Last updated on June 10th, 2024 at 09:02 pm
ಬೊಲ್ತೇರ್: ಇರ್ವೆರೆ ನಡುಟು ಪಾಕ ವರ್ಸೊರ್ದಿಂಚಿ ನಡತೊಂದಿತ್ತಿನ ಜಾಗೆದ ತಕರಾರ್‌ಗ್ ಸಂಬಂಧಿತ್‌ದ್ ಇತ್ತೆ ಜಾಗೆಗ್ ಪೊಗ್ಗುನ ಗೇಟ್‌ದ ಎದುರು 25 ಏಡ್‌ಲೆನ ತರೆ ಕಡ್ತ್‌ದ್ ಅವೆಕ್ 25 ಜನೊತ ಪೋಟೋ ದೀದ್ ಮಾಟ ಮಲ್ದಿನ ನಡಕೆ ಬೊಲ್ತೇರ್‌ಡ್ ಜೂ.10 ತ ಕಾಂಡೆ ಬೊಲ್ಪುಗು ಬೈದ್ಂಡ್.
ಬೊಲ್ತೇರ್ ತಾಲೂಕ್‌ದ ಪಡಂಗಡಿ ಗ್ರಾಮೊದ ಬೋಳಿಯಾರ್ ಪನ್ಪಿನವುಲು 25 ಎಕರೆ ಜಾಗೆನ್ ಕೇರಳ ಮೂಲೊದ ಗೋಪಾ ಕುಮಾರ್ ಬೊಕ್ಕ ಸುಮೇಶ್ ಪನ್ಪಿನಕುಲು ಕರಿನ ವರ್ಸ ಕುಡ್ಲದ ಒಂಜಿ ಜನ ದೆತೊನ್ದು, ದಾಖಲೆ ಪತ್ರ ಟ್ರಾನ್ಸಫರ್ ಮಲ್ತೊಂದು ಜಾಗೆದ 8 ಕೋಟಿ ರೂಪಾಯಿ ಕಾಸ್ ಕೊರಂದೆ ದಗೆ ಮಲ್ತಿತ್ತೆರ್. ಈ ಬಗೆಟ್ ಪಾಕ ಸಮೆಮುಟ್ಟ ರಡ್ಡ್ ಪಾರ್ಟಿಲ ಕಾದೊಂದಿತ್ತೆರ್. ಬೊಕ್ಕ ಮಾರ್ದಿನ ಜಾಗೆದ ದನಿಕುಲಾಯಿನ ಗೋಪಾ ಕುಮಾರ್ ಬೊಕ್ಕ ಸುಮೇಶ್ ಸೇರ್ದ್ ಬೊಲ್ತೇರ್ ನ್ಯಾಯಂತಡೆಟ್ ಖಾಸಗಿ ಒಯಿಲ್ ಕೊರ್ದಿತ್ತೆರ್.
ಬೊಲ್ತೇರ್ ಕೋರ್ಟ್ ಜಾಗೆನ್ ಮೂಜನೇ ಜನೊಕು ಮಾರ್ಯೆರೆ ಬಲ್ಲಿ ಅಂಚೆನೇ ದುಂಬುದ ಮೂಲ ಜಾಗೆದ ದನಿಕುಲಾಯಿನ ಗೋಪಾ ಕುಮಾರ್ ಬೊಕ್ಕ ಸುಮೇಶ್‌ನ ವಶೊಕು ಕೊರ್ದು ಬೊಲ್ತೇರ್ ಕೋರ್ಟ್ ಆದೇಶ ಕೊರ್ದಿತ್ತ್ಂಡ್.
ಇತ್ತೆ ಜಾಗೆಗ್ ಪೊಗ್ಗುನ ಗೇಟ್‌ದ ಎದುರು ಜೂ.9 ದಾನಿ ರಾತ್ರೆ 25 ಏಡ್‌ಲೆನ ತರೆ ಕಡ್ತ್‌ದ್ ಅವೆಕ್ 25 ಜನೊತ ಫೋಟೋ ದೀದಿತ್ತ್‌ದ್, ಮಾಟ ಮಲ್ದೆರ್ ಪಂದ್ ಆರೋಪ ಕೇಂದ್ ಬರೊಂದುಂಡು.
ಏರ್ ಮಾಟ ಮಲ್ದೆರ್, ದಾಯೆ ಮಲ್ದೆರ್ ಪಂದ್ ನನಲಾ ತೆರಿದಿಜಿ. ಈ ಬಗೆಟ್ ಜಡ್ತೆ ಆದೇ ಎಚ್ಚಿನ ಒಲವು ತಿಕ್ಕೊಡಾತೆ. ಬೊಲ್ತೇರ್ ಪೋಲೀಸೆರ್ ಜಾಗೆಗ್ ಬತ್ತ್ ಒಲವು ಒಟ್ಟು ಮಲ್ತೊಂದುಲ್ಲೆರ್.