Last updated on July 2nd, 2024 at 11:54 am
ಉಳ್ಳಾಲ: ಟಿಪ್ಪರ್‌ ಬೊಕ್ಕ ಸ್ಕೂಟರ್‌‌ದ ನಡುಟು ನಡತಿನ ಎಡ್ತೆಡ್ ಗಾತಿದ ಪೆಟ್ಟಾದ್ ಆಸ್ಪತ್ರೆಗ್ ದಾಕಲಾದಿತ್ತಿನ ಪಾವೂರು ಮಲಾರ್ ಅಕ್ಷರನಗರ ನಿವಾಸಿ ವಿಶ್ವನಾಥ್‌ ಆಚಾರ್ಯ ಪನ್ಪಿನಾರೆನ ಮಗೆ ಗಣೇಶ್‌ ಆಚಾರ್ಯೆರ್ ( 27) ಅಂಗಾರೆ(ಜು.2) ಮರ್ದ್ ಪಲಾಪಂದೆ ತೀರ್ದೆರ್.
ಫಸ್ಟ್‌ ನ್ಯೂರೋ ಆಸ್ಪತ್ರೆಡ್ ತೀವ್ರ ನಿಗಾ ಘಟಕೊಡು ಮರ್ದ್ ಮನ್ಪೆರ ಸಹಕಾರ ಮಲ್ತಿನ ಹಿತೈಷಿಲೆನ, ಬಿನ್ನೆರೆನ, ಪಾಸಾಡಿಲೆನ ಪ್ರಾರ್ಥನೆ ಕಡೆಕ್ಲಾ ಕೋಡಿ ಎತ್ತಿಜಿ.
ಜೂ.28 ದಾನಿ ಗಣೇಶೆರ್ ಪಾವೂರು ಹರೇಕಳ ಕಡೆರ್ದ್ ಕೊಣಾಜೆದಂಚಿ ಪೋಪುನ ಪೊರ್ತುಡು ಮದ್ಯಾನ 11.50ದ ಅಂದಾಜಿಗ್ ಹರೇಕಳ ಗ್ರಾಮ ಪಂಚಾಯತ್‌ ಕಚೇರಿದ ಎದುರು ಎಡ್ತೆ ನಡತ್‌ದ್ಂಡ್. ಟಿಪ್ಪರ್‌ ಡ್ರೈವರ್‌ನ ಅಮಸರ ಬೊಕ್ಕ ನಾಮಾಸ್‌ದ ಡ್ರೈವಿಂಗ್‌ಡ್ ಒರರ್ದ್ ಒರಾನೆ ಬ್ರೇಕ್‌ ಪಾಡಿನೆರ್ದಾವರ ಪಿರವುಡಿತ್ತಿನ ಸ್ಕೂಟರ್‌ ಎಡ್ತ್‌ದ್ ಸ್ಕೂಟರ್‌ ದೊಟ್ಟುಗು ಬುಡೊಂದಿತ್ತಿನಾರ್ಲಾ ಸಾದಿಗ್ ದಕ್ಕ್‌ಲೆಕ ಆದ್ ಗಾತಿದ ಪೆಟ್ಟಾದಿತ್ತ್ಂಡ್. ಗಡಿಕುಲಾತಿನಾರೆನ್ ಅಪಗನೇ ಟಿಪ್ಪರ್‌ ಡ್ರೈವರ್ ಸೇರ್ದ್ ಅಲ್ಪ ಇತ್ತಿನಕುಲು ನಾಟೆಕಲ್‌ ಕಣಚೂರು ಆಸ್ಪತ್ರೆಗ್ ಸೇರಾದೆರ್, ಅಲ್ಪರ್ದ್ ಎಚ್ಚಿನ ಮರ್ದ್‌ಗ್ ಅಡ್ಯಾರ್‌ ಫಸ್ಟ್‌ ನ್ಯೂರೋ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್.
ಕುಡ್ಲಡ್ ಎ.ಸಿ ಮೆಕ್ಯಾನಿಕ್‌ ಆದಿತ್ತಿನ ಗಣೇಶ್‌, ಇಲ್ಲದ ಮಲ್ಲ ಮಗೆ ಆದಿತ್ತ್‌ದ್, ಜೀವನಾಧಾರ ಆದಿತ್ತೆರ್.