Last updated on July 17th, 2024 at 01:25 pm
ಲಕ್ನೋ: ಮಾತೆರೆಗ್ಲಾ ಸೋಜಿಗ ಆಪುನಂಚಿನ ಸಂಗತಿಯೊಂಜಿ ನಡತಿತ್ತ್‌ದ್ ಮದಿಮೆ ಆವೊಡಿತ್ತಿನ ಆಣನ ಅಮ್ಮೆ ಬೊಕ್ಕ ಪೊಣ್ಣನ ಅಪ್ಪೆನ ನಡುಟು ಮೋಕೆ ಪುಟ್ಟುದು ಇರ್ವೆರ್ಲಾ ಇಲ್ಲ್ ಬುಡ್ಡ್ ಬಲ್ತ್‌ದೆರ್. ಉತ್ತರ ಪ್ರದೇಶೊದ ಕಾಸ್‌ಗಂಜ್‌ಡ್ ಈ ನಡಕೆ ನಡತ್‌ದ್ಂಡ್.
ಮದಿಮಯನ ಅಮ್ಮೆ ಶಕೀಲ್‌ಗ್ 10 ಜೋಕುಲು ಇತ್ತ್‌ದ್, ಮದಿಮಲೆನ ಅಪ್ಪೆಗ್ (35 ವರ್ಸ) 6 ಜೋಕುಲು ಉಲ್ಲೆರ್. ರಡ್ಡ್ ತಿಂಗೊಲು ದುಂಬು ಈ ರಡ್ಡ್ ಕುಟುಮೊಲೆನ ನಡುಟು ಜೋಕುಲೆನ ಮದಿಮೆದ ಬಗೆಟ್ ಚರ್ಚೆ ನಡತ್‌ದ್ ನಿಶ್ಚಯ ಮಲ್ತಿತ್ತೆರ್. ಆ ಪ್ರಕಾರ ಮದಿಮೆದ ತೇದಿಲಾ ಗೊತ್ತು ಮಲ್ತಿತ್ತ್‌ದ್, ಜುಲೈ 17 ಪಂಡ ಇನಿ ಮದಿಮೆ ಆವೊಡಿತ್ತ್ಂಡ್.
ರಡ್ಡ್ ತಿಂಗೊಲುರ್ದಿಂಚಿಲಾ ಮದಿಮೆದ ನೆವನೊಡು ಇರ್ವೆರ್ಲಾ ಮೊಬೈಲ್‌ಡ್ ಪಾತೆರೊಂದು, ತಿಕ್ಕೊಂದುಲಾ ಇತ್ತೆರ್. ಈ ಪೊರ್ತುಡು ಇರ್ವೆರೆ ನಡುಟು ಮೋಕೆ ಪುಟ್ಟುದು ಜೋಕುಲೆನ ಮದಿಮೆನ್ ಗೆನ್ಪಂದೆ ಬಲ್ತ್ ಪೋತೆರ್ ಪಂದ್ ಜನ ಪಾತೆರೊಂದುಲ್ಲೆರ್.
ತೇದಿ ಗೊತ್ತು ಮಲ್ತಿ ಪ್ರಕಾರ ಇನಿ ಜೋಕುಲೆನ ಮದಿಮೆ ಆವೊಡಿತ್ತ್ಂಡ್. ಅವೆರ್ದ್ ದುಂಬೇ ಮದಿಮಯನ ಅಮ್ಮೆ ಬೊಕ್ಕ ಮದಿಮಲೆನ ಅಪ್ಪೆ ಇಲ್ಲ್ ಬುಡ್ದ್ ದೂರ ಪೋತೆರ್, ಒಲ್ಪ ಉಲ್ಲೆರ್ ಪಂದ್ ತೆರಿದಿಜಿ. ಈ ಇಸಯ ತೆರಿಲೆಕನೆ ಆ ಪೊಂಜೊವುನ ಕಂಡನೆ ಶಾಕ್ ಆತೆರ್.
ಈ ಬಗೆಟ್ ಪೊಲೀಸ್ ಸ್ಟೇಶನ್‌ದ ಮೊಟ್ಟು ಬರ್ತ್‌ದಿನ ಪೊಣ್ಣನ ಅಮ್ಮೆ, ಎನ್ನ ಬೊಡೆದಿನ್ ಕಿಡ್ನಾಪ್ ಮಲ್ದೆರ್ ಪಂದ್ ಕೊತ್ವಾಲಿ ಗಂಜ್ಜುಂದ್ವಾರ ಸ್ಟೇಷನ್‌ಡ್ ಒಯಿಲ್ ಬರೆಪಾದೆರ್. ಪೊಲೀಸೆರ್ ಇರ್ವೆರೆನ್ಲಾ ನಾಡೊಂದುಲ್ಲೆರ್ ಪಂದ್ ತೆರಿದ್ ಬೈದ್ಂಡ್.