Last updated on July 25th, 2024 at 12:45 pm
ವಿಟ್ಲ: ವಿಟ್ಲ ಸ್ಟೇಶನ್ ಸೀಮೆದ ಕಳೆಂಜಿಮಲೆ ಕಾಪಿಕಾಡ್(ರಕ್ಷಿತಾರಣ್ಯ) ಅನೈತಿಕ ಬೇಲೆಲು, ಅಕ್ರಮ ದಂಧೆಲೆನ ಅಡ್ಡೆ ಆವೊಂದುಂಡು. ಕೊಲ್ನಾಡ್ ಗ್ರಾಮೊದ ಸಾಲೆತ್ತೂರು-ಕುಡ್ತಮುಗೇರ್‌ಡೆ ಆದ್ ಕನ್ಯಾನ ಪೋಪುನ ಕಾಂಕ್ರೀಟ್ ಸಾದಿ ಕಳೆಂಜಿಮಲೆ ರಕ್ಷಿತಾರಣ್ಯೊಡೆ ಆದ್ ಪೋಪುಂಡು. ಆಂಡ ದಿನ ಇಡೀ ರಕ್ಷಿತಾರಣ್ಯ ಪ್ರದೇಶೊಡು ರಾಜಾರೋಷವಾದ್ ಪರೊಂದು, ಡ್ರಗ್ಸ್ ದೆತೊನೊಂದು ಚಾಲಿಪೋಲಿಲು ಅನೈತಿಕ ಬೇಲೆಲೆನ್ ಮಲ್ತೊಂದು ಜನ ಸಾಮಾನ್ಯೆರೆಗ್ ಮಾನಸಿಕ ಹಿಂಸೆ ಕೊರೊಂದುಲ್ಲೆರ್.
ರಕ್ಷಿತಾರಣ್ಯದ ಮುದೆಲ್‌ದ ಕುಳಾಲ್, ಕುದ್ರಿಯ, ಮಂಕುಡೆ, ಕೋಜಿಗುರಿ ಬೊಕ್ಕ ಕುಂಟ್ರಕಳತಂಚಿದ ಪಾಕ ವಿದ್ಯಾರ್ಥಿಲು ಕನ್ಯಾನ, ವಿಟ್ಲ, ಮುಡಿಪು ಶೈಕ್ಷಣಿಕ ಸಂಸ್ಥೆಲೆಗ್ ಪೋಪೆರ್. ಅತ್ತಂದೆ ಪಾಕ ಗಾಡಿಲುಲಾ ಉಂದೇ ಸಾದಿಡೆ ಪೋಪ. ಅವೆನ್ ಒವೆನ್ಲಾ ಗೆನ್ಪಂದೆ ಅಮಲ್‌ಡ್ ರಾಪುನ ಚಾಲಿಪೋಲಿಲು ಅನೈತಿಕ ಚಟುವಟಿಕೆ ಮಲ್ತೊಂದುಪ್ಪುನ ಮುಲ್ಪದಕಲೆಗ್ ಬಾರೀ ಪೊಕ್ಕಡೆ ಆಯೆರೆ ನೆವನ ಆತ್ಂಡ್.
ಅಪ್ರಾಪ್ತ ಪೊಣ್ಣನೊರ್ತಿನ್ ರಕ್ಷಿತಾರಣ್ಯೊಗು ಬೈಕ್‌ಡ್ ಒರಿ ಲೆತೊಂದು ಬತ್ತ್‌ದೆ ಪನ್ಪಿ ಸುದ್ದಿ ತೆರಿನನೇ ಊರ್‌ದ ಜನ ಸೇರ್ದ್ ನಾಡ್ರೆ ಪತ್ತ್‌ದೆರ್. ಜನ ನಾಡೊಂದುಪ್ಪುನ ತೆರಿದ್ ಮೆಯಿಟ್ ಸಮ ಕುಂಟಿಜ್ಜಂದಿನ ಜೋಡಿಲು ಅಲ್ಪನೇ ಬೈಕ್, ಕುಂಟು, ಜೋಡು, ಒಟ್ಟುಗು ಪೊರ್ತು ಕಲೆಯೆರೆ ಕನತಿನ ಬೇತೆ ಸೊತ್ತುಲೆನ್ ಮಾತಾ ಅವುಲೇ ಬುಡುದು ಪದ್ರಾಡಾತೆರ್. ಸಾರ್ವಜನಿಕೆರೆ ಒಲವು ಗೆತೊಂದು ಜಾಗೆಗ್ ಬತ್ತಿನ ಪೊಲೀಸೆರ್ ರಕ್ಷಿತಾರಣ್ಯೊಡು ಪರಕ್ಕೊಲಿ ಲೆಕ ಇತ್ತಿನ ಬೈಕ್, ಪೊಣ್ಣನ ಬ್ಯಾಗ್‌, ಅಮಲ್ ಏರಾವುನ ಮಾತ್ರೆಲು, ಕಾಂಡೋಮ್‌ಲೆನ್ ಬೊಕ್ಕ ಜೋಡುಲೆನ್ ವಶೊಕು ಗೆತೊಂದೆರ್.
ಇತ್ತೆ ಪೊಲೀಸೆರ್ ಪೊಣ್ಣನ ಅಂಚೆನೇ ಜವನನ ಬಗೆಟ್ ಒಲವು ಒಟ್ಟು ಮಲ್ತೊಂದಿತ್ತ್‌ದ್ ನನ ಆಂಡಲಾ ರಕ್ಷಿತಾರಣ್ಯ ಇಂಚಿನ ಚಾಲಿಪೋಲಿಲೆರ್ದ್ ಮುಕ್ತ ಆವಡ್ ಪಂದ್ ಜನ ಒಸ ಪತ್ತ್‌ದೆರ್.