Last updated on August 27th, 2024 at 03:10 pm
ಕುಡ್ಲ: ಚೆಕ್ ಬೌನ್ಸ್ ಪ್ರಕರಣೊಗು ಸಂಬಂಧಿತ್‌ದ್ ನಟಿ ಪದ್ಮಜಾ ರಾವ್‌ ಮೆರೆಗ್ ಕುಡ್ಲದ 8ನೇ ಜೆಎಂಎಫ್‌ಸಿ ನ್ಯಾಯಂತಡೆ ಮೂಜಿ ತಿಂಗೊಲು ಕರ್ಪಿಲ್ಲ ಶಿಕ್ಷೆ ಅಂಚೆನೇ 40.20 ಲಕ್ಷ ರೂ. ದಂಡ ಪಾಡ್ದ್ ಆದೇಶ ಕೊರ್ತುಂಡು.
ನಟಿ ಪದ್ಮಜಾ ರಾವ್‌ 40 ಲ.ರೂ ಕಡ ಗೆತೊಂದಿತ್ತೆರ್. ಉಂದೆಕ್ ಭದ್ರತೆಯಾದ್ 2020ರದ ಜೂನ್ 17 ತಾನಿ ಐಸಿಐಸಿಐ ಬ್ಯಾಂಕ್‌ದ ಬೆಂಗಳೂರ್‌ದ ಬನಶಂಕರಿ ಶಾಖೆಡುಪ್ಪುನ ತನ್ನ ಖಾತೆದ ಚೆಕ್ ಕೊರ್ದಿತ್ತೆರ್. ಈ ಚೆಕ್‌‌ಡ್ ಕಾಸ್ ದೆಪ್ಪೆರೆ ತೂನಗ ಆರೆನ ಖಾತೆಡ್ ಆತ್ ಕಾಸ್ ಇಜ್ಜಂಡ್. 15 ದಿನೊತ ಉಲಯಿ ಕಡತ ಕಾಸ್ ಕಟ್ಟೆರೆ 2020ರ ಜೂನ್ 30ದಾನಿ ಪದ್ಮಜಾ ರಾವ್‌ ಮೆರೆಗ್ ನೋಟಿಸ್‌ ಕೊರ್ದಿತ್ತ್ಂಡಲಾ ಆರ್ ಕಾಸ್ ಕಟ್ಟ್‌ದಿಜ್ಜಂಡ್ ಪಂದ್ ‘ವೀರೂ ಟಾಕೀಸ್‌’ ಸಂಸ್ಥೆದ ದನಿ, ಕುಡ್ಮೇಲ ರಿಹಿಲ್ ನಿವಾಸಿ ವೀರೇಂದ್ರ ಶೆಟ್ಟಿ ನ್ಯಾಯಂಯಡೆಕ್ ಒಯಿಲ್ ಬರೆದಿತ್ತೆರ್.
ಸಮನ್ಸ್‌ ಜಾರಿ ಆಯಿ ಬೊಕ್ಕ ವಿಚಾರಣೆಗ್ ನ್ಯಾಯಂತಡೆಕ್ ಹಾಜರಾದಿತ್ತಿನ ಪದ್ಮಜಾ ರಾವ್‌ ‘ಯಾನ್ ದೂರುದಾರೆರೆರ್ದ್ ಒವ್ವೇ ಕಡ ಗೆತೊಂದಿಜಿ ಅಂಚೆನೇ ಆರೆಗ್ ಒವ್ವೇ ಚೆಕ್ ಕೊರ್ತುಜಿ’ ಪಂದ್ ಪಂದಿತ್ತೆರ್.
52.70 ಲಕ್ಷ ರೂ. ದಗೆ ಮಲ್ತಿನ ಬಗೆಟ್ ವೀರೇಂದ್ರ ಶೆಟ್ರೆನ ವಿರುದ್ಧ ಬೆಂಗಳೂರ್‌ದ ಜೆ.ಪಿ.ನಗರ ಪೊಲೀಸ್ ಸ್ಟೇಶನ್‌ಡ್ 2020 ಮಾರ್ಚ್‌ 23 ತಾನಿ ಒಯಿಲ್ ಬರೆತಿನೆಕ್ ಪ್ರತಿಯಾದ್ ಎನ್ನ ಕಕ್ಷಿದಾರೆರೆ ವಿರುದ್ಧ ಈ ಆರೋಪ ಮಲ್ತೊಂದುಲ್ಲೆರ್. ಆರೆನ ಇಲ್ಲಲ್ದ್ ಚೆಕ್ ಕಂಡ್‌ದ್ ದಸ್ಕತ್‌ನ್ ಪೋರ್ಜರಿ ಮಲ್ದೆರ್’ ಪಂದ್ ಪದ್ಮಜಾ ರಾವ್‌ ಪರ ವಕೀಲೆರ್ ವಾದ ಮಲ್ತಿತ್ತೆರ್. ಆಂಡ, ಅವೆಕ್ ಬೋಡಾಪಿನ ಪುರಾಪುಲೆನ್ ಕೊರ್ದಿಜ್ಜಂಡ್.
8ನೇ ಜೆಎಂಎಫ್‌ಸಿ ನ್ಯಾಯಂತಡೆತ ನ್ಯಾಯಾಧೀಶೆರಾಯಿನ ಫವಾಜ್‌ ಪಿ.ಎ ಮೇರ್, ‘ಪದ್ಮಜಾ ರಾವ್‌ ಮೇರ್ 40.20 ಲಕ್ಷ ರೂ.ದಂಡ ಕಟ್ಟೊಡು. ಅವೆಟ್ 40.17 ಲ.ರೂ ದೂರುದಾರೆರೆಗ್ ಕೊರೊಡು. 3,000 ರೂ.ನ್ ಸರಕಾರೊಗು ಕಟ್ಟೊಡು ಪಂದ್ ಆದೇಶೊಡು ತೆರಿಪಾದೆರ್.