ಒಡಿಪು : ಕೊರಗೆರೆನ ಬೇಡಿಕೆನ್ ತೂವೊನರೆ ಮಿತ್ತ್‌ರ್ದ್ ಸಮಿತಿ ಮಲ್ಪುವ

Last updated on August 1st, 2024 at 11:22 am

ಕೊರಗ ಅಭಿವೃದ್ದಿ ಸಂಘೊಲೆನ ಒಕ್ಕೂಟೊರ್ದು ಕೊರಗ ಸಮುದಾಯದ ಭೂಮಿ ಹಕ್ಕ್, ಬೇಲೆ ಅಂಚೆನೆ ಬೇತೆ ಬೇತೆ ಬೇಡಿಕೆ ದೀವೊಂದು ಕರಿನ 10 ದಿನೊರ್ದು ಜಿಲ್ಲಾಧಿಕಾರಿಲೆನ ಕಛೇರಿದ ಎದುರು ಪ್ರತಿಭಟನೆ ಮಲ್ತೊಂದಿಪ್ಪುನ ಜಾಗೆಗ್ ವಿಧಾನಸಭೆತ ಸ್ಪೀಕರ್ ಯು.ಟಿ ಖಾದರ್ ಮೇರ್ ಬುದಾರ ಭೇಟಿ ಕೊರ್ದು ಅಕಲೆಡ ಮನವಿ ದೆತೊನ್ಡೆರ್.

ಬರ್ಪಿ 15 ದಿನತ ಉಲಯಿ ಈ ದಿಸೆಟ್ ಉನ್ನತ ಅಧಿಕಾರಿಲೆನ ಸಭೆ ಮಲ್ಪುನ ಭರವಸೆ ಕೊರಿಯೆರ್. ಕೊರಗ ಸಮುದಾಯದಕಲೆನ ವಿದ್ಯಾರ್ಹತೆದ ಬಗೆಟ್ ಒಲವು ದೆತೊನ್ದು ಅವೆತ ಆಧಾರೊಡು ಬೇಲೆ ದೆಪ್ಪಾದ್ ಕೊರ್ಪಿನ ಬಗೆಟ್ ಸಿಎಂನೊಟ್ಟುಗು ಚರ್ಚೆ ಮಲ್ಪುವ ಪನ್ದ್ ಪನ್ಡೆರ್.

ಒಕ್ಕೂಟದ ಸುಶೀಲಾ ನಾಡ ಮೇರ್ ಪಾತೆರ್ದ್ ಬೇಲೆಡ್ ಪ್ರಾತಿನಿಧಿಕ ಮೀಸಲಾತಿ ಕೊರೊಡು. ಕೊರಗೆರ್ನ ಜನಸಂಖ್ಯೆ ಮಸ್ತ್ ತಿರ್ತ್ ಪೋವೊಂದುಂಡು. ಬೆನ್ನಿಗ್ ಭೂಮಿ ಬೊಕ್ಕ ಉದ್ಯೋಗ ಭದ್ರತೆ ಸರಕಾರ ಕೊರೊಡು ಇಜಿಂಡ ಸ್ನಾತಕೋತ್ತರ ಪದವಿ ಮಲ್ದಿನ ಜೋಕುಲೆನ್ ಇಲ್ಲದಕುಲು ಬುಟ್ಟಿ ನೆಯ್ದ್ ಸಾಂಕುನ ಪರಿಸ್ಥಿತಿ ಬರ್ಪುಂಡು ಪನ್ದ್ ಪನ್ಡೆರ್.