Last updated on October 16th, 2024 at 11:39 am
ಒಡಿಪು: ತುಳುನಾಡ ಜಿಲ್ಲೆಲೆಗ್ ರೇಷನ್ ಕಾರ್ಡ್‌ದಡಿಟ್ ಸ್ಥಳೀಯ ಉರ್ಪೆಲ್ ಅರಿ ಕೊರ್ಪುನ ಪ್ರಸ್ತಾವನೆಗ್ ಉದಲ್ ಪತ್ತ್‌ದ್ಂಡ್. ಈ ನಡುಟು ಮುಲ್ಪ ಬಿತ್ತುನ/ನೇಜಿ ನಡ್ಪುನ ಪ್ರಮಾಣ ಕಮ್ಮಿ ಆತಿನೆರ್ದಾವರ ಉತ್ಪಾದನೆದ ಮಿತ್ತ್‌ಲಾ ಪೆಟ್ಟ್ ಬೂರ್ದಿತ್ತ್‌ದ್ ಪಿದಯಿ ರಾಜ್ಯೊದ ಅರಿತ ಮಿತ್ತೇ ತಾಂಗುನ ಪರಿಸ್ಥಿತಿ ಎದುರಾತ್ಂಡ್.
ಒಡಿಪು ಜಿಲ್ಲೆಡೊಂಜೆಟೇ 2023ತ ಲೆಕ್ಕೊಡು ತೂಂಡ ಈ ಸರ್ತಿ ಸುಮಾರ್ 7000 ಎಕ್ರೆ ಜಾಗೆಡ್ ನೇಜಿ ನಡ್ತಿಜೆರ್. (2023ಟ್ 106255.31ಎಕ್ರೆ, 2024ಟ್ 99314.124).
ಬುಲೆಟ್ಲಾ ಕರಿನ ವರ್ಸ 1.72 ಲಕ್ಷ ಟನ್ ಬುಲೆ ಆದಿತ್ತ್‌ದ್ ಈ ಸರ್ತಿ ಎಚ್ಚ ಪಂಡಲಾ 1.61 ಲಕ್ಷ ಟನ್ ಆಪಿನ ಸಾಧ್ಯತೆ ಉಂಡು. ಅಂಚಾದ್ ಸುಮಾರ್ 11 ಲಕ್ಷ ಟನ್‌ದಾತ್ ಬುಲೆ ಕಮ್ಮಿ ಆವೆರೆ ಉಂಡು ಪಂದ್ ಕೃಷಿ ಇಲಾಖೆದ ಲೆಕ್ಕಾಚಾರ ಪನ್ಪುಂಡು.
ಉಂದೆಟ್ಲಾ ಮಾತಾ ಬಾರ್ ಅರಿ ಆಪುಜಿ, ಶೇ. 65% ಮಾತ್ರ ಅರಿ ಆಪುಂಡು. ಒರಿನ ಬಾರ್ ಅಂಚೆನೇ ಪಶು ಆಹಾರೊಗು ಪೋಪುಂಡು. ಜನಸಂಖ್ಯೆದ ಅಂದಾಜಿಡ್ ಒಡಿಪು ಜಿಲ್ಲೆಗ್ 1.51 ಲಕ್ಷ ಟನ್ ಅರಿ ಬೋಡು, ಆಂಡ ಈ ಸರ್ತಿ 0.91 ಲಕ್ಷ ಟನ್ ಮಾತ್ರ ಅರಿ ತಿಕ್ಕುನ ಸಾಧ್ಯತೆ ಉಂಡು. ಈ ಮಾತ ಲೆಕ್ಕ ತೂನಗ ಒಡಿಪು ಜಿಲ್ಲೆಡ್ ಒಂಜೆಟೇ ಸುಮಾರ್ 60 ಲಕ್ಷ ಟನ್‌ದಾತ್ ಅರಿಕ್ ಕುಂದೆಲ್ ಆವರೆ ಉಂಡು ಪಂದ್ ತೋಜುಂಡು. ಈ ಕುಂದೆಲ್‌ನ್ ಸಮ ಮನ್ಪೆರೆ ಬೇತೆ ರಾಜ್ಯೊಲೆರ್ದ್ ಅರಿ ತರ್ಪಾವೊಡಾಪುಂಡು.
ಕೇರಳ ಬೊಕ್ಕ ಆಂಧ್ರರ್ದ್ ಅರಿ
ಕೇರಳ, ಆಂಧ್ರಪ್ರದೇಶ ಬೊಕ್ಕ ತೆಲಂಗಾಣದ ಅರಿ ಎಚ್ಚಾದ್ ತುಳುನಾಡ್‌ಗ್ ಬರೊಂದುಂಡು. ಇಂಚಿಪ ಉತ್ತರ ಭಾರತೊದ ಕೆಲ ರಾಜ್ಯೊಲೆಡ್ಲಾ ಈ ಬಾರ್ ಬುಲೆಯೊಂದುಲ್ಲೆರ್. ಅಂಚಾದ್ ಈ ಕುಂದೆಲ್‌ನ್ ಸಮ ಮನ್ಪೆರೆ ಪಿದಯಿ ರಾಜ್ಯೊರ್ದೇ ಅರಿ ತರ್ಪುಡಾವುನ ಪರಿಸ್ಥಿತಿ ಉಂಡಾತ್ಂಡ್.
ವಾಣಿಜ್ಯ ಬುಲೆಕ್ಲೆನ ಬೆರಿಯೆ ಪೋದೂ ತುಳುನಾಡ್ ತನ್ನ ಬಂಜಿಗೇ ಪೆಟ್ಟ್ ಪಾಡೊಂಡಾ ಪನ್ಪಿನ ಪ್ರಶ್ನೆ ಈ ಪೊರ್ತುಡು ಮೂಡುಂಡು.