Last updated on July 11th, 2024 at 10:10 am
ಕುಡ್ಲ: ಅಧಿಕಾರಿಲು ಜನೊಕ್ಲೆಡ ಲಂಚ ಗೆತೊಂದು ಲೋಕಾಯುಕ್ತ ಬಲೆಕ್ ಬೂರೊಂದಿತ್ತಿನ ಸುದ್ದಿಲು ಸಾಮಾನ್ಯ, ಆಂಡ ಕುಡ್ಲಡೊಂಜಿ ಅಪರೂಪದ ಪ್ರಕರಣ ನಡತಿತ್ತ್‌ದ್, ಪೊಲೀಸ್ ಇನ್ಸ್ಪೆಕ್ಟರ್ ಒರಿ ತನ್ನ ಅಧೀನೊಡುಪ್ಪುನ ಪೊಲೀಸ್ ಸಿಬ್ಬಂದಿಲೆಡ ಲಂಚ ಗೆತೊನ್ರ ಪೋದು ಲೋಕಾಯುಕ್ತ ಬಲೆಕ್ ಬೂರ್ದೆರ್.
ಕರ್ನಾಟಕ ಪೊಲೀಸ್ ವಿಶೇಷ ರಿಸರ್ವ್‌ಡ್ ಫೋರ್ಸ್‌ದ 7ನೇ ಬೆಟಾಲಿಯನ್‌ದ ಪೊಲೀಸ್ ಇನ್ಸ್ಪೆಕ್ಟರ್ ಮಹಮ್ಮದ್ ಆರೀಸ್‌ಞ್ ಲೋಕಾಯುಕ್ತ ಪೊಲೀಸೆರ್ ಸಾಕ್ಷಿ ಇತ್ತ್‌ದ್ ಬುಧವಾರ ಕೈದ್ ಮಲ್ದೆರ್. ಗೆಸ್ಟ್‌ ಹೌಸ್‌ಡ್ ಬೇಲೆ ಕನ್ಫರ್ಮ್ ಮನ್ಪೆರ ಅಧೀನ ಕೆಎಸ್‌ಆರ್‌ಪಿ ಕಾನ್‌ಸ್ಟೇಬಲ್‌ ಒರ್ಯಡ ಮೊಹಮ್ಮದ್ ಆರೀಸ್ ₹20000 ಪಣವು ಅಂಚೆನೇ ತಿಂಗೊಲ್ ತಿಂಗೊಲ್ ₹6000 ಕೊರೊಡು ಪಂದ್ ಕೇದಿತ್ತೆರ್. ಕಾನ್‌ಸ್ಟೇಬಲ್‌‌ರ್ದ್ ಕೆಎಸ್‌ಆರ್‌ಪಿ ಇನ್ಸ್ಪೆಕ್ಟರ್ ಇದಮುಟ್ಟ ₹50000ದಾತ್ ಲಂಚೊನು ಗೆತೊಂದೆರ್.
ಕಾನ್‌ಸ್ಟೇಬಲ್‌‌ನ ಅಮ್ಮೆರ್ ಉಸಾರ್ ತತ್ತಿತ್ತ್‌ದ್, ಆರ್ ಮೂಜಿ ತಿಂಗೊಲುರ್ದಿಂಚಿ ಲಂಚೊದ ಕಾಸ್ ಕೊರ್ದಿಜ್ಜಂಡ್. ಬಾಕಿ ಕಾಸ್‌ನ್ ಕೊರ್ಜಿಂಡ ಡ್ಯೂಟಿನ್ ಪಗಪುವೆ ಪಂದ್ ಮೊಹಮ್ಮದ್ ಆರಿಸ್‌ ಪಂದಿತ್ತೆರ್. ಈ ಬಗೆಟ್ ಕಾನ್‌ಸ್ಟೇಬಲ್‌ ಲೋಕಾಯುಕ್ತ ಪೊಲೀಸೆರೆಗ್ ಒಯಿಲ್ ಕೊರ್ದಿತ್ತೆರ್. ₹18000 ಲಂಚೊದ ಕಾಸ್‌ನ್ ಮೊಹಮ್ಮದ್ ಆರೀಸ್ ಬುಧವಾರ ಗೆತೊಂದೆರ್. ಅಪಗ ಆರೆನ್ ಕೈದ್ ಮಲ್ತ್‌ದ’ ಪಂದ್ ಜಿಲ್ಲಾ ಲೋಕಾಯುಕ್ತ ಪೊಲೀಸ್ ವರಿಷ್ಠಾಧಿಕಾರಿ ಎಸ್.ಪಿ. ನಟರಾಜ್ ತೆರಿಪಾಯೆರ್.