Last updated on September 21st, 2024 at 07:19 pm
ಹಾಸ್ಟೆಲ್‌ಡ್ ಇತ್ತ್‌ದ್ ಶಾಲೆಗ್ ಪೋಪೆದಿನ ಆಣನ ಜೂವೊದಕೊಡಿನ್ ಒಟ್ಟುಗು ಕಲ್ಪುನ ಜವನೆರ್ ಪತ್‌ದ್ ಒಯ್ತಿನೆರ್ದಾವರ ಬಾತ್‌ದ್, ಆಣಗ್ ಕುಡ್ಲದ ವೆನ್ಲಾಕ್ ಆಸ್ಪತ್ರೆ‌ಡ್ ಮರ್ದ್ ಮಲ್ತೊಂದುಪ್ಪುನ ನಡಕೆ ಸಂಪಾಜೆರ್ದ್ ವರದಿಯಾತ್ಂಡ್.
ಸಂಪಾಜೆದ ಆಲಡ್ಕ ನಿವಾಸಿಯಾದುಪ್ಪುನ 12 ವರ್ಷ ಪ್ರಾಯೊದ ಆಣ್ ಕೊಡಗು ಸಂಪಾಜೆದ ಹಾಸ್ಟೆಲ್‌ರ್ದ್ ಶಾಲೆಗ್ ಪೋವೊಂದಿತ್ತೆ.
ಸೆ.14ತಾನಿ ರಾತ್ರಿ ಹಾಸ್ಟೆಲ್‌ಡ್ ಇರ್ವೆರ್ ವಿದ್ಯಾರ್ಥಿಲು ಈ ಆಣನ ಜೂವೊದಕೊಡಿನ್ ಪತ್‌ದ್ ಒಯ್ತ್‌ದಿತ್ತೆರ್. ಬೊಕ್ಕ ಆಣಗ್ ಮೆಯಿನೀರ್ ಮೈಪುನಗ ಬೇನೆ ಆವೊಂದಿತ್ತಿನೆರ್ದಾವರ ಇಲ್ಲಗ್ ಪೋದಿತ್ತೆ. ಸುರುಕು ಏರೆಡಲಾ ಈ ಇಸಯೊನು ಪಂಡ್‌ದಿಜ್ಜಂಡ್. ಬಾಪು ಎಚ್ಚ ಆಯಿನೆರ್ದಾವರ ಅಪ್ಪೆಡ ಇಸಯ ತೆರಿಪಾದೆ. ಅವೆರ್ದ್ ಬೊಕ್ಕ ಇಲ್ಲದಕುಲು ಸೇರ್ದ್ ಸುಳ್ಯದ ಸರ್ಕಾರಿ ಆಸ್ಪತ್ರೆಗ್ ಲೆತೊಂದು ಪೋದು, ಅಲ್ಪರ್ದ್ ಪುತ್ತೂರ್‌ದ ಆಸ್ಪತ್ರೆಗ್ ಲೆತೊಂದು ಪೋದಿತ್ತ್‌ದ್, ಅಲ್ಪದ ಬೈದ್ಯೆರೆ ಪಾತೆರೊದಂಚ ಕುಡ್ಲದ ವೆಸ್ಲಾಕ್ ಆಸ್ಪತ್ರೆಗ್ ಸೇರಾದೆರ್ ಪಂದ್ ತೆರಿದ್ ಬೈದ್ಂಡ್. ಅಲ್ಪ ಮರ್ದ್ ಮಲ್ತ್‌ದ್ ಕೋಡೆ ಆಣಗ್ ಆಪರೇಷನ್ ಮಲ್ದೆರ್. ಇತ್ತೆ ಆಣ್ ಉಸಾರಾವೊಂದುಲ್ಲೆ.
ಸಂಪಾಜೆ ಪೋಲೀಸ್ ಔಟ್‌ಸ್ಟೇಷನ್‌ಡ್ ಪ್ರಕರಣ ದಾಖಲಾದ್, ನನದ ಕಾನೂನು ಪ್ರಕ್ರಿಯೆಲು ನಡಪರೆಗುಲ್ಲ.