Last updated on September 25th, 2024 at 09:02 am
ಕುಡ್ಲ: ತುಳುನಾಡ್‌ಡೇ ಬಾರೀ ಸಂಚಲನ ಉಂಡು ಮಲ್ತಿತ್ತಿನ ಶ್ರೀಮತಿ ಶೆಟ್ಟಿನ್ ಕೆರ್ತಿನ ಪ್ರಕರಣೊದ ಪ್ರಮುಖ ಆರೋಪಿಲೆಗ್ ಕುಡ್ಲದ 1ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ಜೀವಾವಧಿ ಶಿಕ್ಷೆ ಕೊರ್ತುಂಡು.
2019ದ ಮೇ 11ತಾನಿ ಕುಡ್ಲ ಪೇಂಟೆದ ವೆಲೆನ್ಸಿಯಾದ ಸೂಟರ್‌ಪೇಟೆಡ್ ಶ್ರೀಮತಿ ಶೆಟ್ಟಿನ್ ಕೆರ್ದಿತ್ತೆರ್. ಇಲ್ಲಗ್ ಬತ್ತ್‌ದ್ ಚಿಟ್‌ಫಂಡ್‌ದ ಕಾಸ್ ಕೇಂಡಿನ ಪೊಂಜೊವುನು ಜೋನ್ ಸ್ಯಾಮ್ಸನ್ ಸೋಂಟೆಡ್ ಆಕ್‌ದ್ ಕೆರ್ದಿತ್ತೆ. ಅವೆರ್ದ್ ಬೊಕ್ಕ ಶ್ರೀಮತಿ ಶೆಟ್ಟಿನ್ 29 ತುಂಡು ಮಲ್ತ್‌ದ್ ಪೇಂಟೆದ ಬೇತೆ ಬೇತೆ ಕಡೆಟ್ ದಕ್ಕ್‌ದಿತ್ತೆರ್.
ಈ ಪ್ರಕರಣೊದ ಪ್ರಮುಖ ಆರೋಪಿಲಾದಿತ್ತಿನ ಜೋನ್ ಸ್ಯಾಮ್ಸನ್ ಬೊಕ್ಕ ವಿಕ್ಟೀರಿಯಾ ಮೊಕ್ಲೆನ ಆರೋಪ ಸಾಬೀತಾದಿತ್ತ್ಂಡ್. ಇತ್ತೆ ಆರೋಪಿ ದಂಪತಿಗ್ ನ್ಯಾಯಾಧೀಶೆ ಮಲ್ಲಿಕಾರ್ಜುನಸ್ವಾಮಿ ಜೀವಾವಧಿ ಶಿಕ್ಷೆ ಬೊಕ್ಕ 25 ಸಾವಿರ ರೂ. ದಂಡ ಪಾಡ್ದೆರ್. ಕೊಲೆಗ್ ಸಕಾಯ ಮಲ್ತಿತ್ತಿನ ಮೂಜನೇ ಆರೋಪಿ ರಾಜುಗ್ ಆಜರೆ ತಿಂಗೊಲು ಸಾದಾ ಶಿಕ್ಷೆ ಬೊಕ್ಕ 5000 ರೂ. ದಂಡ ಪಾಡ್ದೆರ್. ಇತ್ತೆನೇ ಆಜಿ ತಿಂಗೊಲು ಕರ್ಪಿಲ್ಲ್‌ಡ್ ಇತ್ತಿನ ರಾಜು ಕರ್ಪಿಲ್ಲ್‌ರ್ದ್ ಬುಡುಗಡೆ ಆಪಿನ ಸಾಧ್ಯತೆ ಉಂಡು. ಸಂತ್ರಸ್ತೆರೆನ ಪರವಾದ್ ಸರಕಾರಿ ಅಭಿಯೋಜಕಿ ಜುಡಿತ್ ಓಲ್ಗಾ ಮಾರ್ಗರೆಟ್ ಕ್ರಾಸ್ತಾ ವಾದ ಮಂಡನೆ ಮಲ್ತಿತ್ತೆರ್.