Last updated on September 7th, 2024 at 02:55 pm
ಕುಡ್ಲ: ಒಂಜಿ ಕಾಲೊಡು ಪಚ್ಚ ಪಜಿರ್, ಮರ ದೈಕುಲೆ ನಡುಟು ಮೆನ್ಕೊಂದಿತ್ತಿನ ಕುಡ್ಲ ಪೇಂಟೆಡ್ ಇತ್ತೆ ನಮ ಸ್ವಾಸ ದೀಪುನ ಕಾತ್‌ದ ಗುಣಮಟ್ಟೊ ಪಾಕ ಕಮ್ಮಿ ಆತ್ಂಡ್ ಪನ್ಪಿನ ಎಚ್ಚರ್ಗೆದ ಸಂದೇಶೊನು ಗ್ರೀನ್‌ ಪೀಸ್‌ ಸಂಶೋಧನ ವರದಿ ಕೊರ್ತುಂಡು.
ಕರ್ನಾಟಕೊದ ಮೂಜಿ ಮಲ್ಲ ಪೇಂಟೆಲಾಯಿನ ಬೆಂಗಳೂರು, ಮೈಸೂರು ಬೊಕ್ಕ ಕುಡ್ಲಡ್ ಕಾತ್‌ದ ಗುಣಮಟ್ಟೊ ಪಾಕ ಜತ್ತ್‌ದಿತ್ತ್‌ದ್, ಮಾಲಿನ್ಯೊದ ಪ್ರಮಾಣ ಅಪಾಯಕಾರಿ ಮಟ್ಟೊಗು ಎತ್ತ್‌ದ್ಂಡ್.
ಇತ್ತೆನೇ ವಾಯು ಮಾಲಿನ್ಯೊನು ಜಪ್ಪಾಯೆರೆ ಬೋಡಾಪಿನ ಕ್ರಮೊ ಗೆತೊಂಜಿಂಡ, ನಮ್ಮ ಆರೋಗ್ಯದ ಮಿತ್ತ್ ಅವು ಇದಮುಟ್ಟ ಎನ್ನಂದಿನಂಚಿನ ದುಷ್ಪರಿಣಾಮೊಲೆನ್ ಒಯ್ತ್ ಪಾಡುಂಡು ಪಂದ್ ವರದಿ ಎಚ್ಚರ್ತ್‌ದ್ಂಡ್.
ಕಾತ್‌ಡ್ ಪಿಎಂ 2.5 ಕಣೊಕ್ಲೆನ ಮಟ್ಟ ಕುಡ್ಲ ಸೇರ್ದ್ ಐನ್ ಪೇಂಟೆಲೆಡ್ 6ರ್ದ್ 7 ಪಟ್ಟ್ ಎಚ್ಚ ಉಂಡು. ಅಂಚೆನೇ ಪಿಎಂ 10 ಕಣೊಕ್ಲೆನ ಮಟ್ಟ ಬೆಂಗಳೂರು, ಮೈಸೂರು ಬೊಕ್ಕ ಪುದುಚೇರಿ ಪೇಂಟೆಲೆಡ್ 4ರ್ದ್ 5 ಪಟ್ಟ್ ಎಚ್ಚ ಉಂಡು ಪಂಡ್‌ದ್ ವರದಿ ದೃಢ ಮಲ್ದ್ಂಡ್.