Last updated on August 23rd, 2024 at 11:39 am
ಡಿವೋರ್ಸುಡು ಜೀವನಾಂಶದ ವಿಷಯೊಡು ಕಂಡನೆ ಒರಿಯಡ ತಿಂಗೊಲುಗು 6 ಲಕ್ಷ ಜೀವನಾಂಶ ಬೋಡು ಪನ್ದ್ ಕೋರ್ಟುಡು ಬೊಡೆದಿ ಅಪೀಲ್ ಮಲ್ತಿನ ನಡಕೆ ಬೆಂಗಳೂರು ಹೈಕೋರ್ಟುಡು ನಡತ್ಂಡ್.
ನ್ಯಾಯಮೂರ್ತಿ ಲಲಿತಾ ಕನ್ನಂಗಟ್ಟಿ ಇತ್ತಿನ ಒಂಜಿ ಸದಸ್ಯೆದಿನ ಪೀಠ ಈ ಅರ್ಜಿನ್ ವಿಚಾರಣೆ ಮಲ್ತ್ಂಡ್. ಬೊಡೆದಿ ತಿಂಗೊಲುಗು 6 ಲಕ್ಷ ಕೊರೊಡು ಪನ್ದ್ ಕೇಂಡಿನೇ ನ್ಯಾಯಮೂರ್ತಿಲು ಸೋಜಿಗೊಡು ತಿಂಗೊಲುಗು ಆತ್ ಕರ್ಚಿ ಎಂಚಿನೆತ್ತ ಪನ್ದ್ ಕೇನ್ಡೆರ್.
ವಿಚಾರಣೆ ಪೊರ್ತುಡು ಬೊಡೆದಿನ ವಕೀಲೆರ್, ಅರ್ಜಿದಾರರೆಗ್ ಶೂ, ಡ್ರೆಸ್‌, ಕಾಜಿಗ್ ಪೂರಾ ತಿಂಗೊಲುಗು 15,000 ರೂಪಾಯಿ ಅಂಚೆನೆ ಇಲ್ಲಡ್ ವನಸ್ ಗ್ 60,000 ರೂಪಾಯಿ ಬೋಡು, ಪ್ರತಿ ತಿಂಗೊಲು ಕಾನೂನು ಸಲಹೆಗಾರೆಗ್ ಕೊರಿಯರೆ 50 ಸಾವಿರ ರೂ. ಬೋಡು. ಒಟ್ಟುಗು ಪೊಂಜೊಲುನ ಮೊರಂಪು ಬೇನೆ ಅಂಚೆನೆ ಫಿಸಿಯೋಥೆರಪಿ ಬೊಕ್ಕ ಬೇತೆ ಮರ್ದ್ ಬೊಕ್ಕ ವೈದ್ಯಕೀಯ ವೆಚ್ಚೊಗು 4-5 ಲಕ್ಷ ರೂಪಾಯಿ ಬೋಡು ಪನ್ದ್ ಕೇನ್ಡೆರ್.
ಉಂದೆಕ್ ಬೆಚ್ಚ ಆಯಿನ ನ್ಯಾಯಮೂರ್ತಿಲು ಜೋರುಡೇ, ದಾನೆ ಒಂಜಿ ಜನಕ್ ತಿಂಗೊಲುಗು ಈತ್ಲಾ ಕರ್ಚಿ ಉಂಡಾ? ಆತ್ ಕರ್ಚಿ ಮಲ್ಪರೆ ಇತ್ತ್ಂಡ ಆಲೇ ಬೆನ್ ದ್ ಕರ್ಚಿ ಮಲ್ಪಡ್ ಪನ್ದ್ ಪನ್ಡೆರ್. ಆ ಪೊಂಜೊವೆಗ್ ಜೋಕುಲೆನ್ಲಾ ತೂವೊನರೆ ಇಜ್ಜಿ ಆಂಡಲ ಸ್ವಂತ ಕರ್ಚಿಗ್ ಈತ್ ಕೇನುನ ಅತ್ ಸಮ? ಒಂಜಿ ಜನಕ್ ಜೀವನ ನಿರ್ವಹಣೆ ಮಲ್ಪರೆ ಏತ್ ಪನವು ಬೋಡು ಪನ್ದ್ ಸತ್ಯ ಪನ್ಲೆ ಅಂಚೆನೆ ಅವೆಕ್ ಬೋಡಾಪಿನ ನೆವನಲಾ ಕೊರ್ಲೆ. ಇಂಚ ನ್ಯಾಯಾಲಯ ಬೊಕ್ಕ ಕಾನೂನು ದುರ್ಬಳಕೆ ಮಲ್ಪುನ ತೂನಗ ಕೋರ್ಟು ಅಪಗ ಬೇತೆನೇ ಆದೇಶ ಕೊರೊಡಾದ್ ಬರು ಪನ್ದ್ ಲಾಯರ್ ಗ್ ದಡಿ ಪಾಡಿಯೆರ್.