Last updated on September 26th, 2024 at 08:29 am
ತುಳುನಾಡ್‌ಡ್ ಏನಿಕಾಲೊರ್ದಿಂಚಿ ದೈವಾರಾಧನೆನ್ ನಲಿಕೆ, ಪಂಬದ, ಪರವ ಸಮುದಾಯೊದಕುಲು ಸಂಪ್ರದಾಯಬದ್ಧವಾದ್, ಆರಾಧನಾ ಪರಂಪರೆಯಾದ್, ಸಾಂಪ್ರದಾಯಿಕ ಕಟ್ಟ್-ಕಟ್ಲೆಲೆನ ಉಲಯಿ ನೇಮದ ಸೇವೆನ್ ನಡಪಾವೊಂದು ಬರೊಂದಿತ್ತ್‌ದ್ ಅವೆನ್ ವಾ ನೆವನೊಗ್ಲಾ ಆಟ, ನಾಟಕ, ಪಿಚ್ಚರ್, ಸಾರ್ವಜನಿಕ ಮೆರವಣಿಗೆ ಕಾರ್ಯಕ್ರಮೊಲೆಡ್ ಮನರಂಜನೆದ ಲೆಕ ತೂಪಾವರೆ ಬಲ್ಲಿ ಪಂದ್ ದುಂಬು ಕೊರ್ತಿನ ಬಿನ್ನಪುಲೆನ ಪ್ರಕಾರ ಜಿಲ್ಲಾಧಿಕಾರಿಲು ಆದೇಶ ಮಲ್ತಿತ್ತೆರ್. ಆಂಡ ಈ ಆದೇಶೊನು ಗೆನ್ಪಂದೆ ಪ್ರತೀ ರಂಗೊಡ್ಲಾ ದೈವಾರಾಧನೆನ್ ಕಾಲಿ ಒಂಜಿ ಮನರಂಜನೆದ ಸೊತ್ತು ಲೆಕ ಮಲ್ತ್‌ದ್ ಕಾಸ್ ಮನ್ಪುನ ಬೇಲೆ ನಡತೊಂದೇ ಉಂಡು.
ಕಲ್ಜಿಗ ಪನ್ಪಿನ ಚಿತ್ರತಂಡ ಒಂಜಿ ರಕ್ಷಿತ್ ಜೋಗಿ ಪನ್ಪಿನಾರೆಡ ಕೊರಗಜ್ಜನ ಕೋಲದ ಪಾತ್ರ ಮನ್ಪಾದ್, ಅವೆನ್ ನಲಿಕೆ ಸಮುದಾಯೊದಕುಲೇ ಮಲ್ದೆರ್ ಪಂಡ್‌ದ್ ಸುಳ್ಳು ಸುದ್ದಿ ಪಸೆರಾವೊಂದುಲ್ಲೆರ್ ಪಂದ್ ನಲಿಕೆ ಸಮುದಾಯೊದಕುಲು ಆರೋಪ ಮಲ್ದೆರ್.
ಈತೇ ಅತ್ತಂದೆ ಬೊಂಬಾಟ್ ಸಿನೆಮಾ ಪನ್ಪಿನ ಯೂಟ್ಯೂಬ್ ಚಾನೆಲ್ ಒಂಜೆಟ್ ನಡತಿನ ಕಲ್ಜಿಗ ಸಿನಿಮಾದ ಸುದ್ದಿಗೋಷ್ಠಿದ ವೀಡಿಯೊದ ಕಮೆಂಟ್‌ಡ್ ಒರಿ ದೈವನರ್ತಕೆರೆಗ್ ಪೆದಂಬು ನೆರ್ತಿನತ್ತಂದೆ ಬೊರ್ಚಂದಿನ ಬರೆದ್ ಪಾಡ್ದೆ.
ಇಂಚ ತನ್ಕುಲೆ ಸಮುದಾಯೊದ ಬಗೆಟ್ ಸಾರ್ವಜನಿಕವಾದ್ ಸುಳ್ಳು ಸುದ್ದಿ ಪಸೆರಾವೊಂದು, ಅಶ್ಲೀಲ ಕಮೆಂಟ್ ಮಲ್ತೊಂದು ಇಪ್ಪುನೆರ್ದಾವರ ತನ್ಕುಲೆ ಸಮುದಾಯೊಗು ಪೊಕ್ಕಡೆ ಆವೊಂದುಂಡು. ಮೊಕಲೆನ ಜಡ್ತೆ ಮಲ್ತ್‌ದ್, ಬೋಡಾಪಿನ ಕ್ರಮ ಗೆತೊಂದು, ಜಾತಿ ನಿಂದನೆ ಕೇಸ್ ಪಾಡೆರೆ ಕುಡ್ಲ ತಾಲೂಕು ಪಾಣಾರ ಯಾನೆ ನಲಿಕೆ ಸಮಾಜ ಸೇವಾ ಸಂಘೊರ್ದು ಜಿಲ್ಲಾಧಿಕಾರಿ ಬೊಕ್ಕ ಪೊಲೀಸ್ ಆಯುಕ್ತೆರೆಡ ಬಿನ್ನಪು ಮಲ್ತೆರ್.
