Last updated on August 5th, 2024 at 10:22 am
ಕುಡ್ಲ: ಕಾಡ್‌ಗ್ ಲೆತೊಂದುಪೋದು ಅಪ್ರಾಪ್ತ ಪೊಣ್ಣನ ಮಿತ್ತ್ ಅತ್ಯಾಚಾರ ಣಲ್ತಿನ ಆರೋಪ ಸಾಬೀತ್ ಆಯಿನೆರ್ದಾವರ ಆರೋಪಿಗ್ ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ, ಎಫ್‌ಟಿಎಸ್‌ಸಿ-2 ಪೋಕ್ಸೋ ವಿಶೇಷ ನ್ಯಾಯಂತಡೆ 20 ವರ್ಸೊ ಕಠಿಣ ಶಿಕ್ಷೆ ಕೊರ್ತುಂಡು.
ಬೊಲ್ತೇರ್ ತಾಲೂಕ್ ಕೊಕ್ರಾಡಿಯ ಯೋಗೀಶೆ (26) ಶಿಕ್ಷೆ ಆತಿನ ಅಪರಾಧಿ
2020ಡ್ ಆರೋಪಿ ಪೊಣ್ಣನ್ ಎಂಚನೋ ಮಲ್ತ್‌ದ್ ಕಾಡ್ ಜಾಗೆಗ್ ಲೆತೊಂದು ಪೋದು ಅತ್ಯಾಚಾರ ಮಲ್ತ್ ಬಂಜಿ ಬರ್ಪಾದಿತ್ತೆ. ಆ ಪೊಣ್ಣು ಬಂಜಿನಾಲಾದ್ ಒಂಜಿ ಪೊಣ್ಣು ಬಾಲೆನ್ಲಾ ಪೆದ್ದ್‌ದಲ್. ಈ ಬಗೆಟ್ ಬೊಲ್ತೇರ್ ಸ್ಟೇಷನ್‌ಡ್ ಪ್ರಕರಣ ದಾಖಲಾದ್ ಪೊಲೀಸ್ ವೃತ್ತ ನಿರೀಕ್ಷಕೆ ಶಿವಕುಮಾರ್ ಬಿ. ಜಡ್ತೆ ಮಲ್ತ್‌ದ್ ಚಾರ್ಜ್‌ಶೀಟ್ ಸಂದಾದಿತ್ತೆರ್.
ಪ್ರಕರಣೊನು ಗೆತೊಂಡಿನ ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಾಲಯ, ಎಫ್‌ಟಿಎಸ್‌ಸಿ-2 ಪೋಕ್ಸೋ ವಿಶೇಷ ನ್ಯಾಯಂತಡೆ ವಿಚಾರಣೆ ಮಲ್ತಿತ್ತ್ಂಡ್. 13 ಸಾಕ್ಷಿದಾರೆರೆನ್ ವಿಚಾರಿತ್‌ದ್ 29 ದಾಖಲೆಲೆನ್ ಗುರ್ತ ಮಲ್ತ್‌ತ್ತೆರ್. ಡಿಎನ್ಎ ವರದಿಲು, ಸಾಕ್ಷ್ಯ, ಪೂರಕ ಸಾಕ್ಷ್ಯೊಲೆನ್ ಲೆಕ್ಕೊಗು ಗೆತೊಂದು ಅಂಚೆನೇ ವಾದ ವಿವಾದೊಲೆಗ್ ಕೆಬಿ ಕೊರ್ದು ನ್ಯಾಯಂತಡೆ ಆರೋಪಿನ ವಿರುದ್ಧ ಅಪರಾಧ ಸಾಬೀತಾತ್ಂಡ್ ಪಂದ್ ತೀರ್ಮಾನ ಮಲ್ದ್ಂಡ್.
ಆ.2 ತಾನಿ ನ್ಯಾಯಾಧೀಶೆರಾಯಿನ ಮಾನು ಕೆ.ಎಸ್‌. ಮೇರ್ ಆರೋಪಿಗ್ IPC Section 376(2)(N) ಬೊಕ್ಕ section 6 ಪೋಕ್ಸೋ ಕಾಯ್ದೆದ ಪ್ರಕಾರ 20 ವರ್ಸೊದ ಕಠಿಣ ಶಿಕ್ಷೆ ಬೊಕ್ಕ 50,000 ರೂ. ಫೈನ್ ಪಾಡ್ದೆರ್. ಫೈನ್‌ದ ಕಾಸ್‌ನ್ ಅತ್ಯಾಚಾರ ಆತಿನ ಪೊಣ್ಣಗ್ ಕೊರ್ಪುಲೆಕ ಆದೇಶ ಮಲ್ದೆರ್. ಅತ್ತಂದೆ IPC Section 357 (A) ದ ಪ್ರಕಾರ ಬೊಕ್ಕ ಸಂತ್ರಸ್ತೆರೆ ಪರಿಹಾರ ಯೋಜನೆದ ಅಡಿಟ್ ಪೊಣ್ಣಗ್ ಎಚ್ಚಿಗೆದ 1,50,000 ರೂ. ಬಾಲೆಗ್ 3 ಲಕ್ಷ ರೂ. ಪರಿಹಾರ ಕೊರ್ಯೆರ ಕಾನೂನು ಸೇವಾ ಪ್ರಾಧಿಕಾರೊಗು ನಿರ್ದೇಶನ ಮಲ್ದೆರ್. ಸರಕಾರೊದ ಪರವಾದ್ ಕೆ ಬದರಿನಾಥ ನಾಯರಿ ವಾದ ಮಲ್ತಿತ್ತೆರ್.