Last updated on August 4th, 2024 at 05:01 pm
ಪಜ್ಜಿ ಮಾಸೊನು ತಜೆತ್ಂಡ್ ಅವೆಟ್ ಉರ್ಕಾರುನ ನೆತ್ತೆರ್ ಬರ್ಪುಂಡು, ಆಂಡ ತಜೆತಿನೆನೇ ಕುಡ ಕುಡ ತಜೆತ್ಂಡ ನೆತ್ತೆರ್ದ ತ್ರಾನ ದಾಂತೆ ಕಡೆಕ್ ಪುಡಿ ಕುರಿಯರೆ ಪತ್ತುಂಡು. ಯಾನ್ ಈ ಮಣ್ಣ್ ಡ್ ಪುಟ್ಟೊಡುಂದು ಕೇನ್ದ್ ಪುಟ್ಟಿನಿ ಅತ್ತ್, ಈ ಮಣ್ಣ್ ರೆಂಕೊಡು ಪನ್ದ್ ಬಯಕ್ ದ್ ಬತ್ತಿನಿಲಾ ಅತ್ತ್, ಜನ್ಮ ಪುನರ್ಜನ್ಮ, ಕರ್ಮ ಪುಣ್ಯದ ನಂಬೊಲಿಗೆಲಾ ಇಜ್ಜಿ ಆಂಡ ಮೂಲು ಪುಟ್ಟಿನೇ ಈ ನೀರ ಪೊಲ್ಸಾ, ಈ ಮಣ್ಣ ಮಾಟನಾ ತುಳು ಪನ್ಪಿನ ನೆತ್ತೆರ್ ನರೊ ನರೊಟು ಪರತೊಂದುಂಡು. ಪುಟ್ಟಿ ಬೊಕ್ಕ ಒಂಜಿ ಅಸ್ಥಿತ್ವ ಬೋಡು, ಮಗೆ, ಪಲಯೆ, ಮರ್ಮಯೆ, ಬಂಟೆ, ಬಿರ್ವೆ ಪನ್ಪಿನವು ಅಸ್ಥಿತ್ವ ಅತ್ತ್. ಮಗೆ ಪನ್ಪಿನವು ಅಪ್ಪೆಮ್ಮೆ ಉಪ್ಪುನೇಟ, ಬೊಕ್ಕ ಅವ್ ಅಸ್ಥಿತ್ವ ಅಕಲೆನ ನೆಂಪುದಲೆಕ್ಕ ಮೆಲ್ಲ ಮೆಲ್ಲ ಮಾಜುಂಡು. ಬಂಟೆ, ಬಿರ್ವೆ ಪನ್ಪಿನ ಅಸ್ಥಿತ್ವೊಗು ಇತ್ತೆ ಬಿಲೆ ಇಜ್ಜಿ. ಏರೋ ದೀಯಿನ ಪುದರ್, ಏರೋ ತೂಪಾಯಿನ ತಾದಿ, ಏರೋ ಕಲ್ಪಾಯಿನ ಬರವುದ ಪಿರವು ದಕ್ಕ್ ದ್ ಪೋತಿನ ಅಸ್ಥಿತ್ವ ನಾಡೊಡು.
ತುಳುನಾಡ್ ಲಾ ಅಂಚೆನೆ, ತುಳುವೆಲಾ ಅಂಚೆನೆ. ವಾ ಅಸ್ಥಿತ್ವ ಉಂಡು ನಮಕ್? ತುಳುವೆರ್ ಅಸ್ಥಿತ್ವ ಕಲೆಯೊಂಡಿನಿ ಯಾಪ? ತುಳುವ ಬುಡಕಟ್ಟುಲೆನ ಆಳ್ವಿಕೆ ಅಂತ್ಯ ಆಯಿನಾನಿಯಾ? ಆಳುಪೆರೆನ ಮಿತ್ತ್ ಚೋಳೆರ್ ಆಕ್ರಮಣ ಮಲ್ತಿನಾನಿಯಾ? ಆಳುಪೆರ್ ಕನ್ನಡೆರೆನೊಟ್ಟುಗು ಮದಿಮೆ ಸಂಬಂದೊ ಬುಲೆಪಾಯಿನಾನಿಯಾ? ವಿಜಯನಗರದಕುಲು ತುಳುನಾಡ್ ನ್ ಗೆಂದಿನಪಗನೊ? ತುಳುವ ತುಂಡು ರಾಜೆರ್ ತನ್ಕುಲೆನ ನಡುಟೇ ಲಡಯಿ ಮಲ್ತೊನಿನಾನಿಯಾ? ಕೆಳದಿ ಇಕ್ಕೇರಿದಕುಲು ತುಳುನಾಡ್ ಗ್ ಬತ್ತಿನಾಯಿಯಾ? ಟಿಪ್ಪು ಸೋತಿನಾನಿಯಾ? ಬಾಸೆಲ್ ಮಿಷನ್ ದಕುಲು ಕನ್ನಡ ಪ್ರೆಸ್ ತುಳುನಾಡ್ ಡ್ ಕನತಿನಾನಿಯಾ? ತುಳು ಮೀಡಿಯಂ ಶಾಲೆಗ್ ತುಳುವೆರ್ ತನ್ನ ಜೋಕುಲೆನ್ ಕಡಪುಡಂದಿನಾನಿಯಾ? 1956ಟ್ಟ್ ತುಳುನಾಡ್ ನ್ ಕಡ್ತ್ ರಡ್ಡ್ ರಾಜ್ಯೊಗು ಪಟ್ಟಿನಾನಿಯಾ? 1997ಟ್ಟ್ ಒಟ್ಟುಗಿತ್ತಿನ ತುಳುವೆರೆನ್ ರಡ್ಡ್ ಭಾಗ ಮಲ್ತ್ ಕನ್ನಡ ಮೆಜಾರಿಟಿ ಒಡಿಪು ಜಿಲ್ಲೆ ಮಲ್ತಿನಾನಿಯಾ?
ಎನ್ನ ಅಜ್ಜ-ಪಿಜ್ಜಗ್ ದಾಂತಿನ ಅಸ್ಥಿತ್ವದ ಮರ್ಲ್, ಎನ್ನ ಅಪ್ಪೆ-ಅಮ್ಮಗ್ ದಾಂತಿನ ಅಸ್ಥಿತ್ವದ ಮಂಡೆಬೆಚ್ಚ ಎಂಕ್ ಒರಾನೆ ಒಲ್ತು ಬತ್ತ್ಂಡ್. ಎನ್ನ ಪೆರಿಯಾಕುಲು ಕಡಲ್ ಡ್ ಕಳೆಯೊಂಡಿನ ಸೊತ್ತುನು ಯಾನ್ ಕೆದುಟು ನಾಡೊಂದುಲ್ಲೆ ಪನ್ದ್ ಆವೊಂದುಂಡು. ಅಸ್ಥಿತ್ವ ಮಾಜಿದ್ ಪೋತುಂಡು, ತೋಜಂದಿನಾತ್ ದೂರ ಬತ್ತಾತ್ಂಡ್. ಪೊರುಂಬುಗಾ ಲಡಯಿ ಮಲ್ಪುಗಾ ಪನ್ನಗ ಆ ಬೆಚ್ಚ ನೆತ್ತೆರ್ ಇಜ್ಜಿ. ಊರಕಲೆನ ಜೋಕುಲೆನ್ ನೀರ್ ಗ್ ಜಪ್ಪಾದ್ ಗುಂಡಿ ಏತುಂಡು ಪನ್ದ್ ತೂಪಿನ ತುಳುವೆರೆನ ನಡುಟು ಏರೆನಲಾ ಜೋಕುಲೆನ್ ಬಲಿಪಶು ಮಲ್ಪೊಡು? ಕುಜಲ್ ನರೆಯೊಂದು ಬತ್ತ್ಂಡ್, ಜೀವನ ಕರಿದೇ ಪೋಂಡು, ಇತ್ತೆ ಪಿರ ಜಾರ್ಗ ಪನ್ನಗ ಪತ್ತಿ ಮರ್ಲ್ ಗ್ ಮರ್ದ್ ಇಜ್ಜಿ. ಧರ್ಮ, ಕೋಮು, ಕಾಮ ಉಂದೆತ ಅಮಲ್ ಪತ್ತ್ಂಡ ಅವೆರ್ದ್ ಪಿದಯಿ ಬರ್ರೆ ಆಪುಜಿ. ಅಂಚೆನೆ ಈ ಭಾಷೆ-ನಾಡ್ ದ ಮರ್ಲ್ ಲಾ.
ಅಸ್ಥಿತದ ಪೊಲಬು ತಿಕ್ಕೊಡಾಂಡ ಸ್ವಾತಂತ್ರ್ಯ ಬೋಡು. ತುಳುವೆರೆಗ್ ನಿಜವಾದ್ಲಾ ಸ್ವಾತಂತ್ರ್ಯ ಬೈದ್ಂಡಾ? ತನ್ಕುಲೆನ ಬಾಸೆಡ್ ಕಲ್ಪುನ ಸ್ವಾತಂತ್ರ್ಯ? ತನ್ಕುಲೆನ ಬಾಸೆಡ್ ಆಡಳಿತ ಮಲ್ಪುನ ಸ್ವಾತಂತ್ರ್ಯ? ದಾದ ಉಂಡು ನಮಕ್? ಸಾಂವಿಧಾನಿಕ ಸ್ವಾತಂತ್ರ್ಯ ಉಂಡು ಆಂಡ ಮಾನಸಿಕವಾದ್ ನಮ ನನಲ ಗುಲಾಮೆರ್. ನಮ ಗುಲಾಮೆರ್ ಪರಿಸ್ಥಿತಿಗ್, ನಮ ಗುಲಾಮೆರ್ ನಮ್ಮ ಜಾತಿ, ನೀತಿ, ರಾಜಕೀಯ ಬೊಕ್ಕ ವ್ಯವಹಾರೊಗು. ಇನಿ ಉಂದು ಮಾತೆತ್ತ ನಡುಟು ತುಳುನಾಡ್ ನರಕಿನ, ಮೊರೆಡಿನ, ಬುಲ್ತಿನ ತೋಜಿಜಿ. ಬಡಕಾಯಿಡ್ ಒಂಜಿ ಉದಲ್ ಅದೋಟೇ ತಿನೊಂದುಂಡು. ತೆನ್ಕಾಯಿಡ್ ಮರ ತುರಿದ್ ಬೂರ್ದುಂಡು, ಪಡ್ಡಾಯಿಡ್ ಕಡಲ್ ದಿಂಗೊಂದುಂಡು. ಮೂಡಾಯಿಡ್ ತುಳುವೆರೆ ದೊಂಡೆಡ್ ಬೇತೆ ಪದ ಪಾಟೊಂದುಂಡು. ತುಳು ಒಲ್ಪ ಒರಿಯುಂಡು?
ಎಲ್ಯ ಉಪ್ಪುನಗ ಎನ್ನೊಂದಿತ್ತೆ ತುಳುವೆರ್ ಒಂಜಾಪೆರ್ ಎನ್ನ ಜೋಕುಲೆಗಾಂಡಲಾ ಶಾಲೆಡ್ ತುಳುನು ಸುರುತ ಬಾಸೆ ಕಲ್ಪುರೆ ತಿಕ್ಕು. ಎನ್ನ ಊರುದ ಪಂಚಾಯತಿಡ್, ಕುಡ್ಲ ನಗರ ಪಾಲಿಕೆಡ್ ತುಳು ಕೇನರೆ ತಿಕ್ಕು ಪನ್ದ್. ಆಂಡ ಇತ್ತೆ ಈ ಅಜ್ಪ ವರ್ಸೊಡು ಆ ಆಸೆಲು ನನ ನಿಜ ಆಪುಜಿ ಪನ್ದ್ ಅರ್ಥ ಆತ್ಂಡ್. ತುಳುವೆರ್ ನನಲ ಕೆಸರ್ದ ಆಟ, ಏರೆನೆರೆನ್ ಮೆಚ್ಚಾವರೆ ತುಳುವ ದೊಂಬರಾಟೊನು ಪರಊರುಡು ಮಲ್ಪುನತ್ತಂದೆ ಬೇತೆ ದಾಲಾ ಮಲ್ಪುಜೆರ್ ಪನ್ದ್. ಯಾನ್ ಪುಟ್ಟುನಗ ತುಳುನಾಡ್ ಅಸ್ಥಿತ್ವ ಇತ್ತಿಜಿ, ಯಾನ್ ಜೀವನ ಇಡೀ ಅಂಬಿಡ್ ಕುಲ್ಲೊಂದು ದಂಡಿಗೆಡ್ ಮೆರೆಪಿನ ಕನ ಕಟ್ಟಿಯೆ. ಎನ್ನ ಇಲ್ಲದ ಕಂಡಿದ ಪಿದಯಿ ಒಂಜಿ ಪರ ಕುಕ್ಕುದ ಮರ ತೋಜೊಂದುಂಡು, ಸುಮಾರ್ 70-80 ವರ್ಸ ಪರತ್. ಆ ಮರ ಮಾತಲಾ ತೂತುಂಡು, ತುಳುನಾಡ್ ತುಂಡಾಯಿನ ತುಳುನಾಡ್ ಕರವೊಂದು ಪೋಯಿನ. ಎನ್ನ ಕಾಲ ಕರಿನಗ ಈ ಮರ ಕಡ್ತ್ ಎನ್ನ ಕಾಟೊಗು ದೀನಗ ಆ ಗೋರಿನ ಕಾಟದ ಮಣ್ಣ್ ಸ್ವಂತೊದ, ಎನ್ನ ತುಳು ರಾಜ್ಯದ, ಎನ್ನ ತುಳುನಾಡ್ ದ ಆದಿಪ್ಪು ಪನ್ದ್ ಎನ್ನೊಂದಿತ್ತೆ. ಆಂಡ ಅವ್ ಆಯಿಜಿ.. ಆಪಿನಿಲಾ ಇಜ್ಜಿ. ಈ ಅಸ್ಥಿತ್ವ ದಾಂತೆ ಜೀವನ ಇಡೀ ನಾಡಿನವು ಎಂಕೇ ಉಪ್ಪಡ್, ಎನ್ನೊಟ್ಟುಗೇ ಉಂದು ಅಗಪಡ್. ಎನ್ನ ಪುಟ್ಟುಗು ಅಸ್ಥಿತ್ವ ಇಜ್ಜಿ, ಎನ್ನ ಸಾವುಡ್ಲಾ ಎಂಕ್ ಅಸ್ಥಿತ್ವ ದಾಂತಿಲೆಕ್ಕ ಆಂಡ್. ಎನ್ನ ಗೋರಿಡ್ ಬರೆಲೆ “ಸ್ವಂತ ರಾಜ್ಯ ದಾಂತಿನ, ಸ್ವಾಭಿಮಾನ ದಾಂತಿನ, ತುಳುನಾಡ್‌ಗಾದ್ ಪೊರುಂಬರೆ ಆವಂದಿನ, ಅಸ್ಥಿತ್ವದಾಂತಿನ “ತುಳುವೆ””.