Last updated on August 23rd, 2024 at 02:19 pm
ಪಡ್ಡೆದ್ರ- ಕಾರ್ಲ ರಾಜ್ಯ ಪೆರ್ಸಾದಿದ ಕಂಚಿನಡ್ಕದಲ್ಪ ಟೋಲ್‌ ಗೇಟ್‌ ಕಟ್ಟುನೆನ್ ವಿರೋಧಿತ್‌ದ್ ಟೋಲ್ಗೇಟ್ ವಿರೋಧಿ ಹೋರಾಟ ಸಮಿತಿ ದ ಕಡೆರ್ದ್ ಆ.24 ತಾನಿ ಕಾಂಡೆ 9.30 ಕ್ಕ್ ಮಲ್ಲ ಪ್ರತಿಭಟನಾ ಸಭೆ ನಡಪೆರೆಗುಂಡು.
ಸಮಿತಿದ ಗುರ್ಕಾರೆ ನಂದಳಿಕೆ ಸುಹಾಸ್‌ ಹೆಗ್ಡೆರ್ ಗುರುವಾರ ಸುದ್ದಿಗೋಷ್ಠಿ ಮಲ್ತ್‌ದ್, ಪ್ರತಿಭಟನಾ ಸಭೆಟ್ ಕಾರ್ಲ, ಪಡ್ಡೆದ್ರ ರಾಜ್ಯ ಪೆರ್ಸಾದಿದ ಮಿತ್ತ್ ತಾಂಗ್‌ದುಪ್ಪುನ ಸುಮಾರ್ 40 ರ್ದ್‌ಲಾ ಎಚ್ಚಿನ ಊರುಲೆನ ಜನೊಕುಲು, ಮಾತಾ ರಾಜಕೀಯ ಪಕ್ಷೊಲೆನ ಮುಖಂಡೆರ್, ಧಾರ್ಮಿಕ ಮುಖಂಡೆರ್, ಜಾತಿ ಸಂಘಟನೆಲು, ಸಾಮಾಜಿಕ ಸಂಘಟನೆಲು, ಸಮಾಜ ಸೇವಾ ಸಂಸ್ಥೆಲು, ಉದ್ಯಮಿಲು, ವರ್ತಕೆರ್, ಬಸ್‌, ರಿಕ್ಷಾ, ಟ್ಯಾಕ್ಸಿ ಡ್ರೈವರ್, ಓನರ್, ಬೆನ್ನಿದಕುಲು ಸೇರ್ದ್ ಮಾತಾ ವರ್ಗೊದ 10,000 ರ್ದ್‌ಲಾ ಎಚ್ಚ ಜನ ಸೇರ್ಯೆರ ಉಲ್ಲೆರ್ ಪಂದ್ ಪಂಡೆರ್.
ಈ ಪೆರ್ಸಾದಿಡ್ ಕರಿನ 11 ವರ್ಸೊಗು ಪಿರವು ರಾಜ್ಯ ಸರಕಾರೊದ ಕೊಪ್ಪರಿಗೆರ್ದ್ 61 ಕೋಟಿ ರೂ. ಕರ್ಚಿಡ್ ಆರ್‌.ಎಸ್‌. ಸಂಸ್ಥೆರ್ದ್ ಸುಮಾರ್ 28 ಕಿ.ಮೀ. ಉದ್ದೊದ ಸಾದಿನ್ ಅಭಿವೃದ್ಧಿ ಮಲ್ತಿತ್ತ್ಂಡ್. ಬೇಲೆ ಮುಗಿದ್ 11 ವರ್ಸ ಕರಿದ್ ಇತ್ತೆ ಒರರ್ದ್ ಒರಾನೆ ಹಾಸನೊದ ಭಾರತೀ ಕನ್‌ಸ್ಟ್ರಕ್ಷನ್‌ ಪನ್ಪಿನ ಖಾಸಗಿ ಸಂಸ್ಥೆ ಪಡ್ಡೆದ್ರದ ಮುಟ್ಟಡ್ ಕಂಚಿನಡ್ಕಡ್ ಟೋಲ್‌ ಗೇಟ್‌ ಕಟ್ಟೆರೆ ‘ಗುದ್ದಲಿ ಪೂಜೆ’ ಮಲ್ದ್ಂಡ್. 2018 ಡ್ ಬೊಳ್ಮಣ್‌ಡೆ ಟೋಲ್ಗೇಟ್ ಕಟ್ಟುನ ಪ್ರಸ್ತಾವಣೆ ಬನ್ನಗ ನೇಲ್ಯ ಜನಾಂದೋಲನ ಮಲ್ತ್‌ದ್ ಯೋಜನೆನ್ ಪಿರದಕ್ಕ್‌ದಿತ್ತ್ಂಡ್. ಇತ್ತೆ ಪಿರ ಟೋಲ್‌ ಗೇಟ್‌ ಸುದ್ದಿ ಮಲ್ತೊಂದುಂಡು. ಉಂದೆತ ವಿರುದ್ದ ಪಕ್ಷಾತೀತಾವಾದ್ ಪೊರ್ಮ್ಬಾಟ ನಡಪುಂಡು ಪಂದ್ ಪಂಡೆರ್.
ಸುದ್ದಿಗೋಷ್ಟಿಡ್ ಸಮಿತಿದ ಗೌರವಾಧ್ಯಕ್ಷೆ ಲಕ್ಷ್ಮಣ್‌ ಎಲ್‌.ಶೆಟ್ಟಿ, ಪ್ರಮುಖೆರಾಯಿನ ಶಶಿಧರ್‌, ದಿನೇಶ್‌ ಕೋಟ್ಯಾನ್‌, ಜಯ ಎಸ್‌.ಶೆಟ್ಟಿ, ಸರ್ವಜ್ಞ ತಂತ್ರಿ ಒತ್ತುಪಾಲ್‌ಡಿತ್ತೆರ್.