Last updated on July 1st, 2024 at 11:09 am
ಕುಡ್ಲ: ಈತ್‌ನೇಟ ಒಂಜಿ ಕಂಬುಲೊಡು 5-6 ಜತೆ ಎರ್ಲೆನ್ ಗಿಡರಿನಕುಲು ನನ ದುಂಬಗ್ ಎಚ್ಚ ಪಂಡ 3 ಜತೆ ಎರ್ಲೆನ್ ಮಾತ್ರ ಗಿಡರೊಲಿ. ಒಟ್ಟುಗು ಕರೆತ ಗಂತ್‌‌ಡ್ ಎರು ಬುಡ್ಪುನೆಟ್ಲಾ ಒರ್ಯಗ್ 3 ಜತೆ ಎರ್ಲೆನ್ ಬುಡ್ಯೆರೆ ಮಾತ್ರ ಅವಕಾಶ!
ಗೊತ್ತು ಮಲ್ತಿ ಪೊರ್ತುದುಲಯಿ ಕಂಬುಲ ಮುಗಿಪುಜಿ ಅಂಚೆನೇ ಗಿಡರುನಕ್ಲೆನ ಆರೋಗ್ಯ ಕಾಳಜಿದ ದಿಟ್ಟಿಡ್ ಇಂಚಿನ ಮಹತ್ವೊದ ನಿಯಮೊನು ಜಾರಿಗ್ ಕನಯೆರ ಜಿಲ್ಲಾ ಕಂಬುಲ ಸಮಿತಿ ನಿರ್ಧಾರ ಮಲ್ದ್ಂಡ್. ಆಗಸ್ಟ್‌ಡ್ ನಡಪುನ ಕಂಬಳ ಸಮಿತಿದ ಮಹಾಸಭೆಟ್ ಉಂದೆಕ್ ಒಪ್ಪಿಗೆ ಗೆತೊಂದು ನನ ಬರ್ಪಿ ಕಂಬುಲರ್ದೇ ಜಾರಿಗ್ ಬರ್ಪಿನ ನಿರೀಕ್ಷೆ ಉಂಡು.
ದಾಯೆ ಪೊಸ ನಿಯಮ?
ಇತ್ತೆ ಒಂಜಿ ಕಂಬುಲಡ್ ಪಾಕ ಜತೆ ಎರ್ಲೆನ್ ಒರಿಯೇ ಗಿಡರುನ ಪ್ರಮೇಯ ಉಂಡು. ಒರ ಕರೆಟ್ ಬಲ್ತ್‌ದ್ ಅಪಗನೇ ಕುಡ ಆಯೆ ಬಲ್ಪೆರ ಆಪುಜಿ ಅಂಚೆನೇ ಮೆಡಲ್ ಆಕುನ ಎರ್ಲೆನ್ ಗಿಡತಿನಕುಲೇ ಗಿಡತೊಂದಿತ್ತೆರ್ನ್ಡ ಪೊಸ ಗಿಡರುನಕ್ಲೆಗ್ ಅವಕಾಶ ತಿಕ್ಕುಜಿ. ಒಟ್ಟುಗು ಗಂತ್‌‌ಡ್ ಎರು ಬುಡ್ಪುನವುಲ್ಲಾ ಎಚ್ಚ ಜನ ಇಪ್ಪುವೆರ್ ಆಂಡ ಕೆಲ ಜನ ಮಾತ್ರ ಎಚ್ಚಿನ ಎರ್ಲೆನ್ ಬುಡ್ಪೆರ್. ಮುಲ್ಪಲಾ ಪೊಸಬೆರೆಗ್ ಎಚ್ಚಿನ ಅವಕಾಶ ತಿಕ್ಕೊಂದಿಜ್ಜಂದಿನೆರ್ದಾವರ ಪೊಸ ಪಗತೆಲೆನ್ ಮಲ್ತೊಂದುಂಡು.
“ಕೆಲ ಕಡೆಟ್ ಕಂಬುಲ 2 ದಿನೊಲಾ ದುಂಬರಿದಿನ ಉಂಡು. ಅಂಚಾದ್ ಗಿಡರುನಕುಲು ದೈಹಿಕವಾದ್ ಬಚ್ಚಿದ್ 5-6 ದಿನೊಟು ಕುಡ ಬರ್ಪಿ ಕಂಬುಲೊಗು ರೆಡಿ ಆಪುನ ಬಂಙ ಆವೊಂದುಂಡು. ಒಟ್ಟುಗು ಪೊಸ ಗಿಡಪುನಕ್ಲೆಗ್ ಅವಕಾಶ ತಿಕ್ಕೊಡು ಪಂದ್ ಪೊಸ ನಿಯಮೊಲೆನ್ ಕನಯೆರೆ ಪಿದಡ್‌ದ” ಪಂದ್ ಪನ್ಪೆರ್ ತೀರ್ಪುಗಾರೆರೆ ಪ್ರಮುಖೆರಾಯಿನ ವಿಜಯ ಕುಮಾರ್‌ ಕಂಗಿನಮನೆ.
ಈ ಸರ್ತಿ ಬೇಗ ಸುರು ಆಪುಂಡು ಕಂಬುಲ!
ಕರಿನ ಸರ್ತಿ ಗುರುಪುರ, ಬಳ್ಕುಂಜ, ಕೊಕ್ಕಾಡಿಗೋಳಿ ಕೊಡಂಗೆ ಸೇರ್ದ್ 24 (ಬೆಂಗಳೂರು ಬುಡ್ದ್)ಕಂಬುಲ ಆತ್ಂಡ್. ನವೆಂಬರ್‌ 18ಗ್ ಸುರು ಆದಿತ್ತ್ಂಡ್. ಆಂಡ ಈ ಸರ್ತಿ ನವೆಂಬರ್‌ ಸುರುತ ವಾರೊಡೆ ಕಂಬುಲ ಸುರು ಮಲ್ತ್‌ದ್ ಮಾರ್ಚ್‌ ಅಕೇರಿದ ಪೊರ್ತುಡು ಮಾತ ಕಂಬುಲ ಮುಗಿಪೊಡು ಪನ್ಪಿನ ಲೆಕ್ಕಾಚಾರ. ಎಪ್ರಿಲ್‌ಡ್ ದೊಂಬುದ ಪೆಟ್ಟ್ ಎಚ್ಚ ಇತ್ತಿನೆರ್ದಾವರ ಕಂಬುಲ ಬೊರ್ಚಿ ಪನ್ಪಿನ ಅಭಿಪ್ರಾಯ ಉಂಡು.
ಈ ಸರ್ತಿ ಶಿರ್ವಡ್ ಪೊಸ ಕಂಬುಲ ನಡಪುನೆರ್ದಾವರ ಒಟ್ಟು ಕಂಬುಲದ ಸಂಖ್ಯೆ 25ಕ್ ಏರುಂಡು. ಕರಿನ ವರ್ಸದ ಲೆಕನೆ ಈ ಸರ್ತಿಲಾ “ಬೆಂಗಳೂರು ಕಂಬಳ’ ನವೆಂಬರ್‌ ನಡುಟು ನಡಪುನ ನಿರೀಕ್ಷೆ ಉಂಡು.