Last updated on July 19th, 2024 at 06:51 pm
ಬೆಂಗಳೂರು: 2024-25ನೇ ಸಾಲ್‌ಡ್ ರಾಜ್ಯೊದ 5 ಕಡೆಟ್ ನಡಪುನ ಕಂಬುಲೊಗು ಈ ಅಧಿವೇಶನ ಅಗಪುನೆತ ಉಲಯಿ ಸರ್ಕಾರೊರ್ದು ಅನುದಾನ ಬುಡುಗಡೆ ಮನ್ಪುವ ಪಂದ್ ಸಚಿವೆ ಹೆಚ್‌.ಕೆ. ಪಾಟೀಲ್‌ ಪಾತೆರ ಕೊರ್ತೆರ್.
ವಿಧಾನ ಪರಿಷತ್‌ಡ್ ಪ್ರಶ್ನೋತ್ತರ ಕಲಾಪೊಡು ಬಿಜೆಪಿ ಸದಸ್ಯೆ ಪ್ರತಾಪ್ ಸಿಂಹ ನಾಯಕ್ ಕೇಂಡಿನ ಕೇನ್ಪುಗು ಸಚಿವೆರ್ ಸದು ಕೊರೊಂದು ಪಂಡೆರ್. ಜಾನಪದ ಗೊಬ್ಬು ಕಂಬುಲೊಗು ಸಂಘಟಕೆರೆಗ್ 2023-24ನೇ ಸಾಲ್‌ದ ಅನುದಾನ ಬುಡುಗಡೆ ಮಲ್ತ್‌ದ್‌ಜೆರ್. ಅಂಚಾದ್ ಸಂಘಟಕರಿಗೆ ಸಮಸ್ಯೆ ಆತ್ಂಡ್. ರಾಜ್ಯೊದ 20 ಕಡೆಟ್ ಕಂಬುಲ ನಡತ್‌ದ್ಂಡ್. ಮಾಜಿ ಸಿಎಂ ಸದಾನಂದ ಗೌಡೆರ್ ಮುಖ್ಯಮಂತ್ರಿಲಾದುಪ್ಪುನಗ 1 ಕೋಟಿ ರೂ. ಬುಡುಗಡೆ ಮಲ್ತಿತ್ತೆರ್. ಇತ್ತೆದ ಸರ್ಕಾರ ದಾನೆ ಅನುದಾನ ಕೊರೊಂದಿಜ್ಜಿ? ಪಾಕ ಜನ ಕಂಬುಲೊನೇ ನಂಬುದುಲ್ಲೆರ್. ಬಜೆಟ್‌ಡ್ ಉಂದೆಕ್ ಕಾಸ್ ದೆತ್ತ್‌ದ್ ದೀವೊಡಾಂಡ್. ಕರಿನ ವರ್ಸೊದ ಕಂಬುಲದ ಅನುದಾನ ದಾನೆ ನನಲಾ ಬುಡುಗಡೆ ಆತಿಜಿ? ಪಂದ್ ಪ್ರತಾಪ್ ಸಿಂಹ ನಾಯಕ್ ಕೇಂದಿತ್ತೆರ್.
ಉಂದೆಕ್ ಸದು ಕೊರ್ನ ಸಚಿವೆ ಹೆಚ್‌.ಕೆ. ಪಾಟೀಲ್‌, ಕರಿನ ವರ್ಸೊದ ಕಂಬುಲದ ಅನುದಾನ ಬುಡುಗಡೆ ಆತಿಜಿ. 2 ಕಂಬುಲಗ್ 5 ಬೊಕ್ಕ 10 ಲಕ್ಷ ರೂ. ಅನುದಾನ ಕೊರ್ತ. ಡಿಸಿ ಬಿಲ್ ತಯಾರ್ ಮಲ್ತ್ ಮಾರ್ಚ್ 20ದ ಉಲಯಿ ಕೊರ್ತೆರ್. ಬಿಲ್ ಕಡಪುಡ್ನ ಕಡೆಸಿನೆರ್ದಾವರ ಅನುದಾನ ಬುಡುಗಡೆಯಾತಿಜಿ. ಇತ್ತೆನೇ ಅನುದಾನ ಬುಡುಗಡೆ ಮಲ್ಪುವ. ಈ ಅಧಿವೇಶನ ಅಗಪುನೆಕ್ ದುಂಬು ಕಾಸ್ ಬುಡುಗಡೆ ಮನ್ಪುನ. ಈ ವರ್ಷ ಪಂಡ 2024-25ನೇ ಸಾಲ್‌ಡ್ ರಾಜ್ಯೊದ 5 ಕಡೆಟ್ ನಡಪುನ ಕಂಬುಲೊಗು ಸರ್ಕಾರೊರ್ದು ಅನುದಾನ ಬುಡುಗಡೆ ಮನ್ಪುವ. ಗೊಬ್ಬುಡು ಎಂಕ್ಲ ರಾಜಕೀಯ ಮನ್ಪುಜ ಪಂದ್ ಸಚಿವೆರ್ ಪಾತೆರ ಕೊರ್ಯೆರ್.