Last updated on August 31st, 2024 at 07:04 pm
ಒಡಿಪು: ಒಡಿಪು ಮೂಲೊದ ಪೊಂಜೊವು ಜೆಡಿಎಸ್ ಅಲ್ಪಸಂಖ್ಯಾತೆರೆ ಘಟಕೊದ ರಾಜ್ಯ ಕಾರ್ಯಾಧ್ಯಕ್ಷೆದಿ ಪಂದ್ ಪನೊಂದು 8 ಮದಿಮೆ ಆದ್ ಕೋಟಿಗಟ್ಲೆ ರೂಪಾಯಿ ದಗೆ ಮಲ್ದಿನ ನಡಕೆ ಬೊಲ್ಪುಗ್ ಬೈದ್ಂಡ್.
ತನನ್ ಜೆಡಿಎಸ್ ಅಲ್ಪಸಂಖ್ಯಾತೆರೆ ಘಟಕೊದ ರಾಜ್ಯ ಕಾರ್ಯಾಧ್ಯಕ್ಷೆದಿ ಪಂದ್ ಪಂಡೊನುನ, ಒಡಿಪು ನಿವಾಸಿ ತಬುಸುಮ್ ತಾಜ್ (40) ಪನ್ಪಿನಾಲ್ ಇದಮುಟ್ಟ 8 ಜನನ್ ಮದಿಮೆ ಆದ್ ದಗೆ ಮಲ್ದಿನ ಪ್ರಕರಣ ಬಳ್ಳಾರಿಡ್ ನಡತ್‌ದ್ಂಡ್. ಅತ್ತಂದೆ ಪಾಕ ಜನಕ್ ಲೋನ್ ದೆಪ್ಪಾದ್ ಕೊರ್ಪೆ ಪಂಡ್‌ದ್ ಈ ಪೊಂಜೊವು ಕೋಟಿ ಕೋಟಿ ರೂಪಾಯಿ ನಾಮ ಪಾಡ್ದಲ್ ಪಂದ್‌ಲಾ ಪನೊಂದುಲ್ಲೆರ್.
ಮದಿಮೆ ಆದ್ ಬೊಡೆದಿರ್ದ್ ದೂರ ಇತ್ತ್‌ದ್ ಎಡ್ಡೆ ಕಾಸ್ ಇತ್ತಿನಂಚಿನ ಆಂಜೋವುಲೆನೇ ಮೋಲು ಟಾರ್ಗೆಟ್ ಮಲ್ತೊಂದಿತ್ತಲ್. ಹೀನಾ ಎಂಟಪ್ರೈಸಸ್ ಪನ್ಪಿ ಆಫೀಸ್ ಮಲ್ತೊಂದು ಮುದ್ರಾ ಲೋನ್, ಸರ್ಕಾರಿ ಬೇಲೆ, ಮೈನಾರಿಟಿ ಲೋನ್, ವಿದ್ಯಾರ್ಥಿಲೆಗ್ ಸ್ಕಾಲರ್ ಶಿಪ್ ಕೊರ್ಪಾವೆ ಪಂಡ್‌ದ್ ಕಚೇರಿ ನಡಪಾವೊಂದಿತ್ತಲ್. 18 ವರ್ಸೊರ್ದು ಉಂದೆನೇ ಬ್ಯುಸಿನೆಸ್ ಮಲ್ತೊಂದಿತ್ತಲ್. ಆತೇ ಅತ್ತಂದೆ ಯು.ಟಿ. ಖಾದರ್‌ರೆಡ ಬ್ಲ್ಯಾಕ್ ಮನಿ ಉಂಡು, ಅವೆನ್ ವೈಟ್ ಮನ್ಪೆರೆ ಈ ಬ್ಯುಸಿನೆಸ್ ಮಲ್ತೊಂದುಲ್ಲ ಪಂಡ್‌ದ್ ಜನೊಕ್ಲೆನ್ ನಂಬಾದಿತ್ತಲ್.
1 ಕೋಟಿ ರೂ. ಲೋನ್ ಬೋಡಾಂಡ 15 ಲಕ್ಷ ರೂ. ಕೊರೊಡು ಪಂದ್ ಕೇನೆದಲ್. 10 ದಿನೊಟು ಲೋನ್ ತಿಕ್ಕುಂಡು ಪಂದ್ ಪಾತೆರ ಕೊರ್ದು ಮಂಗೆ ಮಲ್ತೊಂದಿತ್ತಲ್. ರಾಜ್ಯೊಡೊರ್ಮೆ 38 ಕೋಟಿ ರೂ.ಗ್ಲಾ ಎಚ್ಚಿನ ಕಾಸ್ ಅವೇತೋ ಜನಕ್ ನಾಮ ಪಾಡ್ದಲ್ ಪಂದ್ ತೆರಿದ್ ಬೈದ್ಂಡ್. ಕ್ರಿಮಿನಲ್ ಲಾಯ‌ರ್‌ ಮುಕೇನ ಕಾಸ್ ಪಿರ ಕೇಂಡಿನಕ್ಲೆಗ್ ಕೇಸ್ ಪಾಡುನ ಪೋಡಿಗೆ ಕಟ್ಟಾವೊಂದಿತ್ತಲ್.
ಆತೇ ಅತ್ತಂದೆ ಚೆಕ್ ಬರೆಪಾವೊಂದು ಚೆಕ್ ಬೌನ್ಸ್ ಕೇಸ್ ಪಾಡುನ ಬೆದರಿಕೆಲಾ ಪಾಡೊಂದಿತ್ತಲ್ ಪಂದ್ ತೆರಿದ್ ಬೈದ್ಂಡ್. ಮೋಲೆನ ದಗೆಕ್ಲೆನ ಇಸಯ ತೆರಿನೇ 6ನೇ ಕಂಡನಿ ರಾಜಾಹುಸೇನ್ ಪೊಂಜೊವುನು ಪ್ರಶ್ನೆ ಮಲ್ತಿತ್ತ್‌ದ್, ಆಯನ ಮಿತ್ತ್‌ಲಾ ಕೇಸ್ ಪಾಡುನ ಬೆದರಿಕೆ ಪಾಡ್ದಿತ್ತಲ್ ಪಂದ್ ತೆರಿದ್ ಬೈದ್ಂಡ್. ಇತ್ತೆ ಪೊಲೀಸೆರ್ ಜಡ್ತೆ ಸುರು ಮಲ್ದೆರ್.