Last updated on July 28th, 2024 at 08:07 am
ಬೊಲ್ತೇರ್ : ಮುಂಡಾಜೆದ ರಾಷ್ಟ್ರೀಯ ಪೆರ್ಸಾದಿದ ಸೀಟ್ ಕಾಡ್ ಪನ್ಪಿನವುಲು ಬೊಲೆರೋ ಗಿಡಿಯೊಂಜಿ ಬೈಕ್‌ಗ್ ಎಡ್ತಿನೆರ್ದಾವರ ಪೊಣ್ಣು ಬಾಲೆ ತೀರ್ದಿತ್ತ್‌ದ್, ಪೊಣ್ಣನ ಅಮ್ಮೆರೆಗ್ ಗಾತಿದ ಗಡಿಕುಲಾತಿನ ನಡಕೆ ಜು.27 ತಾನಿ ಬಯ್ಯಡ್ ಪಡತ್‌ದ್ಂಡ್.
ಕಲ್ಮಂಜ ಗ್ರಾಮೊದ ಕುಡೆಂಚಿ ನಿವಾಸಿ ಗುರುಪ್ರಸಾದ್ ಗೋಖಲೆ ಮೇರ್ ಮಗಲ್ ಅನರ್ಘ್ಯ (13)ನ್ ಕುಲ್ಲಾವೊಂದು ಮುಂಡಾಜೆದಂಚಿ ಪೋವೊಂದುಪ್ಪುನಗ ಪರೊಂದು ಅಮಲ್‌ಡ್ ಬೊಲೆರೋ ಗಾಡಿ ಬುಡೊಂದು ಬತ್ತಿನ ಡ್ರೈವರ್ ಬೈಕ್‌ಗ್ ಪಿರವುರ್ದ್ ಎಡ್ತಿನತ್ತಂದೆ, ಬೈಕನ್ ಸುಮಾರ್ 30 ಮೀಟರ್‌ರ್ದ್‌ಲಾ ದೂರ ಒಯ್ತೊಂದು ಪೋತುಂಡು.
ಈ ಪೊರ್ತುಡು ಬೈಕ್‌ಡಿತ್ತಿನ ಅನರ್ಘ್ಯನ ತರೆಯ ಮಿತ್ತ್‌ಡೆನೇ ಬೊಲೆರೋ ಗಾಡಿ ಪೋಯಿನೆರ್ದಾವರ ಗಾತಿದ ಪೆಟ್ಟಾದಿತ್ತಿನ ಪೊಣ್ಣನ್ ಆಸ್ಪತ್ರೆಗೆ ಸೇರಾದಿತ್ತ್‌ದ್, ಪೊಣ್ಣು ತೀರ್ದಲ್ ಪಂದ್ ತೆರಿದ್ ಬೈದ್ಂಡ್. ಪೊಣ್ಣು ಉಜಿರೆ ಖಾಸಗಿ ಶಾಲೆಡ್ ಆಜಿನೇ ಕ್ಲಾಸ್ ಕಲ್ತೊಂದಿತ್ತಲ್ ಪಂದ್ ತೆರಿದ್ ಬೈದ್ಂಡ್.
ಬೈಕ್ ಬುಡೊಂದಿತ್ತಿನ ಗುರುಪ್ರಸಾದ್ ಗೋಖಲೆ ಮೆರೆಗ್ಲಾ ಗಾತಿದ ಪೆಟ್ಟಾದಿತ್ತ್‌ದ್ ಆರೆಗ್ ಉಜಿರೆದ ಪ್ರೈವೇಟ್ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು ಪಂದ್ ತೆರಿದ್ ಬೈದ್ಂಡ್.
ಬೈಕ್‌ಗ್ ಎಡ್ತ್‌ದ್ 30 ಮೀಟರ್‌ದಾತ್ ಒಯ್ತೊಂದು ಪೋತಿನ ನೆರಿಯದ ಬೊಲೆರೋ ಡ್ರೈವರ್ ಬೊಕ್ಕ ಒಟ್ಟುಗಿತ್ತಿನಕುಲು ಗಾಡಿದೊಟ್ಟುಗೇ ಪದ್ರಾಡಾಯೆರ ತೂತೆರ್. ಈ ಪೊರ್ತುಡು ಅಲ್ಪದಕುಲು ಅಕ್ಲೆನ್ ಬೆರಿಪತ್‌ದ್ ಪೋದು ಪತ್ತ್‌ದ್ ಉಂತಾದ್ ಪೊಲೀಸೆರೆ ವಶೊಕು ಕೊರ್ತೆರ್.