Last updated on September 10th, 2024 at 09:06 am
ಕೋಡೆ ಇನಿ ತುಳುವೆರೆನ ಬಾಯಿಡ್ ಎಚ್ಚಾದ್ ಕೇನೊಂದುಪ್ಪುನ ಒಂಜೇ – ಯುನಿಕೋಡ್ ಯುನಿಕೋಡ್ ಯುನಿಕೋಡ್.
ಸುರುಕು ಈ ಯೂನಿಕೋಡ್ ಪಂಡ ದಾದ ಪಂದ್ ತೂಕ, ಬೊಕ್ಕ ತುಳುಕು ರಡ್ಡ್ ಬಗೆತ ಯುನಿಕೋಡ್ ಪನ್ಡ ಎಂಚಿನ ಪನ್ದ್ ತೆರಿಯೊನ್ಗ.
ಯೂನಿಕೋಡ್ ಪಂಡ ಅಕ್ಷರೊಲೆನ್ ಎನ್ಕೋಡ್(Encode) ಮಲ್ಪುನ ಒಂಜಿ Universal Standard ಆದುಂಡು, ಉಂದು ಬರವುನು ಬೇತೆ ಬೇತೆ ಪ್ಲಾಟ್‌ಫಾರಂಲೆಡ್, ಆಪರೇಟಿಂಗ್ ಸಿಸ್ಟಮ್‌ಲೆಡ್ ಬೊಕ್ಕ ಪ್ರೋಗ್ರಾಮಿಂಗ್ ಭಾಷೆಲೆಡ್ ಇತ್ತಿಲೆಕ ತೋಜಾವೆರ ಬೊಕ್ಕ ಅರ್ಥ ಮಲ್ತೊನರ ಅನುವು ಮಲ್ತ್ ಕೊರ್ಪುಂಡು. ಸುಲಭೊಡು ಪನ್ಪುಂಡ ಪ್ರತಿ ಅಕ್ಷರೊಗು ಒಂಜಿ ಕೋಡ್(Code) ಕೊರ್ಪುನು. ಒವ್ವೇ ರಡ್ಡ್ ಅಕ್ಷರೊಗು ಒಂಜೇ ಕೋಡ್ ಇಪ್ಪುಜಿ. ಮೊಬೈಲ್, ಕಂಪ್ಯೂಟರ್, ಲ್ಯಾಪ್‌ಟಾಪ್‌ಲೆಗ್ ಈ ಕೋಡ್‌ಲೆನ್ ತೂನಗ ಉಂದು ಈ ಅಕ್ಷರ ಪಂದ್ ಗೊತ್ತಾಪುಂಡು. ಈ ಕೋಡ್ ಏರ್ಲಾ ಪೋದು ಕೊರ್ಯೆರೆ ಆಪುಜಿ. ಅವೆಕೊಂಜಿ ಯುನಿಕೋಡ್ ಕಂಸಾರ್ಷಿಯಮ್ ಪನ್ಪಿನ ಉಂಡು. ಈ ಕಂಸಾರ್ಷಿಯಮ್‌ದಕುಲು ವಾ ಲಿಪಿಗ್, ಎಮೋಜಿಗ್, ಸಂಕೇತೊಲೆಗ್ ಕೋಡ್ ಕೊರೊಡು ಪಂಡ್‌ದ್ ತೂದು ಅಲದ್ ಪತ್ತ್‌ದ್ ಬೊಕ್ಕ ಕೊರ್ಪೆರ್. ಯುನಿಕೋಡ್‌ಗ್ಲಾ ಒಂಜಿ ಲಿಮಿಟ್ ಉಂಡು, ಬೋಡಾಯಿನಾತ್ ಅಕ್ಷರೊಲೆಗ್ ಕೋಡ್ ಕೊರ್ಯೆರ ಆಪುಜಿ. ಒಟ್ಟುಗು 11,14,112 ಅಕ್ಷರೊಲೆಗ್ ಮಾತ್ರ ಕೋಡ್ ಕೊರೊಲಿ. ಇತ್ತೆಗ್ ಉಂದೆಟ್ 1,54,998 ಕೋಡ್‌ಪಾಯಿಂಟ್‌ಲೆನ್ ಬೇತೆ ಬೇತೆ ಬಾಸೆದ ಲಿಪಿಕ್ಲೆಗ್ ಕೊರ್ತೂಂಡು.
ಈತ್ ಯಾವು ನನ ಇಸಯೊಗು ಬರ್ಕ. ಕೋಡೆ ಕಾಂಡೆ ತುಳುವೆರೆನ ಮೋನೆಡ್ ಬಾರಿ ಕುಸಿ. ತುಳುಕು ಯುನಿಕೋಡ್ ಆಂಡ್‌ಗೆ, ತುಳುಕು ಯುನಿಕೋಡ್ ಆಂಡ್‌ಗೆ ಪಂದ್. ಶತಮಾನೊಗು ದುಂಬು ಪಣೊಲಿದ ಒಲಿಕ್ಲೆಡ್ ಬರೆಯೊಂದಿತ್ತಿನ ತುಳು ಲಿಪಿಕ್ ಯುನಿಕೋಡ್ ಆತ್ಂಡ್. ಉಂದೆನ್ ಸಾಂಪ್ರದಾಯಿಕ ತುಳು ಲಿಪಿ ಪಂದ್‌ಲಾ ಪನೊಲಿ. ವೈಷ್ಣವಿ ಮೂರ್ತಿ ಬೊಕ್ಕ ವಿನೋದ್ ರಂಜನ್ ಪನ್ಪಿನಕುಲು ಉಂದೆತ ಪಿರವುಡು ಬೆನ್ತೆರ್.
ತುಳು ಲಿಪಿ ಕಾಲೊದ ಒಂಜೊಂಜಿ ಪೊರ್ತುಡು ಒಂಜೊಂಜಿ ಮರ್ಗಿಲ್‌ಡ್ ಒಂಜೊಂಜಿ ರೂಪಾಂತರೊಲೆನ್ ತೂತುಂಡು. ಎಚ್ಚಿನ ಲಿಪಿಕುಲು ಕಲ್ಲ್, ಒಲಿ, ಟೈಪ್‌ರೈಟರ್ ಕಾಕಜಿಗ್ ಆದ್ ಡಿಜಿಟಲ್ ಮೀಡಿಯಮ್‌ಗ್ ಬತ್ತಂಡ ನಮ್ಮ ತುಳುತ ಕತೆ ಬೇತೆನೆ. ಕಲ್ಲ್, ಒಲಿರ್ದ್ ಸೀದಾ ಡಿಜಿಟಲ್ ಮೀಡಿಯಮ್‌ಗ್. ನಡುಟು ಬಾರೀ ಮಹತ್ವೊದ ಟೈಪ್‌ರೈಟರ್ ಹಂತೊನು ತುಳು ತೂಯಿನೇ ಇಜ್ಜಿ. ನಮ ಇನಿ ತೂಪಿನ ಬೇತೆ ಲಿಪಿಕುಲು ಇನಿತ ದಿನೊಟು ಇಂಚ ಇಪ್ಪೆರ ಒಂಜಿ ಮಲ್ಲ ನೆವನೊನೇ ಟೈಪ್‌ರೈಟರ್‌ದ ಕಾಲ, ಅವೆರ್ದ್ ಬೊಕ್ಕ ಕಾಕಜಿಡ್ ಬರೆಯೊಂದಿತ್ತಿನ ಕಾಲ.
ಇಂಚ ಸೀದಾ ಡಿಜಿಟಲ್ ಯುಗೊಕು ಕಾರ್ ದೀನ ತುಳು ಲಿಪಿ ತನ್ನ ಬೇತೆ ಬೇತೆ ರೂಪಾಂತರೊಲೆನ್ ಬುಡುದು ಒವ್ವಾಂಡಲಾ ಒಂಜಿ ಒರುನು ಪತೊನೊಡಾದ್ ಬತ್ತ್ಂಡ್. ಟೈಪ್‌ರೈಟರ್‌ದ ಕಾಲೊಡಾತುಂಡ ಎಂಚಾಂಡಲಾ ಅವೆನಾತೆಗೆ ಅವೆಕ್ ಬೋಡಾಪಿ ಒರು ಗೆತೊಂದು ನಮ್ಮ ತುಳು ಲಿಪಿ. ಆಂಡ ದಾದ ಮನ್ಪುನು ಅವು ಆಯಿಜಿ. ಜನೊಕುಲು ಅಂಚ ಬೋಡು, ಇಂಚ ಬೋಡು ಪಂದ್ ಪನೆರೆ ಸುರು ಮಲ್ತೆರ್. ಪಾಕ ಜನ ಸುಲಭ ಮನ್ಪುಗ, ಸುಲಭ ಮನ್ಪುಗ ಪನೊಂದು ಒಂಜಾತ್ ಇಜ್ಜಂದಿನ ಪಗತೆಲೆನ್ ಕನತೆರ್. ಆಂಡಲಾ ತನ್ನ ಮೂಲ ವರ್ಣಮಾಲೆದ ಅಕ್ಷರೊಲೆನ್ ತುಳು ಒರಿತೊಂದುಂಡು. ಇಂಚ
ಅವ್ವು ಉಂದು ಪಂಡ್‌ದ್ ಲಿಪಿಕ್ಲೆಗ್ ಕೋಡ್ ಕೊರ್ಪುನ ಯುನಿಕೋಡ್ ಕಂಸಾರ್ಷಿಯಮ್‌ಗ್ ತುಳು ಎತ್ತ್‌ನಗ ಮೂಡಾಯಿದ ಒಂಜಿ ಗಾಲಿ ಬೀಜ್‌ದ್ ಅವೆಕ್ ತಿಗಳಾರಿ ಪನ್ಪಿನ ಒಂಜಿ ಪುದರ್‌ಲಾ ಪತೊನುಂಡು. ಒಂಜಾತ್ ಪಾತೆರೊದ ಕೊಲಲೊಲು ಆಯಿನೇ ತುಳು-ತಿಗಳಾರಿ ಬೊಕ್ಕ ಆಧುನಿಕ ತುಳು ಪನ್ಪಿನ ಪುದರ್‌ಡ್ ತುಳು ಲಿಪಿ ಕಂಸಾರ್ಷಿಮಯ್‌ದ ಜಾಲ್ ಎತ್ತುಂಡು. ಒಂಜಿ ಪಿರಾಕ್‌ದ ಒರುನು ಪತೊಂಡ ಕುಡೊಂಜಿ ಪೊಸ ದೇಕಿದ ಒರುನು ಪತೊಂಡು. ಎಂಕ್ಲೆನವು ತುಳು ಎಂಕ್ಲೆನವು ತುಳು ಪಂಡ್‌ದ್ ರಡ್ಡ್ ಕೋಡಿಲಾ ಕಂಪ ರೆಂಕಾವೊಂದು ರೆಂಕಾವೊಂದು ಇನಿತ ದಿನೊಕಾನಗ ಸಾಂಪ್ರದಾಯಿಕ ತುಳು ಲಿಪಿಕ್ ಯುನಿಕೋಡ್ ಕಂಸಾರ್ಷಿಯಮ್ ಯುನಿಕೋಡ್‌ಡ್ ಜಾಗೆ ಮಲ್ತ್ ಕೊರ್ತುಂಡು.
ಉಂದುವೇ ಇಸಯ ಇತ್ತೆ ಒಂಜಾತ್ ವಾದ ವಿವಾದೊಲೆಗ್ ಸಾದಿ ಮಲ್ತ್ ಕೊರ್ತುಂಡು. ಮಾರ್ಡನ್ ತುಳು ಲಿಪಿ ಕಲ್ದಿನ ತುಳುವೆರ್ ಇತ್ತೆ ಒರಾನೆ ಸಾಂಪ್ರದಾಯಿಕ ಲಿಪಿಗ್ ಒಮ್ಮೊನುನು ಎಂಚ ಪನ್ಪಿನ ಪ್ರಶ್ನೆಲಾ ಉಂಡು ಆತೇ ಅತ್ತಂದೆ ಇನಿ ಬರ್ಪಿನ ಯುನಿಕೋಡುಡು ಸುಮಾರ್ ಅಚ್ಚರೊಲು ತುಳುಕು ಒಮ್ಮುನವು ಇಜ್ಜಿ ಉಂದೆನ್ ಪೂರಾ ಗೋಡ್ಯಾದ್ ಕೊರ್ತಿನ ಕುಡೊಂಜಿ ಪ್ರಪೋಸಲ್ ಯುನಿಕೋಡ್ ಬ್ಲಾಕ್ ತಿಕ್ಕ್ ದ್ ಯಾಪ ಬರ್ಪುಂಡು ಪನ್ದ್ ತೆರಿದಿಜ್ಜಿ.
ಇತ್ತೆದ ತುಳು ಅಕಾಡೆಮಿದ ಗುರ್ಕಾರ್ಲು ಅವ್ವೇ ಅಕಾಡೆಮಿರ್ದ್ ಪೋತಿನ ಪ್ರಪೋಸಲ್‌ಲೆನ ಬಗೆಟ್ ತೆರಿಯಂದೆ ಸಾಂಪ್ರದಾಯಿಕ ತುಳು ಲಿಪಿಕ್ ಯುನೀಕೋಡ್ ಆತಿನೆಕ್ ಫೇಸ್‌ಬುಕ್‌ಡ್ ಬೆರಿಬೆರಿ ಕನ್ನಡ ಪೋಸ್ಟ್ ಪಾಡ್ದ್ ಎಡ್ಡೆಪ್ಪು ಬಯಕ್‌ದೆರ್.
ಅವ್ವೇ ಮಾಡರ್ನ್ ತುಳು ಲಿಪಿಲಾ ಯುನಿಕೋಡ್ ದ ಅಂಗನೊಡು ಉಂಡು. ಅವೆತ ಕೆಲವು ಟೆಕ್ನಿಕಲ್ ವಿಷಯೊಲು ಕೊಡಿ ಎತ್ತಿನೇ ಅವೆಕ್ಲಾ ಯುನಿಕೋಡ್ ಬರ್ಪುಂಡು. ಅಕಾಡೆಮಿದ ಮುಕಾಂತರ ಕಲ್ಪಾವೊಂದಿತ್ತಿನ ಬರವು ಉಂದೇ ಮೂಲೊದ.
ಮುಲ್ಪ ತುಳುವೆರ್ ಅರ್ಥ ಮಲ್ತೊನೊಡಾಯಿನವು ಒಂಜೇ ಇಸಯ ಸಾಂಪ್ರದಾಯಿಕ ಆವಡ್ ಮಾಡರ್ನ್ ಆವಡ್ ರಡ್ಡ್‌ಲಾ ತುಳು ಲಿಪಿಯೇ. ಅವು ತುಳು ಅತ್ತ್, ಉಂದು ಮಾತ್ರ ತುಳು ಪನ್ಪಿನವೆನ್ ಬುಡ್ದ್ ಪಾಕ ವರ್ಸೊರ್ದಿಂಚಿ ಕಾತ್‌ದ್ ಕಾತ್‌ದ್ ತಿಕ್ಕಿನ ಯುನಿಕೋಡ್‌ನ್ ಆಯಾನಾತ್ ಗಲಸೊಡು. ಕುಡೊರ ತುಳು ಭಾಷೆನ್ ತುಳೂಟೇ ಬರೆಪಿಲೆಕಾವೊಡು.