Last updated on October 9th, 2024 at 10:20 am
ಒಡಿಪು: ಪುದರ್‌ಪೋತಿನ ಪುಣ್ಯ ಕ್ಷೇತ್ರ ತಿರುಪತಿಗ್ ಒಡಿಪು, ಕುಂದಾಪುರೊರ್ದು ಡೈರೆಕ್ಟ್ ರೈಲ್ ಸಂಪರ್ಕ ಮಲ್ತ್‌ಕೊರೊಡು ಪನ್ಪಿನ ಈ ಭಾಗೊದ ಜನೊಕ್ಲೆನ ಪಾಕ ದಿನೊತ ಬೇಡಿಕೆ ಕಡೆಕ್ಲಾ ಈಡೆತ್ತ್‌ದ್ಂಡ್.
ಸಂಸದೆ ಕೋಟ ಶ್ರೀನಿವಾಸ ಪೂಜಾರ್ಲೆನ ಬಿನ್ನಪುಗು ಕೇಂದ್ರ ರೈಲ್ವೇ ಸಚಿವಾಲಯ ಕುಡ್ಲ ಮುಟ್ಟ ಬರೊಂದಿತ್ತಿನ ರೈಲ್ (12789/12790) ನ್ ಮುರ್ಡೇಶ್ವರ ಮುಟ್ಟ ವಿಸ್ತರಿಪೆರ ಒಪ್ಪಿಗೆ ಕೊರ್ದು ಆದೇಶ ಮಲ್ದ್ಂಡ್. ಈ ರೈಲ್ ಸೇವೆರ್ದಾವರ ಹೈದರಾಬಾದ್‌‌ದೊಟ್ಟುಗುಲಾ ಸಂಪರ್ಕ ಸಾಧ್ಯ ಆಪುಂಡು.
ಹೈದರಾಬಾದ್‌ದ ಕಾಚಿಗುಡರ್ದ್ ಪಿದಡ್ದ್ ತಿರುಪತಿದ ರೇಣಿಗುಂಟ ಉಂತಡೆಡೆ ಆದ್ ಕುಡ್ಲಗ್ ಬರೊಂದಿತ್ತಿನ, ಕಾಚಿಗುಡ – ಕುಡ್ಲ ನಡುಟು ವಾರೊಡು ರಡ್ಡ್ ದಿನ ಬಲ್ತೊಂದಿತ್ತಿನ ರೈಲ್‌ನ್ ಒಡಿಪು, ಕುಂದಾಪುರೊಡೆ ಆದ್ ಮುರ್ಡೇಶ್ವರ ಮುಟ್ಟ ವಿಸ್ತರಿಪುನ ಸಂಸದೆರೆ ಬಿನ್ನಪುಗು ಭಾರತೀಯ ರೈಲ್ವೇ ಒತ್ತೊಂದುಂಡು.
ರೈಲ್ ಪೊರ್ತುಪಟ್ಟಿ
ಈ ರೈಲ್ ಬುದಾರ ಬೊಕ್ಕ ಸನಿಯಾರ ಮುರ್ಡೇಶ್ವರರ್ದ್ ಮಧ್ಯಾಹ್ನ 3.20ಗ್ ಪಿದಡ್ದ್, ಕುಂದಾಪುರಗ್ ಬಯ್ಯ 4.40, ಕುಡ್ಲಗ್ ರಾತ್ರೆ 8, ತಿರುಪತಿದ ರೇಣಿಗುಂಟಗ್ ಮನದಾನಿ ಕಾಂಡೆ 11.45 ಅಂಚೆನೇ ಹೈದರಾಬಾದ್‌ದ ಕಾಚಿಗುಡ ಉಂತಡೆಗ್ ಬಯ್ಯ 6ಕ್ ಎತ್ತುಂಡು. ಬೊಕ್ಕ ಪಿರ ಕಾಚಿಗುಡರ್ದ್ ಕಾಂಡೆ 6ಕ್ ಪಿದಡ್ದ್, ರೇಣಿಗುಂಟಗ್ ಬಯ್ಯ 5, ಕುಡ್ಲಗ್ ಮನದಾನಿ ಕಾಂಡೆ 9.30, ಕುಂದಾಪುರಗ್ 11.59 ಅಂಚೆನೇ ಮುರ್ಡೇಶ್ವರಗ್ ಮಧ್ಯಾಹ್ನ 2 ಗಂಟೆಗ್ ಎತ್ತುಂಡು.