Last updated on October 20th, 2024 at 10:31 am
ಅಮ್ಮಾ ಎಂಕ್ ಶಾಲೆಗ್ ಫೀಸ್ ಕಟ್ಟರೆ 150 ರೂಪಾಯಿ ಬೋಡು, ಅಮ್ಮಾ ಎಂಕ್ ಪೊಸ ಕುಂಟು ದೆತೊನೊಡು, ಅಮ್ಮಾ ಎಂಕ್ ಚಪ್ಪಲ್ ದೆತೊನರೆ ದುಡ್ಡು ಬೋಡು, ಅಮ್ಮಾ ಎಂಕ್ ತೊಡುವಾಪುಂಡು ದಾದಾಂಡಲ ತಿನರೆ ಕನರೆ ದುಡ್ಡು ಬೋಡು ಪನ್ನಗ ಅಮ್ಮನ ಕೈ ಪೋವೊಂದಿತ್ತಿನಿ ಬೀಡಿದ ಸೂಪುದ ಉಲಯಿ ಮಡ್ತ್ ದೀತಿನ ಪೇಪರ್ದ ಉಲಯಿದ ಪತ್ತ್ – ಇರುವದ ನೋಟುಲೆಗ್. ಬೀಡಿದ ಸೂಪು ತತ್ತ್ ದ್ ಮಿನಿ ದೊಂಕುಂಡಲಾ ಅವೊನ್ ಪುಡ್ಯಂಡೊಂದಿತ್ತೆರ್ ಎನ್ನ ಇಲ್ಲದಕುಲು. ಅವ್ ನಮ್ಮ ದೇವೆರ್, ನಮ್ಮ ನುಪ್ಪುದ ಕರ, ನಮ್ಮ ಮಾನ ಮರ್ಯಾದಿ ಒರಿಪಾದಿನ ತಮೆರಿ ಪನ್ದ್.
ಅಮ್ಮೆ ದಾಂತಿನ ಜೋಕುಲೆನ್ ಪಗೆಲ್ ರಾತ್ರೆ ಬೀಡಿ ಸುಂದುದು, ಬೆರಿ ಬಗ್ಗಾದ್, ದಂಬು ಉಬ್ಬೆಸ ಇತ್ತ್ಂಡಲಾ ಚುಮುನಿನ್ ಪುಗ್ಗೆರೆದ ಡಬ್ಬೆದ ಮಿತ್ತ್ ದೀದ್ ಎಡ್ಡೆ ಸಾದಿ ಪತ್ತಾದಿನ ಏತೋ ಅಪ್ಪೆಲೆನ್ ಯಾನ್ ತೂತೆ. ಮಗಲೆನ ಮದಿಮೆಗಾದ್ ಬೀಡಿ ಸುರುಂಟುದು ಸುರುಂಟುದು ಜೀವನ ಇಡೀ ಒರಿಪಾಯಿನ ಪಾಸ್ ಬುಕ್ಕ್ ನ್ ದೆತ್ತ್ ಅವೆಟ್ ತಿಕ್ಕಿನ ಫ್ರಾವಿಡೆಂಟ್ ಫಂಡ್ ಡ್ ರಡ್ಡ್ ಮುಕ್ಕಾಲ್ ಬಂಗಾರ್ ಮಲ್ದಿನ ಏತೋ ಅಪ್ಪೆಲೆನ್ ತೂತೆ. ವಿದ್ಯೆ ದಾಂತೆ, ಪಿದಯಿ ಬೇಲೆಗ್ ಪೋವರೆ ಆವಂದಿನ ಅಪ್ಪೆಲ್ಲುಲಾ ಸ್ವಾಭಿಮಾನೊಡು ಬದ್ಕುಲೆಕ್ಕ ಮಲ್ತಿನಿ ಉಂದೇ ಬೀಡಿ.
ತುಳುನಾಡ್ದ ಏತೋ ಅಪ್ಪೆಲ್ಲೆನ್ ಒರಿಯನ ಇಲ್ಲ ಬಾಕಿಲ್ ಪೋದು ನಟ್ಟಂದಿಲೆಕ್ಕ, ಪಿದಯಿ ಪೋದು ಮಾನ ಮರ್ಯಾದಿಗ್ ಕುಂದೆಲ್ ಬರಂದಿಲೆಕ್ಕ, ಬದ್ಕ್ ಗ್ ಸಾದಿ ತೂಪಾಯಿನಿ ಉಂದೇ ಬೀಡಿದ ಸೂಪು. ಏತೋ ಇಲ್ಲದ ಬಡವು ತೆಕ್ಕಾಯಿನಿ, ಏತೋ ಇಲ್ಲಗ್ ಆಧಾರ ಆಯಿನಿ, ಏತೋ ಕುಬಲ್ ಗ್ ಪಕ್ಕಾಸ್ ಆಯಿನಿ ಉಂದೇ ಬೀಡಿದ ಸೂಪು. ಬೀಡಿದ ಸೂಪು ಪತ್ತಿನ ಅಪ್ಪೆಲ್ಲೆನ ಜೋಕುಲು ಇತ್ತೆ ಮಲ್ಲ ಮಲ್ವ ಬೇಲೆಡ್ ಉಲ್ಲೆರ್. ಮುಲಿತಿಲ್ಲಡ್ ಇತ್ತಿನಕುಲು ಇನಿ ರಡ್ಡ್ ಮಾಡದ ಇಲ್ಲಲೆಡ್ ಉಲ್ಲೆರ್ ಆಂಡಲಾ ಅಕಲೊನ ಅಪ್ಪೆಲ್ಲು ಬೀಡಿದ ಸೂಪು ಬುಡ್ತುಜೆರ್. ಅವ್ ಅಕುಲು ಬಂಗೊಡು ಅಕಲೆನ ಕೈ ಪತ್ತಿನ ಬೀಡಿಗ್ ಕೊರಿನ ಮರ್ಯಾದಿ.
ಬೀಡಿದ ಬೇಲೆಡ್ ರಡ್ಡ್ ಮೋನೆ ಉಂಡು. ಬೀಡಿ ಒಯ್ತ್ ಏತೋ ಕುಟುಮೊಲು ತಾದಿಗ್ ಬೂರ್ದುಂಡು ಆಂಡ ಬೀಡಿ ಕಟ್ಟ್ ದ್ ತಾದಿದಿಟ್ಟಿನ ಏತೋ ತುಳುನಾಡ ಕುಟುಮೊಲು ಮಿತ್ತ್ ಬೈದ್ಂಡ್. ಇತ್ತೆ ಬೀಡಿದ ಅಗತ್ಯ ಇಜ್ಜಿ, ಬೀಡಿ ಕಟ್ಟುನಕುಲುಲಾ ಕಮ್ಮಿ. ದುಂಬು ಕಟ್ಟೊಂದಿತ್ತಿನಕುಲು ಮಾತ್ರ ಆ ಒಂಜಿ ನೆಂಪುಗಾ ಅತ್ತಂದೆ ಅವ್ ಕೊರ್ಪಿನ ಸ್ವಾಭಿಮಾನೊಗಾ ದಾನ್ನ ಕಟ್ಟುವೆರ್ ಅತ್ತಂದೆ ಪೊಸತಾದ್ ಬೀಡಿ ಕಟ್ಟುನಕುಲು ಮಸ್ತ್ ಕಮ್ಮಿ. ಮಾತೆರ್ ವಿದ್ಯಾವಂತೆರಾತೆರ್, ಬೀಡ್ ಕಟ್ಟ್ ಡ್ ಬದ್ಕುನ ಅನಿವಾರ್ಯತೆ ಇತ್ತೆ ಇಜ್ಜಿ. ಆಂಡ ಇನಿ ತುಳುನಾಡ್ ಈತ್ ಮಿತ್ತ್ ಬರೊಡಾಂಡ, ತುಳುವೆರ್ ಈತ್ ವಿದ್ಯಾವಂತೆರಾವೊಡಾಂಡ ಆ ಇಲ್ಲಲೆಡ್ ಇತ್ತಿನ ಜಾಲ್ ಡ್ ಕುಲೊಂದು ಇರೆಕತ್ತೆರೊಂದಿತ್ತಿನ, ಜಗಲಿಡ್ ಕುಲೊಂದು ಬೀಡಿ ಸುರುಂಟೊಂದಿತ್ತಿನ, ಚಿಮಿನಿದ ಬೊಲ್ಪುಗು ತರೆ ಬಗ್ಗಾದ್ ಬೀಡಿ ಕಟ್ಟೊಂದಿತ್ತಿನ ಬೀಡಿದ ಪೊಣ್ಣುಲೇ ಕಾರಣ.