Last updated on August 6th, 2024 at 10:24 am
ಬಂಟ್ವಾಳ: ಬಂಟ್ವಾಳ ಪುರಸಭೆತ ಸೀಮೆಡ್ ವಾಣಿಜ್ಯೊ, ರಾಜಕೀಯೊ, ಶೈಕ್ಷಣಿಕೊ ಬೊಕ್ಕ ಸಾಮಾಜಿಕೊ ಉದ್ದೇಶೊದ ಬ್ಯಾನರ್/ ಪ್ಲೆಕ್ಸ್‌ಲೆನ್ ಅನು ದಾಂತೆ ಪಾಡೊಂದಿತ್ತ್‌ದ್, ಗಾಳಿ- ಬರ್ಸೊಗು ಗಾಡಿಡ್ ಪೋಪುನಕಲೆನ, ನಡತೊಂದು ಪೋಪುನಕಲೆನ ಮಿತ್ತ್ ಬೂರ್ದ್ ಪಡಾಯಿ ಆಪಿನ ಸಾಧ್ಯತೆ ಇಪ್ಪುನೆರ್ದಾವರ ಜಿಲ್ಲಾಧಿಕಾರಿಲೆನ ಆದೇಶೊದಂಚ ಪುರಸಭೆತ ಕಡೆರ್ದ್ ದೆಪ್ಪಾದೆರ್. ಆಂಡಲಾ ಅಲ್ಪಲ್ಪ ಅನುದಾಂತೆ ಪಾಡೊಂದುಪ್ಪುನ ತೋಜಿದ್ ಬರೊಂದುಂಡು. ನನದ ದಿನೊಟು ಇಂಚ ಬ್ಯಾನರ್-ಪ್ಲೆಕ್ಸ್ ಲೆನ್ ಪಾಡುನ ತೋಜಿದ್ ಬತ್ತ್ಂಡ ಅಂಚಿನ ವಾಣಿಜ್ಯ ಮಳಿಗೆಲೆನ ಮಾಲಕೆರ್, ಕಾರ್ಯಕ್ರಮ ಆಯೋಜಕೆರೆ ಮಿತ್ತ್ ಬೊಕ್ಕ ಬ್ಯಾನರ್ ಮಲ್ತ್‌ದ್ ಪಾಡುನ ಸಂಸ್ಥೆದಕಲೆನ ಮಿತ್ತ್ ಒಯಿಲ್ ಬರೆದ್ ಮೊಕದ್ದಮೆ ಪಾಡುವ ಪಂದ್ ಪುರಸಭೆತ ಮುಖ್ಯಾಧಿಕಾರಿಲು ಪ್ರಕಟಣೆಡ್ ತೆರಿಪಾದೆರ್.