Last updated on August 8th, 2024 at 07:34 pm
ಪುತ್ತೂರು: ಅಶೋಕ್ ರೈಕುಲು ಪುತ್ತೂರು ಶಾಸಕೆರಾಯಿನ ಬೊಕ್ಕ ಒಂಜತ್ತ್ಂಡ ಒಂಜಿ ಪೊಸ ಸಾಧನೆಲೆನ್ ಮಲ್ತೊಂದೇ ಇತ್ತ್‌ದ್, ಮಾತಲಾ ಜನೋಪಯೋಗಿ ಬೇಲೆಲಾದಿತ್ತ್‌ದ್ ಇತ್ತೆ ಉದ್ಯೋಗ ಕ್ಷೇತ್ರೊಡ್ಲಾ ಶಾಸಕೆರೆ ಬೇಲೆ ಪುಗರೊಡಾಯಿನವು ಪಂದ್ ರೈ ಎಸ್ಟೇಟ್ಸ್ ಎಜುಕೇಶನಲ್ ಆಂಡ್ ಚಾರಿಟೇಬಲ್ ಟ್ರಸ್ಟ್‌ದ ಕಾರ್ಯಾಧ್ಯಕ್ಷೆ ಸುದೇಶ್ ಶೆಟ್ಟಿ ಪಂಡೆರ್.
ಶಾಸಕೆರೆ ಕಚೇರಿದ ಸಭಾಂಗಣೊಡು ನಡತಿನ ಉದ್ಯೋಗ ಮಾಹಿತಿ ಕಾರ್ಯಕ್ರಮೊದ ಉದಿಪನ ಮಲ್ತ್ ಪಾತೆರಿನ ಆರ್, ಪುತ್ತೂರುದ ಜವನೆರೆಗ್ ಬೇಲೆ ದೆಪ್ಪಾದ್ ಕೊರೊಡು, ಅಕುಲುಲಾ ಸ್ವಂತ ಕಾರ್‌ಡ್ ಉಂತುಲೆಕಾವೊಡು, ಕುಟುಮೊನು ತೂವೊನೊಡು ಪನ್ಪಿ ಉದ್ದೇಶೊಡು ಬೇಲೆ ನಾಡೊಂದು ಬರ್ಪಿನ ಜವನೆರೆಗ್ ಶಾಸಕೆರ್ ಮುಲ್ಪದ ಜವನೆರೆನೇ ಆ ಬೇಲೆಲೆಗ್ ನೇಮಕ ಮಲ್ತೊಂದುಲ್ಲೆರ್. ಈ ಸರ್ತಿ ಬೆಂಗ್ಳೂರ್‌ದ ಬಿಎಂಟಿಸಿಗ್ ಡ್ರೈವರ್ ಬೇಲೆಗ್ 50 ಜನ ಪುತ್ತೂರ್‌ದ ಜವನೆರೆಗ್ ಅವಕಾಶ ಕೊರೊಡು ಪಂಡ್‌ದ್ ಬಿಎಂಟಿಸಿಡ್ ಪಾತೆರ್ದೆರ್, ಅವೇ ಪ್ರಕಾರೊಡು ಪುತ್ತೂರು ಕೆಎಸ್‌ಆರ್‌ಟಿಸಿಡ್ 50 ಜನಕ್ ಬೇಲೆಲಾ ದೆಪ್ಪಾದ್ ಕೊರ್ತೆರ್. ಸುರೂತ ಮಟ್ಟ್‌ಡ್ 19 ಜನ ಅಭ್ಯರ್ಥಿಲು ಆ.12 ಕ್ ಬೇಲೆಗ್ ಸೇರ್ಯೆರೆ ಉಲ್ಲೆರ್ ಪಂದ್ ಪಂಡೆರ್.
ರೈ ಚಾರಿಟೇಬಲ್ ಟ್ರಸ್ಟ್ ಸೋಶಿಯಲ್ ಮೀಡಿಯಾ ಮುಖ್ಯಸ್ಥೆ ಕೃಷ್ಣಪ್ರಸಾದ್ ಬೊಳ್ಳಾವು ಪಾತೆರ್ದ್ ಬೆಂಗಳೂರು ಬಿಎಂಟಿಸಿಡ್ ಡ್ರೈವರ್ ಬೇಲೆ ತಿಕ್ಕುನು ಆತ್ ಸುಲಭ ಅತ್ತ್. ಶಾಸಕೆರ್ ಅಲ್ಪದ ಅಧಿಕಾರಿಲೆಡ ಪಾತೆರ್ದ್ ನಮ್ಮ ಜವನೆರೆನ್ ಸೇರಾವುನ ಬೇಲೆ ಮಲ್ದೆರ್. ಬೇಲೆಗ್ ಸೇರಿನೇ ಮಾತ ಪತ್ತೊಡೂಂದಿಜ್ಜಿ, ನಮ ಒಂತೆ ದಿನ ಸುದಾರ್ತೊಂದು ಪೋವೊಡಾವು. ಒವ್ವೇ ಸಮಸ್ಯೆ ಆಂಡಲಾ ಟ್ರಸ್ಟ್‌ದ ಪ್ರಮುಖೆರೆಗ್ ತೆರಿಪಾಂಡ ಯಾರು, ಎಂಕ್ಲ ನಿಕ್ಲೆಗ್ ಮಾತಾ ರೀತಿದ ಸಕಾಯ ಮನ್ಪುವ ಪಂದ್ ಪಂಡೆರ್. ಟ್ರಸ್ಟ್ ಸಿಬ್ಬಂದಿ ಲಿಂಗಪ್ಪೆರ್ ಎದುಕೊಂದು, ಸೊಲ್ಮೆ ಸಂದಾಯೆರ್.