ವಿಜಯೇಂದ್ರ ಟಿ.ಎಚ್‌. ಮೇರ್ ಉದಯ್ ಕೊರ್ತಿನ ಖಾಸಗಿ ಒಯಿಲ್‌ನ್ ಒಪ್ಪಿದ್ ಐಪಿಸಿ ಸೆಕ್ಷನ್‌ 34, 120 ಬಿ ಬೊಕ್ಕ 494ರ ಅಡಿಟ್ ಪ್ರಕರಣ ದಾಕಲ್ತೊನೆರ ಪುಂಜಾಲಕಟ್ಟೆ ಪೊಲೀಸೆರೆಗ್ ಸೂಚನೆ ಕೊರ್ತೆರ್.
ಬೊಡೆದಿ ಕಂಡ್‌ದ್ ರಡ್ಡನೇ ಮದಿಮೆ ಆತಿನೆನ್ ಖಚಿತ ಮಲ್ತೊನೆರ ಬೋಡಾದ್ ಉದಯ ನಾಯಕ್‌ ಆರೇ ಪತ್ತೆದಾರಿಕೆಗ್ ಜತ್ತಿತ್ತೆರ್. ಬೊಡೆದಿ ಅನಿತಾ ಮುಂಬಯಿದ ಡೊಂಬಿವಲಿತ ಲೋಧಾ ಪ್ಯಾನೇಶಿಯಾಡ್ ಹರಿಕೃಷ್ಣ ಗಣಪತ್‌ ರಾವ್‌ ಕೀಲು ಪನ್ಪಿನಾರೆನೊಟ್ಟುಗು 2023 ಮಾರ್ಚ್‌ 13ತಾನಿ ರಡ್ಡನೇ ಮದಿಮೆ ಆತಿನೆನ್ ನಾಡ್ದ್ ಪತ್ತ್‌ದೆರ್. ಅವು ಮಹಾರಾಷ್ಟ್ರ ಗೆಜೆಟ್‌ ಕಚೇರಿಗ್ ಸಂದಾದಿನ ಪ್ರಮಾಣ ಪತ್ರೊದ ಪ್ರಕಾರ ಅನಿತಾ ನಾಯಕ್‌ ಮೇರ್ ಅನಿತಾ ಹರಿಕೃಷ್ಣ ಕೀಲು ಪಂದ್ ಪುದರ್ ಪಗತೊಂದೆರ್. ಈ ಒಲವುನು ಉದಯ್ ಆರ್‌ಟಿಐಡ್ ಗೆತೊಂದೆರ್. ಆತೇ ಅತ್ತಂದೆ ಅನಿತಾ ಮೆರೆನ ಸಂಬಂಧಿಕೆರೆನ ಸಾಮಾಜಿಕ ಬಲೆತ್ತಾನೊಡು ಮದಿಮೆದ ಫೋಟೋಲೆನ್ ಒಟ್ಟು ಮಲ್ತ್‌ದ್ ಕುಡ್ಲ ಕೌಟುಂಬಿಕ ನ್ಯಾಯಂತಡೆಕ್ ಸಂದಾದೆರ್.
ಈ ವಿಚಾರಣೆ ಮಲ್ತಿನ ಕೌಟುಂಬಿಕ ನ್ಯಾಯಂತಡೆತ ಪ್ರಧಾನ ನ್ಯಾಯಾಧೀಶೆರ್ ಈ ಪುರಪುಲೆನ್ ಒತ್ತೊಂದು, ಉದಯ್ ನಾಯಕ್‌ ಬೊಕ್ಕ ಅರ್ಜಿದ ಎಚ್ಚಿನ ಜಡ್ತೆಗ್ಲಾ ನಿರ್ದೇಶನ ಕೊರ್ದಿತ್ತ್ಂಡ್. ಬೊಕ್ಕ ಉದಯ್ ಬೊಲ್ತೇರ್ ಸಿಜೆ ಬೊಕ್ಕ ಜೆಎಂಎಫ್‌ಸಿ ನ್ಯಾಯಂತಡೆಟ್ ಖಾಸಗಿ ಪಿರ್ಯಾದ್ ಸಂದಾನಗ ಈ ವಿಚಾರವಾದ್ ಬೊಡೆದಿ ಅನಿತಾ ಬೊಕ್ಕ ಅಮ್ಮೆರ್ ರಾಮಚಂದ್ರ ನಾಯಕ್‌, ಅನಿತಾನ್ ಮದಿಮೆ ಆತಿನ ಹರಿಕೃಷ್ಣ ಗಣಪತ್‌ ರಾವ್‌ ಕೀಲು ಬೊಕ್ಕ ಅಮ್ಮೆರ್ ಗಣಪತ್‌ ರಾವ್‌ ಕೀಲು, ಅಪ್ಪೆ ಚಂದ್ರಾವತಿ ಕೀಲು ಮೊಕಲೆನ ಮಿತ್ತ್ ಕ್ರಿಮಿನಲ್‌ ಮೊಕದ್ದಮೆ ದಾಕಲ್ತೊನೆರ ಆದೇಶ ಕೊರ್ತುಂಡು. ಉದಯ್ ಪರವಾದ್ ವಿಶಾಲ್‌ ಶೆಟ್ಟಿ ವಾದ ಮಂಡನೆ ಮಲ್ತಿತ್ತೆರ್.