Last updated on October 29th, 2024 at 09:55 am
ಸುಳ್ಯ: ತಾಲೂಕು ಸಾರ್ವಜನಿಕ ಆಸ್ಪತ್ರೆಡ್ 108 ಎಮರ್ಜೆನ್ಸಿ ಆ್ಯಂಬುಲೆನ್ಸ್‌‌ನ್ ಆಸ್ಪತ್ರೆದ ಶೆಡ್ಡ್ ಉಂತಾವಂದಿಲೆಕ ಸೂಚನೆ ಕೊರಿಬೊಕ್ಕ ತೊಡಂಗಿನ ‘ತರೆಬೇನೆ’ ಇತ್ತೆ ಕುಡ ಜೋರಾವೊಂದಿತ್ತ್‌ದ್, ಅವ್ವೇ ನೆವನೊನು ದೀವೊಂದು 108 ಆ್ಯಂಬುಲೆನ್ಸ್‌, ಸೋಮಾರ ರೋಗಿಯೊರಿಯನ್ ಕುಡ್ಲಗ್ ಲೆತೊಂದು ಪೋಯೆರ ನಿರಾಕರಿತಿನ ಆರೋಪ ಕೇಂದ್ ಬತ್ತ್‌ದ್ಂಡ್.
ಸುಳ್ಯ ಆಸ್ಪತ್ರೆಗ್ ಎಚ್ಚಿಗೆದ ಪೊಸ ಆ್ಯಂಬುಲೆನ್ಸ್‌ ಬತ್ತಿನೆರ್ದಾವರ ಅವೆಕ್ ಉಂತೆರ ಆಸ್ಪತ್ರೆದ ಶೆಡ್ಡ್ ವ್ಯವಸ್ಥೆ ಮಲ್ತಿತ್ತ್ಂಡ್. ಉಂದೆರ್ದಾವರ ದುಂಬೇ ಇತ್ತಿನ 108 ಆ್ಯಂಬುಲೆನ್ಸ್ಗ್ ಉಂತೆರೆ ಜಾಗೆದ ಕುಂದೆಲ್ ಆದ್ ಸಾದಿಬರಿಟ್ ಉಂತಾದಿತ್ತ್ಂಡ್. ಒಂತೆ ದಿನ ಆಸ್ಪತ್ರೆದ ಕ್ಯಾಂಟೀನ್‌‌ದ ಬರಿಟ್ ಉಂತಾದಿತ್ತ್ಂಡ್. 108 ಆ್ಯಂಬುಲೆನ್ಸ್ಗ್ ಉಂತೆರ ಸಮ ವ್ಯವಸ್ಥೆ, ತನ್ಕುಲೆಗ್ ಬಚ್ಚೆಲ್ ಕರಿಪೆರ ವ್ಯವಸ್ಥೆ ಮಲ್ತ್ ಕೊರೊಡು ಪಂದ್ ಆಗ್ರಹಿತ್‌ದ್ ಸಿಬಂದಿ ವರ್ಗ ಅವೆಕಾಪಿನಕ್ಲೆಗ್ ಬಿನ್ನಪು ಸಂದಾದಿತ್ತ್ಂಡ್.
ಅ್ಂದೆತ ನಡುಟು ಸೋಮಾರ ಕಾಂಡೆ ಸುಳ್ಯ ಆಸ್ಪತ್ರೆರ್ದ್ ಕುಡ್ಲಗ್ ರೋಗಿಯೊರ್ಯನ್ ಲೆತೊಂದು ಪೋಯೆರ 108 ಆ್ಯಂಬುಲೆನ್ಸ್ಗ್ ಲೆಪ್ಪು ಕೊರ್ನಗ, ಅವೆತ ಪ್ರಧಾನ ಕಚೇರಿರ್ದೇ ಸುಳ್ಯದ 108 ಆ್ಯಂಬುಲೆನ್ಸ್‌ ಕೊರ್ಯೆರ ನಿರಾಕರಿತ್‌ದೆರ್. ಅ್ಂದೆರ್ದಾವರ ಆಸ್ಪತ್ರೆದ ಕುಡೊಂಜಿ ಆ್ಯಂಬುಲೆನ್ಸ್‌‌ಡ್ ರೋಗಿನ್ ಕುಡ್ಲಗ್ ಲೆತೊಂದು ಪೋವೊಡಾದ್ ಬತ್ತ್ಂಡ್. ಪ್ರಕರಣ ಗಾತಿಗ್ ಪೋವೊಂದಿತ್ತಿಲೆಕನೆ ಸಮಸ್ಯೆನ್ ಪಿರಿಕಟ್ಟ್ ಮನ್ಪೆರ ಪ್ರಮುಖೆರ್ ಅವೆಕಾಪಿನಕ್ಲೆಗ್ ಬಿನ್ನಪು ಸಂದಾದೆರ್. ಒಂಜಿ ಹಂತೊಡು ಸಮಸ್ಯೆಗ್ ಪಿರಿಕಟ್ಟ್ ಮನ್ಪೆರ ಮಿತ್ತ್‌ರ್ದ್ ಆಸ್ಪತ್ರೆಗ್ ಸೂಚನೆ ಬೈದ್ಂಡ್ ಪಂದ್ ತೆರಿದ್ ಬೈದ್ಂಡ್.
“ಸೋಮಾರ ಕಾಂಡೆ ರೋಗಿಯೊರ್ಯನ್ 108 ಆ್ಯಂಬುಲೆನ್ಸ್‌‌ಡ್ ಕುಡ್ಲಗ್ ಲೆತೊಂದು ಪೋಯೆರ ಕೇಂದಿಜೆರ್ ಪಂಡ್‌ದ್ ರೋಗಿನ ಕಡೆತಕುಲು ಎಂಕ್ಲೆಗ್ ತೆರಿಪಾದಿತ್ತ್‌ದ್, ಬೊಕ್ಕ ಅಕಲೆಗ್ ಪಗತೆ ಆ್ಯಂಬುಲೆನ್ಸ್‌ ಕೊರ್ತುಂಡು. ಕುಡೊರಿ ರೋಗಿನ್ 108 ಆ್ಯಂಬುಲೆನ್ಸ್‌‌ಡೇ ಕಡಪುಡ್ದ್ಂಡ್. ದಾಯೆ ಇಂಚ ಆತ್ಂಡ್ ಪಂದ್ ಪಿನ್ಪಿಜ್ಜಿ. ಈ ಇಸಯೊನು ಮಿತ್ತ್‌ದ ಅಧಿಕಾರಿಲೆನ ಗುಮನೊಗು ಕನತ್‌ದ್ಂಡ್.”
– ಡಾ| ಕರುಣಾಕರ, ಆಡಳಿತ ವೈದ್ಯಾಧಿಕಾರಿ, ಸುಳ್ಯ ತಾಲೂಕು ಸಾರ್ವಜನಿಕ ಆಸ್ಪತ್ರೆ